NG gemeente Goudini
Die NG Gemeente Goudini in die suidwestelike uithoek van die Breëriviervallei is ’n gemeente in die Ring van Worcester en in die Sinode van Wes-Kaapland.
Geskiedenis
wysigGoudini, gestig in die jaar 1879, is ’n dogter van die gemeente Worcester. Die sentrum van die gemeente is die dorpie Rawsonville (so genoem na ’n sekere skeepskaptein Rawson) en is geleë sowat 15 km van Worcester af, aan die voet van die skilderagtige Du Toitskloof, waardeur die nasionale pad met sy twee tonnels, die Du Toitsklooftonnel en die meer onlangs Hugenotetonnel, van die suide na die noorde kronkel. Die gemeente is nie baie uitgestrek nie, maar dig bewoon aangesien die plase hier nie groot is nie. Dit is ’n mooi groen landskap met myle wingerd, terwyl die bekende “Goudini Bad” (deesdae die ATKV se Goudini-spa) sowat 6 km van die dorpie af geleë is.
Die stigting van die gemeente het op 3 Maart 1879 op plegtige wyse plaasgevind. By die stigting het 144 lidmate van die moedergemeente Worcester na die nuwe dogtergemeente oorgekom. Ds. William Murray van Worcester was die konsulent, en hy en eerw. Esselen (ook van Worcester) het die bearbeiding van die gemeente tot met die koms van die eerste leraar, ds. G.F. Marais (1882–’84), behartig.
Die openbare eredienste is gedurende 1879 in die ou skoolgebou gehou, wat dan ook as kerk gedien het. Die eerste pastorie is in 1881 gebou en in gebruik geneem. Die tweede leraar van die gemeente, ds. I.F.A. de Villiers, het van 1885 tot 1895 hier gestaan en uiters geseënde werk verrig. Ook ds. J.A. Malherbe (1895-1934) het ’n groot en heerlike werk vir die Koninkryk van God hier verrig, volgens die gemeente se medewerker aan Ons gemeentelike feesalbum (1952). “Diep spore is deur hierdie dienskneg van die Here en sy vrome eggenote in hierdie gemeente getrap, spore wat vandag nog gesien word.”
In 1923 het ’n heerlike en geseënde herlewing op Rawsonville plaasgevind. Bekeerlinge uit daardie tyd het nog dekades lank onder die steunpilare van die gemeente getel. Ds. Malhberbe se opvolger was ds. W.L. Steenkamp (1935–’44) en toe ds. H E. du Toit, wat in 1945 bevestig is.
Die kerkgebou waarin die gemeente vandag nog byeenkom, is reeds in 1893 opgerig; op Rawsonville is dus nie, anders as op so baie van die ouer plattelandse dorpe, sprake van n ou en nuwe kerk nie. Die ou kerksaal (eers ’n CJV-saal) is in 1939 deur ’n mooi en doeltreffende gebou vervang. In 1947 is die ou kerktoring deur ’n nuwe en hoër toring met ’n groot horlosie vervang. Die volgende voorwaartse stap was toe die nuwe pastorie in 1950 betrek is.
Goudini het tot die middel van die 20ste eeu reeds sowat 12 evangeliedienaars aan die NG Kerk gegee, terwyl die Goudini-pastorie se eerste bewoners ’n pastoriemoeder en die tweede, derde en vierde bewoners elk ’n leraar opgelewer het. Ook op sendinggebied het die gemeente veel presteer.
Predikante
wysig- Guillaume Francois Marais, 1882 –1884
- Izak Frederik Albertus de Villiers, 1885 – 1895
- John Addey Malherbe sr., 1895 – 1934
- Willem Lucas Steenkamp, 1935 – 1944
- Hubertus Emile du Toit, 1945 –
- Ds Myburgh +- 1970 - 1982
- Hendrik Daniel Barnard, 1982 – 1987
- André Louw O’Kennedy, 1987 – 2019
- Barend Jacobus Verster, 1988 – 2016
- Willem Petrus Du Plessis, 2017 – hede
- Rudolph Scharneck, 2019 – hede
Bron
wysig- (af) Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.