Mitsubishi A5M
Die Mitsubishi A5M was 'n Japannese, vliegdekskipgebaseerde vegvliegtuig wat deur die Japannese Keiserlike Vloot gebruik is tydens die Tweede Wêreldoorlog. Die vliegtuig is die voorganger van die A6M Zero vegvliegtuig en die Geallieerdes het dit die Claude genoem. Die vliegtuig is ontwikkel na aanleiding van 'n spesifikasie wat uitgereik is deur die Japannese Keiserlike Vloot in 1934 vir 'n vliegtuig wat vinniger as 350 km/h kan vlieg. Dit was 'n moeilike spesifikasie om aan te voldoen destyds.
| Mitsubishi A5M | |
|---|---|
 | |
| Tipe | Vegter |
| Vervaardiger | Mitsubishi |
| Ontwerp deur | Jiro Horikoshi |
| Nooiensvlug | 4 Februarie 1935 |
| Bekendstelling | 1936 |
| Onttrek | 1945 |
| Hoofgebruiker | Japannese Keiserlike Vloot |
| Aantal gebou | 1 094 |
Mitsubishi se prototipe, die Ka-14, wat in Februarie 1935 sy eerste vlug voltooi het, het 'n topsnelheid van 450 km/h gehad. Dit was ontwerp met minimum wrywing in gedagte: klein frontale area, gelykvlakkige klinknaels en die vaste landingswiele het vaartbelynde bedekkings gehad. Maar die ontwerp blyk te kompleks te wees: die omgekeerde seemeeu-vlerkontwerp is vervang met 'n meer konvensionele ontwerp. Dié model was toegerus met 'n Kotobuki 2-KAI-1 motor van 585 perdekrag en geproduseer as die Vloot Tipe 96 vliegdekskipvegtermodel 1 (Mitsubishi A5M1) en word in diens gestel vroeg in 1937. Die volgende twee modelle A5M2a (met 'n 610 perdekrag KAI-3 enjin) en die A5M2b (met die 640 perdekrag Kotobuki 3-enjin) word Japan se belangrikste vegters tydens hulle oorlog met China. Tot op daardie stadium het Japan groot verliese gely maar die koms van die A5M2a het beheer oor die lugruim verseker. Die A5M2b het 'n toe kajuit en 'n drielemskroef gehad. Die kajuitluik was egter later verwyder op aandrang van die vlieëniers. Die A5M2's was egter so suksesvol dat die Chinese al hul vliegtuie onttrek het buite bereik van die Japannese vegters. In antwoord hierop het die Japannese die A5M4 bekendgestel wat 'n nog groter togafstand gehad het.
Die A5M4 lyk nes die A5M2b maar het die Nakajima Kotobuki 41-enjin van 710 perdekrag gehad en kon 'n afvaltenk van 160 liter dra. Dit is in 1938 in diens gestel en met sy groter togafstand het hulle die Chinese vliegtuie nog verder weg uit die oorlogsone verdryf. Toe die Tweede Wêreldoorlog uitbreek is die vliegtuig egter onttrek vir sekondêre diens omrede die nuwer geslag Geallieerde vegvliegtuie hulle oorheers het. Teen die einde van die oorlog was die A5M4's gebruik vir kamikaze sendings.
Tegniese besonderhede wysig
| Item | Statistiek |
|---|---|
| Aantal motore | 1 |
| Tipe motor | Skroef |
| Vervaardiger | Nakajima Kotobuki 41 9-silinder stermotor |
| Kraglewering per motor | 710 perdekrag |
| Vlerkspan | 11,0 m |
| Lengte | 7,55 m |
| Hoogte | 3,2 m |
| Vlerkoppervlakte | 17,8 m2 |
| Maks. opstygmassa | 1 707 kg |
| Maksimum snelheid | 440 km/h |
| Operasionele hoogte | 10 000 m |
| Togafstand | 1 200 km |
| Klimvermoë | 850 m per minuut |
| Bewapening | Twee 7.7 mm masjiengewere bo motor
en twee 30 kg bomrakke onder vlerke |
Sien ook wysig
Bron wysig
- Crosby, Francis: THE WORLD ENCYCLOPEDIA OF FIGHTERS & BOMBERS. 2015. ISBN 978-1-84476-917-9