Maretta Bellingan

Maretta Bellingan is 'n Suid-Afrikaanse skrywer.

Lewe en werk

Bellingan, gebore 25 Julie 1959, is as enigste kind gebore en word op 'n plaas naby Bredasdorp groot. Sy gaan skool op die dorp, waar sy ook matrikuleer. Na skool studeer sy verder aan die Universiteit van Stellenbosch, waarna sy 'n pos by 'n uitgewer in Kaapstad aanvaar. Later word sy joernalis en verhuis na Johannesburg, waar sy onder meer vir Rooi Rose, Sarie en Vaderland werk. Dan sluit sy aan by die redaksie van Rapport, waar sy vir 'n ruk redakteur van Tydskrif is en in 2006 bevorder word tot assistentredakteur. Tussenin spandeer sy twee jaar in Griekeland, waar sy 'n restaurant bestuur. Benewens die gereelde rubriek wat sy vir Rapport skryf, verskyn sy ook as gas op televisie- en radioprogramme. In haar vrye tyd skilder sy en sy het reeds haar eie kunsuitstalling gehou. In 2012 wen sy die ATKV-toekenning vir beste leefstyl-storie wat in tydskrifte verskyn het met “Vely, vely nice!” wat in Vrouekeur verskyn het. Sy bly in Kaapstad.

Skryfwerk

Sy is die skrywer van die gereelde “Klitsgras”-rubriek vir Rapport, waaruit 'n keur saamgestel word en gepubliseer word onder die titel “Klitsgras”. Sy is spitsvondig en kan skreeusnaaks skryf oor dinge wat eintlik nie snaaks is nie, soos ouderdom en misdaad, terwyl al wat 'n heilige koei is ook onder haar pen deurloop. Vir televisie is sy medeverantwoordelik vir die draaiboek van die gewilde sepie Villa Rosa.

Publikasies

• 2004 Klitsgras

Ander Verwysings

• Bellingan, Maretta “Die lot van die bedorwe brok” “Rapport” 3 Oktober 2004
• Botha, Jaco “Brekfis met Klitsgras” “Die Burger” 20 Augustus 2005
• Loots, Sonja “Klitsgras-rubrieke nou in boekvorm” “Rapport” 26 September 2004