Ludwig IV, Groothertog van Hesse
Ludwig IV (12 September 1837 - 13 Maart 1892) was die Groothertog van Hesse. Hy het van 13 Junie 1877 tot met sy dood regeer. Deur sy eie en sy kinders se huwelike was hy verbind aan die koningshuise van Brittanje, Rusland en verskeie ander lande.
| Ludwig IV | |
|---|---|
| Groothertog | |
 | |
| Huis | Hesse |
| Vader | Prins Karl van Hesse |
| Moeder | Prinses Elisabeth van Pruise |
| Gebore | 12 September 1837, Prinz-Carl-Palais, Darmstadt, Groothertogdom Hesse, Duitse Bond |
| Oorlede | 13 Maart 1892 (op 54), Neues Palais, Groothertogdom Hesse, Duitse Ryk |
| Eggenote | Prinses Alice van die Verenigde Koninkryk |
| Kinders | Victoria, die Markiesin van Milford Haven Groothertogin Elisabeth Fjodorowna Irene, prinses Heinrich van Pruise Ernst Ludwig, Groothertog van Hesse Prins Friedrich Aleksandra, die keiserin van Rusland Prinses Marie |
Vroeë lewe
wysigLudwig is in die Prinz-Karl-Palais in Darmstadt gebore as die oudste seun van prins Karl van Hesse en prinses Elisabeth van Pruise. Omdat sy pa se oudste broer Ludwig III, die heersende Groothertog van Hesse, sedert 1833 met sy eerste vrou getroud was, maar geen kinders by haar gehad het nie, en van 1868 af in ’n morganatiese huwelik betrokke was,[1] was prins Ludwig van sy geboorte af die tweede aanspraakmaker op die troon, naas sy pa.
Huwelik
wysigOp 1 Julie 1862 is Ludwig getroud met prinses Alice van die Verenigde Koninkryk, ’n dogter van koningin Victoria.[1] Hoewel die huwelik deur die prinsgemaal, prins Albert, gereël is, het die paartjie uit eie wil getrou, selfs nadat die dood van prins Albert ’n skadu oor die troue gegooi het.[2] Hulle het ouers geword in minder as ’n jaar ná die troue en die paartjie het finansieel gesukkel om die lewenstyl te handhaaf wat van iemand van hulle rang verwag is.[2] Prinses Alice se belangstelling in sosiale dienste, wetenskaplike ontwikkeling, welsyn en intellektuele stimulasie is nie deur Ludwig gedeel nie.[2] Die dood van hulle jongste seun, Friedrich, wat hemofilie gehad en voor sy derde verjaardag in 1873 uit ’n paleisvenster geval het, het ’n spirituele krisis by die prinses veroorsaak waarin haar man blykbaar nie gedeel het nie.[2]
In 1866 het die Oostenrykers in die Oostenryk-Pruisiese Oorlog ’n nederlaag gelei en die Groothertogdom Hesse het gevaar geloop om aan Pruise toegeken te word as oorlogsbuit, soos wat met ander Oostenrykse bondgenote gebeur het. Dit lyk of Hesse dié lot gespaar gebly het danksy ’n oordrag van grondgebied en die verbintenis tussen sy heerser en die tsaar van Rusland (Aleksander II se vrou, Maria Aleksandrowna (Marie van Hesse), was die suster van Hesse se groothertog Ludwig III en van prins Karl).[2]
In Maart 1877 het Ludwig die eerste aanspraakmaker op die troon van Hesse geword toe sy pa sterf, en minder as drie maande later was hy op die troon toe sy oom, Ludwig III, sterf.[1]
’n Jaar en ’n half later het hy egter witseerkeel opgedoen. Hy het herstel, maar die siekte het sy jongste dogter, die vierjarige Marie, en sy vrou geëis.[2] Van toe af het hy sy vyf oorlewende kinders alleen grootgemaak.
Dood
wysigGroothertog Ludwig IV is op 13 Maart 1892 aan ’n hartaanval dood[3] en is deur sy seun, Ernst Ludwig, opgevolg.[2]
Verwysings
wysig- ↑ 1,0 1,1 1,2 Willis, Daniel A., ‘’The Descendants of King George I of Great Britain’’, Clearfield Company, 2002, p. 717. ISBN 0-8063-5172-1
- ↑ 2,0 2,1 2,2 2,3 2,4 2,5 2,6 Eilers, Marlene. Queen Victoria's Descendants. Rosvall Royal Books, Falkoping, Swede, 1997. pp. 49-50. 141, 175. ISBN 91-630-5964-9
- ↑ Greg King (1994) The Last Empress: The Life & Times of Alexandra Feodorovna, Tsarina of Russia, page 39
Skakels
wysig
Hierdie artikel is in sy geheel of gedeeltelik uit die Engelse Wikipedia vertaal.
