Mix Markt

Mix Markt is 'n Duitse supermarkketting wat hom op kos uit Oos-Europese lande toespits. Die handelsmerk MIX Markt verteenwoordig 'n groot verskeidenheid produkte soos basiese kossoorte wat in die daaglikse behoeftes van verbruikers van Oos-Europese afkoms voorsien, asook spesialiteite uit Oos-Europa soos Russiese roomys.

MIX Markt
Tipe	GmbH (moedermaatskappy)
Gestig	1997 in Herrenberg
Hoofkantoor	Herrenberg,  Duitsland
Gebied bedien	Duitsland, Europa
Industrie	Supermarkketting
Produkte	Basiese kosse en spesialiteite uit Oos-Europa
Inkomste	510 miljoen € (Monolith-groep, 2018)
Werknemers	1 600 (2016)
Webwerf	MIX Markt

Geskiedenis

Die eerste Mix Markt is in 1997 in Oerlinghausen in die deelstaat Noordryn-Wesfale geopen. Die onderneming, wat deur Artur Steinhauer (*1959), Peter Schuju (*1966) en Waldemar Völker (1949-2009), drie Oos-Europese immigrante met Duitse wortels, gestig is, is uit die idee gebore om vir immigrante uit voormalige Oosbloklande 'n verskeidenheid produkte uit hul geboortelande teen lae pryse aan te bied.

Tans is daar 166 Mix Markt-supermarkte in Duitsland (waarvan 25 Mini Mix-markte met 'n kleiner aanbod) en 130 supermarkte in Europese lande (waarvan 88 as Mini Mix-markte bedryf word). Mix Markt het filiale in Italië (33 supermarkte), Portugal (21), Griekeland (18), Spanje (18), België (12), Siprus (10), die Verenigde Koninkryk (5), Montenegro (3), Oostenryk (2), Tsjeggië (2), Nederland (1) en Frankryk (1).

Konsep

Mix Markt-winkels verskil van ander supermarkte in Duitsland veral ten opsigte van tipies Oos-Europese karakter van die produkte wat hulle aanbied, asook die mengsel van bedryfsvorme wat groot- en kleinhandel, supermarkte, spesialiteitewinkels en klein koswinkels onder een handelsmerk verenig. Van personeel in supermarkte word verwag om tweetalig te wees (Russies en Duits).

Mix Markt se hoofsaaklike teikengroep is verbruikers van oorwegend Russiese afkoms wat groter hoeveelhede vars kos soos vis, vleis, groente en vrugte self verwerk om sodoende die koste, wat deur veredeling veroorsaak word, te bespaar en dikwels grootmaatinkope doen, maar ook Duitse kopers wat in Oos-Europese kos en spesialiteite belangstel.

So word kos ook in groot pakkette en sakke aangebied wat andersins eerder in groothandelswinkels verkoop word, soos aartappels en uie in sakke van tussen 10 en 20 kilogram. Vars vis word dikwels nie gefileteer en groot vleisstukke nie voorgesny nie.

Produkte

Die kosaanbod in Mix Markt-winkels weerspieël die Oos-Europese smaak van hul klante: 'n Rak vol ingemaakte tamaties

Halfharde kaas uit Letland wat van gestoomde melk berei word

Sowat veertig persent van die produkte in 'n tipiese Mix Markt-winkel is vars kosse soos vleis, vis, groente en vrugte; vyftig persent is gerookte kosse (vis en wors), ingemaakte kosse (groente-, vis- en vrugteprodukte, slaaie), kits- en diepvrieskos soos bevrore pelmeni, suiwelkosse, sagte dranke en alkoholiese dranke soos bier, wyn en wodka. Ook nie-voedselprodukte soos tipies Russiese kookgereedskap (mantowarka en mangal) en Russiese tydskrifte word verkoop.

Meer as die helfte van alle produkte, wat deur Mix Markt versprei word, word in Duitsland volgens Russiese of ander Oos-Europese metodes vervaardig. Danksy groot gemeenskappe van Oos-Europese immigrante neem dié land in hierdie opsig 'n leidende posisie in Wes-Europa in. Daarnaas word 'n groot persentasie kosse soos suiwelprodukte volgens Russiese metodes in Oos-Europese lidlande van die Europese Unie soos Litaue, Letland en Pole vervaardig.

Kenmerke

'n Mix Markt-winkel in Düren

Volgens sy besondere konsep en teikengroep versprei Mix Markt basiese kosse en spesialiteite uit Rusland, Pole, Letland, Oekraine, Moldawië, Kazakstan, Roemenië, Bulgarye, Hongarye, Serwië, Slowenië en Turkye. Die klemtoon val hierby ook op kosse wat kenmerkend vir die kookkuns van Kazakstan (die tuisland van baie Ruslandduitsers), Pole, Rusland, Silesië, Seweburge en Oekraine is.

Hierby hoort byvoorbeeld:

• besondere visprodukte soos kaviaar, gesoute haring en stokvis,
• besondere suiwelkosse soos kefir, kumys en rjazjenka,
• Russiese roomys-soorte soos plombir en eskimo,
• besondere pastageregte soos baranki, pelmeni, pirogge en wareniki,
• besondere ingemaakte of voorbereide groentesoorte soos ingemaakte sampioene, ingemaakte groente, gepekelde komkommers en suurkool,
• tamaties en waatlemoene,
• besondere dranke soos berkesap, Krim-vonkelwyn en kwas,
• besondere bessies- en graansoorte soos boekweit, mos- en sanddoringbessies.

Organisasie

Mix Markt-winkels is gewoonlik konsessiesake wat die regsvorm van 'n Duitse Offene Handelsgesellschaft (OHG; "ope handelsmaatskappy") aanneem. Die hoofkwartier (MIX GmbH) is in Herrenberg, Baden-Württemberg geleë.

Produkte word deur die sakegroep Monolith versprei, 'n samesluiting van vier groothandelsondernemings (Monolith Süd GmbH in Herrenberg, Monolith Ost GmbH in Schwabach, Monolith Nord GmbH in Hamburg en Monolith Mitte GmbH in Leopoldshöhe). Daarnaas is kontrakte met sowat 100 leweransiers en kosprodusente gesluit.

Verwysings

• Hierdie artikel, of gedeeltes daarvan, is uit die volgende Wikipedia-artikel vertaal: Mix Markt