McCain Foods Limited
McCain Foods Limited is 'n Kanadese maatskappy in privaatbesit wat in 1957 deur die broeders Harrison en Wallace McCain in Florenceville (provinsie Nieu-Brunswick) gestig is. McCains is die grootste vervaardiger van bevrore slaptjips (french fries of pommes frites) en ander oondklaar diepvrieskos ter wêreld.
| McCain Foods Limited | |
 | |
| Tipe | Privaatmaatskappy |
|---|---|
| Gestig | 1957 |
| Hoofkantoor | Florenceville-Bristol (Nieu-Brunswick), Kanada |
| Sleutelpersone | Allison D. McCain - voorsitter Dale Morrison - president & hoof uitvoerende beampte van McCain Foods Limited Fred Schaeffer - president & hoof uitvoerende beampte van McCain Foods (Kanada) |
| Industrie | Voedselverwerking |
| Produkte | Bevrore slaptjips, smulhappies, pizza's, bevrore groente, voorgeregte, nageregte en oondklaar geregte |
| Inkomste |  CDN$7 miljard (2014) |
| Webwerf | McCain.com |
Die maatskappy het 18 000 werknemers in diens en beskik oor 41 vervaardigingsaanlegte in twaalf lande wat oor ses vastelande strek. McCain Foods verwerk elke uur sowat een miljoen pond aartappelprodukte en verkoop wêreldwyd een derde van alle diepbevrore aartappelprodukte in meer as 160 lande. In 2000 het McCain Foods Irvin & Johnson se verwerkte voedsel-afdeling met 'n slaptjipfabriek in Delmas (provinsie Mpumalanga) asook twee verwerkingsaanlegte vir bevrore groente in Bedfordview (Johannesburg) oorgeneem en sodoende tot die Suid-Afrikaanse mark toegetree.[1][2] Sy besighede in die land word deur McCain Foods SA (Pty) Ltd. bedryf.[3]
Volgens die Kanadese dagblad The Globe and Mail se Report on Business was McCain Foods ten opsigte van sy verkope in 2014 die 19de grootste Kanadese maatskappy in privaatbesit.[4]