Die Marsveld of Marsowo Polje (Russies: Ма́рсово по́ле) is ’n groot park in die middel van Sint Petersburg, Rusland, wat na die god Mars uit die Romeinse mitologie genoem is. Dit beslaan sowat 9 ha. In die noorde grens die veld aan die Marmerpaleis, Soeworowa-plein en die Betskoi- en Saltikof-wonings. Aan die westekant is die kasernes van die Pawlofski-regiment. Die Moikarivier vorm die grens in die suide.

Lugfoto van die Marsveld.
Die Marsveld in die vroeë 19de eeu.
Die Ewige Vlam.

Geskiedenis wysig

Die geskiedenis van die Marsveld begin in die eerste jare van Sint Petersburg se bestaan, toe dit die Groot Veld genoem is. Later is vierings van die Russiese oorwinning in die Groot Noordelike Oorlog daar gehou en is dit hernoem na die Plesierveld. In die 1740's is die Plesierveld vir ’n kort rukkie verander in ’n wandelpark met paadjies, grasperke en blomme. Sy volgende naam, die Tsarinaveld, is begin gebruik nadat die Somerpaleis vir keiserin Katharina I gebou is. Na aan die einde van die 18de eeu het die Tsarinaveld egter ’n militêre paradegrond geword waar monumente opgerig is ter viering van die oorwinnings van die Russiese leër.

Een van die generaals wat daar vereer is, was Aleksander Soeworof, wat uitgebeeld is as die Romeinse god Mars. In 1805 is die Tsarinaveld amptelik hernoem tot die Marsveld. Ná die Februarie-rewolusie het die Marsveld sy funksie as militêre paradegrond verloor en het dit ’n gedenkteken geword. In die somer van 1942 is die Marsveld toegeplant met groente om kos te verskaf tydens die Beleg van Leningrad.

Grafte wysig

Op 23 Mei 1917 is deelnemers aan die Februarie-rewolusie daar begrawe. Altesaam 184 van die 1 382 burgers wat tydens die rewolusie dood is, is daar ter ruste gelê in een gesamentlike graf. In 1917 tot 1919 is ’n monument ter ere van "vegters van die rewolusie" daar opgerig. In 1918 is die plein se naam verander na Plek van Slagoffers van die Rewolusie, maar in 1944 is die naam terugverander.

Die Ewige Vlam wysig

Op 6 November 1957 is ’n Ewige Vlam, die eerste in Rusland, in die middel van die Marsveld aangesteek. Van hier is die vlam in 1967 na Moskou geneem en naby die Kremlinmuur op die Graf van die Onbekende Soldaat geplaas. Die vlam van die Marsveld brand ook by ander gedenktekens in Sint Petersburg.

Eksterne skakels wysig

Koördinate: 59°56′35″N 30°19′55″O / 59.94306°N 30.33194°O / 59.94306; 30.33194