Wikipedia

NRK

Norsk rikskringkasting AS, wat gewoonlik onder die afkorting NRK bekend staan, is 'n staatsbeheerde Noorse uitsaaikorporasie wat naas televisie- en radioprogramme ook inhoude vir nuwe media soos internettelevisie aanbied. NRK fungeer net soos die Britse BBC, die Sweedse SVT, die Duitse ARD en ZDF en die Suid-Afrikaanse SAUK as 'n publieke uitsaaikorporasie en is 'n lid van die Europese Uitsaaiunie (European Broadcasting Union, EBU). NRK is die grootste mediamaatskappy in Noorweë. NRK het sy hoofkwartiere in Marienlyst (Oslo) en Tyholt (Trondheim).

Norsk rikskringkasting
Tipe Staatsmaatskappy, openbare diens-uitsaaier
Gestig 1924 / 1933
Hoofkantoor Oslo, Noorweë
SleutelpersoneThor Gjermund Eriksen
IndustrieUitsaai
ProdukteTelevisie, radio, aanlyn-dienste
Werknemers3 747[1] (2012)
MoedermaatskappyKoninkryk van Noorweë
Webwerfnrk.no
Radiohuset (Kringkastingshuset) is die oudste deel van die NRK se hoofkwartier in Marienlyst (Oslo)

Finansiering en begroting

wysig

NRK word hoofsaaklik deur TV-lisensies gefinansieer. Die NRK se lisensie-inkomste het in 2005 meer as drie miljard NOK beloop – 'n bedrag wat gelykgestaan het aan die totale Noorse besteding aan kultuur.

Geskiedenis

wysig
 
Die komediereeks «Nytt på nytt» in 2005
 
Die radioprogram «20 spørsmål» word in Ateljee 19 in die NRK se hoofkwartier geproduseer

Die eerste gereelde radioprogram in Noorweë is vanaf 1925 deur Kringkastingselskapet A/S, 'n privaatbeheerde uitsaaikorporasie en historiese voorloper van NRK, aangebied. Die staatsbeheerde NRK is in 1933 gestig en was net soos die Britse BBC veral daarop gemik om inligtingsprogramme vir die algemene publiek uit te saai. Nuusberigte en ander inligting het in die beginjare dan ook die oorgrote deel van die uitgesaaide programme gevorm. Met sy stigting het NRK oor 90 medewerkers beskik en sy radioprogramme tussen tien en 22:45 uur uitgesaai, met 'n pouse tussen 15:00 en 17:00.

Die Noorse term Kringkasting, 'n regstreekse vertaling van die Engelse woord broadcasting, is vir die eerste keer in 1924 gebruik en het vanaf 1925 as amptelike benaming gedien.

In die oorlogsjare tussen 1940 en 1945 is die uitsaaiwese in Noorweë deur die Nazi-bewind beheer, en die uitsaainetwerk is gedeeltelik verniel. Die NRK het na die Verenigde Koninkryk uitgewyk van waar Noorse programme onder die leiding van Toralv Øksnevad as Stemmen fra London ("Die Stem uit Londen") uitgesaai is. Hierdie programme, en veral die spesiale gekodeerde nuusbulletins, het van die NRK 'n belangrike spreekbuis vir die Noorse weerstandsbeweging gemaak. Die Duitsers het van die begin van die besetting in 1940 af reklame in Noorse radioprogramme verbied uit vrees vir verborge gekodeerde boodskappe.

Ná die oorlog het die NRK sy uitsaaidienste hervat, en sedert die 1950's het vermaak en streeksgebonde programme uit die verskillende distrikte 'n steeds belangriker rol begin speel. Nadat NRK in sy eerste dertig bestaansjare op sy radiodienste gefokus het, is in 1954 met die eerste toetse vir 'n televisie-uitsaaidiens begin, en vanaf 1960 is gereelde televisieprogramme aangebied. Die Noorse televisiediens is op 20 Augustus 1960 amptelik geopen.[2]

