Wikipedia

Meisie met Ballon

Banksy muurskildery

Girl with Balloon (ook, Balloon Girl of Girl and Balloon ), oftewel die 'Meisie met Ballon' is 'n reeks stensilmuurskilderye oraloor Londen wat in 2002 deur die graffiti-kunstenaar Banksy, begin is. Dit beeld 'n jong meisie uit met haar hand uitgestrek na 'n rooi hartvormige ballon wat deur die wind weggevoer word. Die liggings vir hierdie werk sluit in straatmuurskilderye in Shoreditch en die Suidoewer in Londen op die

Meisie met Ballon, Banksy.

Waterloo-brug[1] en ander muurskilderye rondom Londen, alhoewel geen daarvan oorleef nie.

Banksy het verskeie kere variante van hierdie ontwerp gebruik om sy steun vir verskeie sosiale veldtogte te toon: in 2005 oor die Wesbank-versperring, in 2014 oor die Siriese vlugtelingkrisis, en ook oor die 2017 Britse verkiesing. 'n 2017 Samsung-peiling het Girl with Balloon as die Verenigde Koninkryk se nommer een gunsteling kunswerk gelys.

In 2018 is 'n geraamde kopie van die werk spontaan tydens 'n veiling versnipper deur middel van 'n meganiese toestel wat Banksy in die raam versteek het. Banksy het bevestig dat hy verantwoordelik was vir die versnippering en het die veranderde stuk 'n nuwe naam gegee, Love is in the Bin. Sotheby's het gesê dit is "die eerste werk in die geskiedenis wat ooit tydens 'n lewendige veiling geskep is."

Geskiedenis

wysig
 
Hierdie variasie is in 2006 in Bethlehem oorgeverf.

Die liggings vir hierdie werk sluit die Waterloo-brug, sowel as ander plekke in Londen in, alhoewel dit nie tans meer bestaan nie.[2] 'n 2004-weergawe van die muurskildery was by 'n winkel in die ooste van Londen in Shoreditch, wat in 2007 vir £37 200 deur Sotheby's verkoop is,[3] en is in 2014 deur die Sincura Group verwyder en op 19 September 2015 vir £500 000 verkoop.[4]

Verskeie stelle beperkte uitgawe-afdrukke van die werk is vervaardig, en dit het mettertyd waardevol geword. 'n Aanvanklike stel van 25 getekende afdrukke is in 2003 vervaardig,[5][6] terwyl 'n stel van 150 getekende afdrukke en 'n stel van 600 ongetekende afdrukke in 2004/2005 geskep is.[7][8] In November 2015 is een van die getekende stel van 150 opgeveil vir £56 250, vir meer as twee keer sy geraamde waarde.[9]

 
Meisie met Ballon, Wesbank

In Augustus 2005 het Banksy die kunswerk ingesluit as deel van 'n reeks muurskilderye op die Wesoewer-versperring, wat 'n variasie genaamd die Balloon Debate van die meisie wat bo die muur sweef, terwyl sy aan 'n klomp ballonne vashou, uitgebeeld het.[10][11][12]

’n 2009-weergawe is direk op die kartonversterking van ’n Ikea-raam aangebring.[13][14]

Tydens die derde herdenking van die Siriese konflik in Maart 2014, het Banksy die skildery herwerk om 'n Siriese vlugteling uit te beeld en is die hutsmerk #WithSyria bygevoeg. Op 13 Maart is die beeld op die Eiffeltoring en Nelson se kolom geprojekteer. 'n Geanimeerde video is vrygestel, met animasie wat gebaseer was op Banksy se werk, met vertelling deur Idris Elba, en musiek deur Elbow.[15] In die daaropvolgende weke het die sanger Justin Bieber ’n tatoeëermerk op grond van die oorspronklike kuns gekry en ’n foto daarvan op Instagram geplaas, voordat hy dit toe weer uitgevee het. Banksy het dié foto op sy Vleisboekblad geplaas met die opmerking “Omstrede”.[16]

In Julie 2017 het 'n Samsung-peiling onder 2 000 mense van die Verenigde Koninkryk deelnemers gevra om twintig Britse kunswerke in orde van voorkeur te rangskik. Die resultate van die peiling het Balloon Girl as die nommer een gunsteling kunswerk aangedui.[17]

’n Afdruk van Balloon Girl – Colour AP (Purple) is in September 2020 op ’n veiling verkoop vir die bedrag van £791 250, wat van dit die hoogste bodprys vir ’n Banksy-afdruk maak, en ook die duurste afdruk wat al op ’n aanlynveiling verkoop is.[18]

