NG gemeente Piet Retief

Die NG gemeente Piet Retief is 'n gemeente in die Nederduitse Gereformeerde Kerk se Oostelike Sinode met sy middelpunt op die dorp Piet Retief, Mpumalanga.

Die kerkgebou is in 1922 ingewy. Die argitek was Gerard Moerdyk.

Ds. J.P. Wolhuter, leraar van 1895 tot 1907.

Die kerkgebou van nader gesien met sy kenmerkende Moerdyk-ontwerpskenmerke.

Ds. B.H. Swart, leraar van 1908 tot 1913.

Ds. G.J. Rousseau, leraar van 1914 tot sy dood op 31 Oktober 1918 tydens die Groot Griep oorlede.

Stigting

Op 14 April 1888 het die gemeente Piet Retief afgestig van die moedergemeente Wakkerstroom. Tot 1895 is die nuwe gemeente deur ds. D.P. Ackerman van Wakkerstroom bearbei.

Kerkbou

Die eerste kerkgebou het bestaan uit klip en sooie met 'n rietdak. In 1893 is 'n tweede kerk op 'n plein in die middel van die dorp gebou. Hierdie gebou het die gemeente tot 1922 gedien. Aangesien die leiklip waarvan die mure gemaak is, geneë was om water te trek het die gemeente besluit om 'n sierliker en doeltreffender gebou op te rig. Die argitek Gerard Moerdyk se planne vir 'n nuwe kerk is aangeneem. In 1921 is 'n begin gemaak met die bou van die huidige gebou. Dit is in 1922 ingewy. Die gebou strek die boukommissie en gemeentelede van dié tyd tot eer en is 'n sieraad vir die dorp.

Leraars

Geleë in die suidoostelike hoek van die destydse Transvaal het hierdie gemeente gedurende sy bestaan tye van voorspoed en teenspoed, vreugde en smart, herlewing en verval geken. Gedurende die onvergeetlike griepepidemie van Oktober 1918 is 'n paar dae ná mekaar die leraar en sy gade – ds. Rosseau en mev. Rosseau – oorlede. Die gemeente het die vyf wesies in die pastorie moes versorg en het hulle plig teenoor hulle trou nagekom. As herders het hier in die eerste sowat 60 jaar van die gemeenste se bestaan gestaan: D.P. Ackerman (1888–'95), J.P. Wolhuter (1895–1907), B.J. Swart (1908–'13), G.J. Rosseau (1914–18), J.F. Naudé (1919–'21), J.S. Bosman (1922–'26), C.F. Mynhardt (1927–'32), R.J. Raath (1933–'38), W. De W. Strauss (1939–'44), D.S. Snyman (1945–'47), J.A. Hurter (1947–'50). Ds. M.H. van der Colff is in 1950 bevestig.

In 1952 skryf die gemeente se medewerker, moontlik ds. Van der Colff, in Ons gemeentelike feesalbum: “Met dankbaarheid dink ons aan manne en vroue wat die Here aan hierdie gemeente geskenk het en wat alreeds hulle ewige rus ingegaan het. Hulle werke leef na hulle voort. Om net 'n paar te noem: broers Piet de Winnaar, P.H. Kritzinger, G.T.C. Ferreira, T.C. Steenkamp, Ignatius Ferreira, T.C. Erasmus en K.P. van Dyk. Die ewigheid sal toon wat menige stille in die 1and vir sy Heer en Meester opgeoffer het. As gemeente het ons waarlik stof tot dankbaarheid dat ons op stoflike gebied so voorspoedig was. Die kerkgebou is betaal en daar is nie geldelaste wat ons druk nie. Kon ons maar dieselfde sê van die geestelike sy van die gemeente.”

Enkele leraars

• Gideon Jacobus Rousseau, 1914 – 31 Oktober 1918 (oorlede in die amp aan griep)

Leraarsgalery

• 
  Ds. J.F. Naudé, leraar van 1919 tot 1921, waarna Graaff-Reinet van 1921 tot 27 Augustus 1948, toe hy in die amp oorlede is. Hy was 75 jaar oud. Sy predikantseun was ds. Beyers Naudé.
• 
  Ds. C.F. Mynhardt, die predikant van 6 Augustus 1927 tot sy demissie op 22 Desember 1931.
• 
  Ds. R.J. Raath, leraar van 1933 tot 1938.
• 
  Ds. D.S. Snyman, leraar van 1945 tot 1947, waarna medeleraar van Johannesburg.
• 
  Ds. J.A. Hurter, leraar van 1947 tot 1950. Hy het van 1947 tot sy aftrede op 31 Julie 1988 agt gemeentes bearbei, buiten Piet Retief en Oos-Londen heel aan die begin van sy loopbaan, almal in die Sinode van Wes-en-Suid-Kaapland.
• 
  Ds. M.H. van der Colff, leraar van 1950 af.

Bronne

• Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.