Malvalekkersofa

Sofa ontwerp deur Irving Harper

Die malvalekker-liefdessofa # 5670, wat algemeen as die malvalekkersofa bekend staan, is 'n modernistiese sofa, wat oorspronklik tussen 1956 en 1961 deur die Amerikaanse meubelmaatskappy, Herman Miller, vervaardig is. Die sofa word as die mees ikoniese van alle modernistiese sofas beskou. Die sofa is deur Irving Harper van die George Nelson maatskappy ontwerp. Gedurende die tydperk 1956 tot 1961 is die sofa in twee verskillende lengtes vervaardig. Die sofa bestaan uit 'n metaalraam met ronde skuimrubber kussingskywe (die sogenaamde malvalekkers) wat met verskilende kleure plastiek, leer of tekstielstof oorgetrek is. Die ronde kussingskywe is lineêr oor sowel die sitplek as die rugleuning van die sofa vasgeheg, om die totale oppervlakte van die sofa te bedek.

'n Ry malvalekkersofas

Die kleinste variasie, van twee groottes, van die sofa is in die tagtigerjare weer uitgereik, as deel van die "Herman Miller Klassieke"-reeks, en word vandag steeds vervaardig.

Geskiedenis wysig

In 1954 het 'n verkoopsman van 'n Long Island-plastiekmaatskappy die George Nelson-ateljee in New York besoek, om 'n nuwe tipe skuimrubberproduk aan hulle bekend te stel. Volgens die verkoopsman het sy maatskappy daarin geslaag om 'n ronde, 12-duim skuimrubber kussingskyf, wat tydens die veraardigingsproses as't ware vanself oorgetrek word, te ontwikkel. [1] Die lae vervaardigingskoste het die produk aantreklik gemaak, met die gevolg dat die ontwerper Irving Harper is gevra om 'n meubelstuk, met die ronde kussings as basis, te ontwerp. Tydens die bestek van 'n naweek het Harper 'n sofa, met 18 van die kussings wat bo-op 'n metaalraam vasgeheg is, ontwerp. Die skuimrubberkussing het egter nie die belofte dat dit maklik en goedkoop oorgetrek sal kan word gestand gedoen nie. Dit was inderdaad duur en tydrowend om die individuele sitplekkussings oor te trek. As gevolg daarvan, het die sofa, wat aanvanklik as 'n lae-koste meubelstuk ontwerp is, uiteindelik 'n luukse produk geword. Ten spyte daarvan het Herman Miller voortgegaan met die produksie van die meubels, en is dit in 1956 bekendgestel.

Die malvalekkersofa is oorspronklik in 1956 deur Herman Miller uitgereik, en verskyn in hulle katalogus van 1957. Die sofa is sedert 1961 nie meer vervaardig nie. Ondanks die gewildheid en die bekendheid van die sofa in Herman Miller-publikasies, is daar tussen 1956 en 1961 slegs 186 malvalekkersofas vervaardig. Die 52 duim weergawe van die sofa is in die 1980's weer uitgereik as deel van die "Herman Miller Klassieke"-reeks, en word, hoewel in beperkte getalle, steeds vervaardig.

Ontwerp wysig

Die sofa, wat amptelik deur Herman Miller die malvalekker-liefdessofa # 5670 genoem is, is ontwerp vir sowel huishoudelike as kontraktuele (kantoor) gebruik. Die gebruik van sirkelvormige "malvalekkervormige kussings", wat op gereelde tussensposes bo-op 'n metaalraamwerk vasgeheg is, het 'n speelse ontwerp aan die sofa verleen. Die kussings is met helderkleurige tekstielstof, viniel of leer oorgetrek. Oor die algemeen is al die kussings van 'n bepaalde sofa dieselfde kleur, maar die sofa kon ook bestel word met verskillende kleure kussings, vir 'n meer prettige voorkoms.

Die malvalekkersofa is volgens die 'atomistiese' styl ontwerp. Hierdie styl was ook in ander klassieke George Nelson-ontwerpe sigbaar, byvoorbeeld 'n muurhorlosie met balle (1950) en 'n muurrak met helderkleurige balle (1953). Die "atomistiese" styl is sigbaar as afsonderlike, helderkleurige elemente, in hierdie geval die kussings van die sofa. Dit was 'n weergawe van kunstenaars se voorstellings van die atoom, waarvolgens individuele, helderkleurige kolletjies gebruik is om atoomdeeltjies uit te beeld.

Die malvalekkersofa is in twee verskillende lengtes vervaardig. Die 52 duim weergawe het 18 kussings wat volgens 'n patroon van 4-5-5-4 gerangskik is. Die 103 duim lange sofa het 38 kussings, wat volgens 'n patroon van 9-10-10-9 gerangskik is.

Erkenning aan ontwerper wysig

Die malvalekkersofa is in 1954 deur Irving Harper ontwerp.[1] Die ontwerp van die malvalekkersofa is vir dekades lank aan George Nelson toegeskryf. Dit was in ooreenstemming met die beleid dat die maatskappy, George Nelson Associates, Inc. die regte ontvang het vir alle produkte wat deur hul werknemers ontwerp is. Dit het egter later aan die lig gekom dat baie van die firma se produkte eintlik deur ander ontwerpers, wat vir die maatskappy gewerk het, ontwerp is. John Pile, 'n ontwerper wat in die vyftigerjare vir George Nelson Associates, Inc. gewerk het, het gesê: "George was van mening dat dit aanvaarbaar was om in handelspublikasies aan individuele ontwerpers krediet te verleen, maar dat daar in die verbruikerswêreld altyd eerder krediet aan die firma, en nie die individu gegee moes word nie. Hy het egter nie altyd hierdie beleid nagevolg nie. "

As versamelaarsitems wysig

Voorbeelde van die oorspronklike 186 sofas wat vervaardig is, word gereeld vir $ 15,000 of meer verkoop.[1] Die langer sofas, met die buitengewone skaars lengte van 103 duim, word selde te koop aangebied. Een voorbeeld, bedek met 'n wit tekstielstof, en onderteken deur Irving Harper, is in 2000 deur Sotheby's vir $ 37.500 verkoop.

Verwysings wysig

  1. 1,0 1,1 1,2 "Archived copy" (in Engels). Geargiveer vanaf die oorspronklike op 28 Oktober 2012. Besoek op 23 September 2011.{{cite web}}: CS1 maint: archived copy as title (link)

Eksterne skakels wysig