Reeds tydens die Olimpiese Winterspele van die jaar 1968 in Grenoble (Frankryk) is talle programme as kleurtelevisie uitgesaai. Die NRK het or 'n kleurtelevisiekamera beskik wat deur televisie-aanbieders ingespan is om bont kleure by die aankondiging van programme in te bring. Toe in die vroeë 1970's meer frekwensies vir kleurtelevisiedienste beskikbaar gestel is, het ook die nuusbulletin Dagsrevyen na kleurtelevisie oorgeskakel. Die meeste televisiefilms en die speurderreeks Detektimen op Vrydagaande is destyds al as kleurprogramme uitgesaai, alhoewel NRK se gereelde kleurtelevisiediens eers vanaf 1975 ingestel is. Die nuwe medium het in hierdie periode 'n oorheersende rol gespeel, en radiodienste het minder gewild geraak.

Tot in die 1980's het NRK oor 'n monopolie ten opsigte van televisie- en radioprogramme beskik. Die elektroniese mediabedryf is vervolgens aangevul met die eerste streeksgebonde privaat radiostasies, en vanaf 1987 het ook privaat televisieuitsaaidienste soos TVNorge hul programme aangebied. In 1992 het NRK se nasionale televisiedienste met TV2 'n strawwe privaat mededinger gekry.

Tekst-TV, die Noorse televisieteks, word sedert 1983 aangebied, terwyl die internet-gebaseerde interaktiewe televisiediens NRK.no/NRK Interaktiv in 1994 van stapel gestuur is. In 1996 het NRK 'n staatsbeheerde aandelemaatskappy geword.

Die vermaaklikheidssentrum NRK Opplevelser is in 2003 in NRK se hoofkwartier Marienlyst in Oslo geopen. Die sentrum staan oop vir besoekers en behandel onder meer die geskiedenis van NRK in beelde en klank.

Organisasie

wysig
 
Tyholttårnet is 'n telekommunikasie- en radiotoring in Tyholt (Trondheim). Die grootste radiokanaal in Noorweë, NRK P1, het sy hoofkwartier in Tyholt. Tyholt huisves daarnaas ook die wetenskaplike redaksie van NRK wat programme soos Newton, Schrödingers katt en Verdt å vite aanbied, en die medewerkers van die jeugkanaal P3

NRK is in agt afdelings opgedeel. NRK Kringkasting beheer die uitsaai-aktiwiteite van NRK, terwyl vier afdelings vir die produksie van programme verantwoordelik is:

Daarnaas bestaan NRK uit NRK Ressurser, 'n regsafdeling en NRK se bestuur.

NRK se stasies/kanale

wysig

Radio

wysig
 
Die hoofateljee van Dagsnytt, 'n nuusbulletin (gesien vanuit die tegnikus se ateljee). Dagsnytt is die belangrikste nuusprogram van NRK se radiodiens en behels sowel die hoofbulletin asook bykomende nuusbulletins. Dagsnytt word sedert 1934 uitgesaai
 
NRK2 se ateljee 7 in Marienlyst (Oslo). NRK2 is in 1995 as die tweede televisiekanaal van NRK gestig. Dit is in 2007 tot 'n nuuskanaal omgeskep
Naam Gestig in Saai uit via
NRK P1 1933 FM/DAB/internetradio (Noors: nettradio)
NRK P2 1 September 1984 FM/DAB/nettradio
NRK P3 1993 FM/DAB/nettradio
NRK Sámi Radio 1946 FM/DAB/nettradio
NRK Alltid klassisk 1995 FM/DAB/nettradio
NRK Alltid Nyheter 1997 FM/DAB/nettradio
NRK mP3 31 Julie 2000 FM/DAB/nettradio
NRK Alltid Folkemusikk 7 September 2004 DAB[3]/nettradio
NRK P1 Oslofjord 2005 DAB/nettradio
NRK Super 12 Oktober 2006 DAB/nettradio
NRK Gull 12 Oktober 2006 DAB/nettradio
NRK Båtvær 2 Mai 2007 DAB
NRK Jazz 2 Julie 2007 DAB[4]/nettradio
NRK Sport 2 Julie 2007 DAB/nettradio
NRK Stortinget 2000 nettradio
NRK Urørt 2005 nettradio
NRK 5.1 12 Oktober 2006 nettradio
NRK Metro (gestaak) 2000 N/A
NRK Alltid Jazz (gestaak) 2000 N/A

Baie kanale word ook via digitale terrestriële televisie, satelliet en kabeltelevisie uitgesaai.

