M.S. Burger
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
M.S. Burger is ’n Afrikaanse skrywer wat die Jan Rabie-prys met haar skryfwerk verower.
Werk en lewe wysig
M.S. Burger bly in Pretoria. Sy het meestersgrade in Sielkunde en Kreatiewe Skryfwerk. In die negentigerjare is sy ’n aktivis vir gay en lesbiër regte. Sy werk in ’n boekwinkel.
Skryfwerk wysig
Sy publiseer kortverhale op LitNet, in Tydskrif vir Letterkunde en in die jaarlikse tydskrif Pomp 12, waarna sy debuteer met die kortverhaalbundel “Bloedfamilie”.[1] Die bundel word hoofsaaklik uit ’n ek-verteller perspektief geskryf,[2] wat ’n outobiografiese illusie by die leser skep.[3] In die eerste deel van die bundel word die familiegeskiedenis verhaal, waaruit dit blyk dat die familie ’n dig bewaarde geheim het.[4] Die tweede deel behandel seks, geweld en waansin, terwyl die derde deel terugkeer na die familieproblematiek en seksualiteit van die eerste afdelings.[5] Dit is eers met die laaste verhaal en op die laaste bladsy wat die familiegeheim openbaar word. Die skrywer maak gebruik van postmoderne tegnieke, soos om besonderhede te verander aan vorige verhale wat sy geskryf het en sodoende die skryfproses te gebruik as verdediging teen angs en om die verlede te verbeel en kommentaar daarop te lewer. “Woestynwerk” is een van die sterkste verhale in die bundel. Die verteller se vriendin pleeg selfmoord en om hierdie tragiese dood te verwerk, vertrek sy na Namibië en om ’n studie te maak van ekosisteme in die Namib-woestyn. Sy beskryf die natuurlewe op digterlike wyse en kombineer dit met terugflitse van die oorledene, om sodoende ’n liriese en diggeweefde teks te skep. In “Wildekus” en “Bloedfamilie” word die veertien verhale in die bundel tematies tot ’n eenheid gebind. Die verhale maak mildelik gebruik van kru taal en eksplisiete verwysings na gewelddadige seks wat die familiekonflik en sielkundige probleme ondersteun. Die skrywer sny met hierdie bundel deur die huigelary en emosionele bedrog van die samelewing en veral binne families. “Bloedfamilie” verower in 2013 die Jan Rabie Rapport-prys vir vernuwende werk en is in dieselfde jaar op die kortlys vir die toekenning van die Universiteit van Johannesburg-prys vir debuutwerk.
Publikasies wysig
| Jaar | Publikasies |
|---|---|
| 2012 | Bloedfamilie |
Bronnelys wysig
Tydskrifte en koerante wysig
- Anoniem “Wenboek verwikkeld, genuanseerd” “Rapport” 9 Junie 2013
Resensies wysig
- ↑ Bennett, Nini “Rapport” 5 Augustus 2012
- ↑ Hambidge, Joan Woorde wat weeg: http://joanhambidge.blogspot.co.za/2013/01/ms-burger-bloedfamilie-2012.html
- ↑ Lategan, Herman “Beeld” 27 Augustus 2012
- ↑ NB-Uitgewers: http://www.nb.co.za/authors/8130 Geargiveer 17 Augustus 2016 op Wayback Machine
- ↑ Scheffer, Ronel Huisgenoot: http://huisgenoot.com/fokus/boek-bloedfamilie-ms-burger/[dooie skakel]