Verenigde Koninkryk algemene verkiesing kontroversie

wysig

Vroeg in Junie 2017 voor die algemene verkiesing in die Verenigde Koninkryk, het Banksy 'n variant van Girl with Balloon bekendgestel waarin die ballon ingekleur was met die Union Jack vlag-ontwerp.[19] Banksy het aanvanklik aangebied om 'n gratis afdruk van sy kuns te stuur aan geregistreerde kiesers in sekere kiesafdelings wat fotografiese bewyse kon lewer dat hulle teen die Torieparty gestem het. Die aanbod het 'n vrywaring ingesluit: "Hierdie afdruk is 'n aandenkingstuk veldtogmateriaal, dit is geensins bedoel om die keuses van die kiesers te beïnvloed nie."[20] Banksy het egter dié aanbod op 6 Junie 2017 onttrek, nadat die Verkiesingskommissie hom gewaarsku het dat dit verkiesingsomkoopwetgewing oortree en ook die verkiesingsuitslae in daardie spesifieke kiesafdelings ongeldig kan maak.[21]

Versnippering op veiling

wysig

Op 5 Oktober 2018 is 'n 2006 geraamde kopie van die kunswerk by Sotheby's opgeveil teen 'n bedrag van £1 042 000 – 'n rekordhoogte vir die kunstenaar.[22] Oomblikke nadat die sluitingsbod afgehandel is, het die kunswerk begin om self te vernietig deur middel van 'n versteekte meganiese papierversnipperaar wat Banksy in die raambodem ingebou het.[23] Slegs die onderste helfte van die werk is versnipper. Banksy het 'n beeld van die versnippering op Instagram vrygestel met die woorde "Going, going, gone...".[24] Sotheby's het gesê: "Ons het nie voorheen 'n situasie ervaar waar 'n skildery spontaan versnipper het nie",[22] wat sommige markkykers laat spekuleer het dat die oorblyfsels van die skildery dalk selfs meer werd sal wees.[25] Banksy het 'n video vrygestel van die versnippering en ook die wyse waarop die versnipperaar in die raam geïnstalleer is, indien die werk ooit op 'n veiling sou gaan.[26]

Die vrou wat die bod op die veiling gewen het, het besluit om die aankoop wel deur te voer. Die gedeeltelik versnipperde werk het 'n nuwe titel gekry, Love is in the Bin, en is geverifieer deur Banksy se stawingsliggaam "Pest Control". Sotheby's het 'n verklaring uitgereik waarin dit "die eerste kunswerk in die geskiedenis is wat regstreeks tydens 'n veiling geskep is."[27][28] Love is in the Bin is self in Oktober 2021 by Sotheby's vir £16 miljoen verkoop.[29]

