NG gemeente Grootfontein
Die NG gemeente Grootfontein is 'n gemeente in die Nederduitse Gereformeerde Kerk se Sinode van Namibië. Volgens die NGK Jaarboek van 2021 was hier toe 115 doop- en 227 belydende lidmate. Die predikant was toe ds. D.J. de Vos.
Die verhaal van die gemeente Grootfontein begin met ds. Neethling (waarskynlik H.J.) se oorslapery by Dorslandtrekkers op pad terug na Transvaal nadat hy Angola besoek het. Op 4 September 1895 word Nagmaal gevier op die plaas Strydfontein (van kmdt. Lombaard) net buite Grootfontein. Ná jare se pogings word Moria-gemeente eindelik in 1902 gestig en sluit dit ook Grootfontein in. Ná verdeeldheid en die hersamestelling van die gemeente as Otjiwarongo (1939), stig Grootfontein in 1944 af. Rundu, Tsumeb en Otavi, wat later elkeen as 'n afsonderlike gemeente sou afstig, was aanvanklik wyke.
Die koms van die spoorlyn, myne en later die weermag het telkens ’n rol gespeel in die ontwikkeling van die dorp en gemeenskap, maar die belangrikste bydraer tot die plaaslike ekonomie was altyddeur landbousektor. In Oktober 1968 is die nuwe kerkgebou in gebruik geneem. Die gemeente was tydens die sogenaamde bosoorlog ’n geestelike tuiste vir die Suid-Afrikaanse soldate. In 1988, die jaar voor die verkiesing wat gelei het tot Namibië se onafhanklikwording op 21 Maart 1990, was hier 440 doop- en 670 belydende lidmate. Vyf jaar later het dit afgeneem tot onderskeidelik 150 en 350.
Bron
wysig- Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-Uitgewers.