NG gemeente Upington-Noord
Die NG gemeente Upington-Noord is 'n gemeente van die Nederduitse Gereformeerde Kerk op die Noord-Kaapse dorp Upington en in die Sinode van Noord-Kaapland.
Upington-Noord het sy beslag gekry op 15 Maart 1957 tydens ’n kerkraadsvergadering van die moedergemeente toe voorgestel is dat dit tyd is vir ’n gemeente om af te stig. As bruidskat het die gemeente £4,250 sowel as die pastorie in Malherbestraat met aangrensende stuk grond (waar die kerk en saal later opgerig sou word) ontvang. Upington-Noord is op 13 Junie 1957 gestig met 644 belydende lidmate en 307 dooplidmate. Die eerste predikant was ds. Abraham Theron, wat op 12 Oktober 1957 hier bevestig is nadat hy voorheen Randse Sekretaris van die Christelike Polisie-en-Gevangenisdiensvereniging was.