Limietberge

Die Limietberge is ‘n bergreeks in die Boland.

Hierdie reeks lê noordoos van die dorp Wellington, noord van die Slanghoekberge en die Hawekwaberge en suid van die Elandskloofberge. Bainskloofpas (tussen 33° 31′ suid, 19° 11′ oos en 33° 37′ suid, 19° 06′ oos vorm so ongeveer die suidoostelike grens. Dit is dus deel van die skeiding tussen die Wagenmakersvallei (Val du Charron) rondom Wellington en die Land van Waveren by Tulbagh en Wolseley.

Vanaf Limietkop (1152 m) kan Riebeek-Kasteel in die verte gesien word. Ander pieke is Baileyspiek (1517 m) en Pic Blanc (1049 m). Die Steenboksrivier vloei in die Witterivier, ‘n boloop van die Breederivier.

In die berge is die kramat van sjeik Suleiman, die Tweede Tol-kampeerterrein, ‘n voetslaanpad en ‘n deel van die Limietbergnatuurreservaat.

Die VOC-amptenaar Abraham Gabbema (*DenHaag, c.1630 – †ná 1668) en ‘n geselskap het hierdie gebied besoek en dit was toe die uiterste grens (“limiet”) van die Kaapse nedersetting.

Trivia

In die Hexrivierberge is die ander deel van die Limietbergnatuurreservaat en daar is die hoogste steilste bergwand in Suid-Afrika, naamlik ‘n afgrond van 800 m.

Bibliografie

• Slingsby, Peter: Cape Winelands, the map. Muizenberg: Baardskeerder. 2010. ISBN 978-1-920377-05-2