Verwysings

wysig
  1. ↑ "How did Banksy's Girl with Balloon end up in a shredder? – Public Delivery". publicdelivery.org. Geargiveer vanaf die oorspronklike op 30 September 2022. Besoek op 30 September 2022.
  2. ↑ Bull, Martin (1 November 2011). Banksy Locations & Tours Volume 1: A Collection of Graffiti Locations and Photographs in London, England. PM Press. ISBN 9781604863208.
  3. ↑ "Record price for Banksy bomb art". BBC News. 8 February 2007. Archived from the original on 6 August 2021.
  4. ↑ McDermott, Josephine (7 Februarie 2014). "London Banksy Girl and Balloon mural to be removed". BBC News. Geargiveer vanaf die oorspronklike op 6 September 2021. Besoek op 7 Maart 2016.
  5. ↑ "Banksy 'Girl and Balloon' canvas smashes auction estimate". ITV News. Archived
  6. ↑ "Bonhams : Banksy (British, born 1975) Girl and Balloon 2003". www.bonhams.com (in Engels (VK)). Geargiveer vanaf die oorspronklike op 25 Augustus 2020. Besoek op 16 Oktober 2018.
  7. ↑ "picturesonwalls". www.picturesonwalls.com. Geargiveer vanaf die oorspronklike op 6 September 2021. Besoek op 16 Oktober 2018.
  8. ↑ "Banksy Girl With Balloon (2004), Meaning & Description, My Art Broker". My Art Broker. Archived from the original on 22 August 2021.
  9. ↑ "Banksy print makes more than a Picasso at auction". ITV News. Archived from the original on 25 January 2021.
  10. ↑ Grovier, Kelly (15 Desember 2017). "How a balloon can be an emblem of hope". BBC (in Engels). Geargiveer vanaf die oorspronklike op 30 April 2020. Besoek op 15 Oktober 2018.
  11. ↑ Kim, Adela H. (26 Maart 2014). "Banksy and the Wall". The Harvard Crimson (in Engels). Geargiveer vanaf die oorspronklike op 20 Januarie 2021. Besoek op 15 Oktober 2018.
  12. ↑ Davis, Ben (10 October 2018). "Can We Just Admit That Banksy's Art-Shredding Stunt Is Actually Really Good?". artnet News.
  13. ↑ "Banksy artworks sell for £400,000". BBC News. 30 March 2012.
  14. ↑ "Bonhams : Banksy (b. 1975) Girl and Balloon 2009 signed and inscribed For Mike. Thanks on the reverse stencil spray paint on cardboard, in integral frame 54 by 74 cm. 21 1/4 by 29 1/8 in. This work was executed in 2009". www.bonhams.com (in Engels (VK)). Geargiveer vanaf die oorspronklike op 6 April 2013. Besoek op 16 Oktober 2018.
  15. ↑ Jess Denham (12 Maart 2014). "Banksy reworks girl with heart balloon to mark third anniversary of Syria conflict". The Independent. Geargiveer vanaf die oorspronklike op 7 Oktober 2018. Besoek op 7 Maart 2016.
  16. ↑ "Justin Bieber's Banksy Tattoo Blasted By The Graffiti Artist, Sort Of". The Huffington Post UK. 18 Maart 2014. Geargiveer vanaf die oorspronklike op 4 Maart 2021. Besoek op 7 Maart 2016.
  17. ↑ "Banksy's balloon girl chosen as nation's favourite artwork". BBC News. 26 Julie 2017. Geargiveer vanaf die oorspronklike op 6 September 2021. Besoek op 29 Julie 2017.
  18. ↑ Holmes, Helen (24 September 2020). "Banksy Just Broke Another Auction Record With His 'Balloon Girl' Print". Observer. Archived from the original on 19 June 2021.
  19. ↑ "Banksy risks breaking election law with offer of art prints for anti-Conservative voters". ITV. 3 Junie 2017. Geargiveer vanaf die oorspronklike op 25 Januarie 2021. Besoek op 10 Junie 2017.
  20. ↑ O'Connor, Roisin (4 Junie 2017). "Banksy is offering free art to people who vote against the Tories". Independent. Geargiveer vanaf die oorspronklike op 27 Augustus 2021. Besoek op 10 Junie 2017.
  21. ↑ Morris, Steven (6 Junie 2017). "Banksy forced to withdraw offer to send free artwork to non-Tory voters". The Guardian. Geargiveer vanaf die oorspronklike op 23 Januarie 2021. Besoek op 10 Junie 2017.
  22. ↑ 22,0 22,1 Gina Martinez (6 October 2018). "It Appears We Just Got Banksy-ed." Art piece self-destructs after being sold for over $1 Million". Time. Yahoo! News.
  23. ↑ "Banksy artwork shreds itself after £1m sale at Sotheby's". BBC News. 6 Oktober 2018. Geargiveer vanaf die oorspronklike op 11 September 2021. Besoek op 6 Oktober 2018.
  24. ↑ Johnston, Chris (6 October 2018). "Banksy auction prank leaves art world in shreds". The Guardian. Archived from the original on 5 September 2021.
  25. ↑ Jill Lawless (7 Oktober 2018). "Banksy artwork self-destructs just after $1.4 million sale". Associated Press. Geargiveer vanaf die oorspronklike op 16 Januarie 2021. Besoek op 8 Oktober 2018.
  26. ↑ "Banksy publishes video detailing auction stunt plan – video". The Guardian. 7 Oktober 2018. Geargiveer vanaf die oorspronklike op 15 Januarie 2021. Besoek op 12 Oktober 2018.
  27. ↑ Busby, Mattha (11 Oktober 2018). "Woman who bought shredded Banksy artwork will go through with purchase". The Guardian
  28. ↑ Kinsella, Eileen (11 Oktober 2018). "Banksy Authenticates and Renames His Shredded $1.4 Million Painting—Which the Buyer Plans to Keep". artnet. Geargiveer vanaf die oorspronklike op 19 Mei 2020. Besoek op 12 Oktober 2018.
  29. ↑ "Banksy's Love is in the Bin sells for record £16m". BBC News. 14 Oktober 2021.
Ontsluit van "https://af.wikipedia.org/w/index.php?title=Meisie_met_Ballon&oldid=2610196"