Molteno-formasie
Die Molteno-formasie is 'n geologiese formasie van die Stormberg-groep, wat deel uitmaak van die Karoo-supergroep van Suid-Afrika. Dit dateer uit die laat-Trias en is baie ryk aan fossiele.
Vorming wysig
Die Molteno-formasie het gevorm uit riviersand in 'n stadium toe die streek se klimaat nog nat was. Hierdie formasie is die onderste (oudste) laag van die Stormberg-groep en verteenwoordig die eerste fase van die geleidelike droërwordende klimaat wat in die sediment van die Stormberg-groep gesien kan word. Dit het plaasgevind van die Trias-periode af en regdeur die Juras toe die superkontinent Gondwana stadig noordwaarts beweeg het.
Die Molteno-formasie se sandsteen is nou blootgestel deur verwering en kan gesien word as kranse in die Drakensberge. Die sandsteen kan maklik uitgeken word aan sy glinsterende voorkoms, wat veroorsaak word deur klein kwartskristalle wat die sandkorrels saambind. Gesteentes van die Molteno-formasie gee 'n unieke blik op die tydperk van die ontstaan van die dinosourusse, soogdiere en moontlik ook van blomplante (Angiosperme). Dolerietgange en -plate is ook algemeen en is gevorm deur basalt wat aan die einde van die Stormberg-groep se vorming oor die Stormberg-groep uitgeloop het. Hierdie vulkanisme is veroorsaak deur die opbreking van Gondwana.
Fauna en flora wysig
Die fauna en flora wat in hierdie tydperk hier voorgekom het (bekend as die Molteno-bioom) het 'n buitengewoon groot biodiversiteit gehad wat klas en orde betref, veral by insekte en naaksadiges. Ander baie algemene vorme van flora was broodbome, varings en horsetails.
Ligging wysig
Die Molteno-formasie word in 'n breë gordel gevind, vanaf die Oos-Kaap, deur Lesotho tot in die Vrystaat in Suid-Afrika. Dit is genoem na die dorpie Molteno in die Stormberge van die Oos-Kaap.
Die welige plantegroei van die Trias-rivierdeltas wat tydens die vorming van die Molteno-formasie voorgekom het, is die bron van die steenkoolvelde van die Oos-Kaap. Die vier hoofsteenkoolsome wat voorkom, is die Indwe, Guba, Molteno en Gubenxa