TV

wysig
Naam Sedert
NRK1 1954 (toetsprogramme), 20 Augustus 1960 (amptelik)
NRK2 1996 (3 September 2007: Omgeskep tot nuuskanaal)
NRK3 3 September 2007
NRK Super 1 Desember 2007

NRK bied daarnaas saam met MTG die sportkanaal SportN aan wat sy programme sedert 29 November 2005 uitsaai.

Internet- en selfoondienste

wysig

Die eerste internetdiens van NRK is in 1994 van stapel gestuur – destyds is die televisieprogram Rondo met Petter Nome in samewerking met Oslonett via die internet uitgesaai. Straks daarna het P2 begin om sy diens Radionettet met opnames van programme op die internet aan te bied.

Vandag pronk NRK met een van die grootste internetgebaseerde multimediadienste in Europa. NRK was ook die eerste uitsaaikorporasie wat sy televisieprogramme in 2004 in selfoonnetwerke aangebied het. Alle radioprogramme word regstreeks via die internet uitgesaai en daarna nog drie weke lank as opnames ter beskikking gestel. Daarnaas word ook bepaalde televisieprogramme regstreeks uitgesaai en as video's beskikbaar gestel.

In Januarie 2007 het NRK 'n aflewering van die speurderreeks Kodenavn Hunter op die internet beskikbaar gestel wat deur gebruikers in HDTV-gehalte afgelaai kon word.[5]

Verkeersnuus word deur NRK via WAP en internet aangebied; besonderhede aangaande vlugte, treine en die aktuele padsituasie word gereeld opgedateer. NRK se WAP-portaal is deur die Sweedse selfoontydskrif Mobil in 2006 as die wêreld se tweede beste selfoon-webwerf ná Google se soekenjin aangewys.[6]

NRK is een van min Europse uitsaaikorporasies wat hul dienste op die internet gedeeltelik met advertensies finansier. Die Noorse dagblad het op 21 April 2008 bekend gemaak dat NRK tans besig is om sy programargief op die internet beskikbaar te stel.[7]

Buitelandse dienste

wysig
 
NRK Nyheter behels alle nuusprogramme wat deur NRK se distriks- of nuusafdeling (NYDI) vir sy televisie-, radio- of internetdiens geproduseer word. Die beeld toon 'n deel van die nuusafdeling se wapark

In 1948 het NRK begin om 'n radioprogram uit te saai wat spesifiek op seemanne en Noorweërs in die buiteland gemik was. Die program het bekend gestaan as Utenlandssendingen, Sjømannssendningen of Kortbølgen. Die program het oorspronklik 'n uur, later 'n halfuur geduur en op nuusberigte uit Noorweë gekonsentreer. 'n Gewilde bestanddeel van die program was Postkassa wat twee keer per week uitgesaai is. Mense het hier die geleentheid gekry om 'n musikale boodskap aan hul familielede of vriende in die buiteland te stuur. Die diens is op 31 Desember 2002 gestaak.

Bestuurders

wysig
  • Kaare Fostervoll (1948–1962)
  • Hans Jacob Ustvedt (1962–1972)
  • Torolf Elster (1972–1981)
  • Bjartmar Gjerde (1981–1989)
  • Einar Førde (1989–2001)
  • John G. Bernander (2001–2007)
  • Hans-Tore Bjerkaas (2007–2013)
  • Thor Gjermund Eriksen (sedert 2013)

Bronliteratuur

wysig

Verwysings

wysig
  1. ↑ (no) Antall ansatte i NRK Medienorge/Inst. for informasjon- og medievitenskap, Universitetet i Bergen, besoek op 18 April 2014
  2. ↑ VG-nett om da TV'en kom til Norge
  3. ↑ Deel 'n gemeenskaplike kanaal met NRK Super. Programme word saans en snags uitgesaai.
  4. ↑ Deel 'n gemeenskaplike kanaal met P2. Programme word tussen middernag en 06.00 uitgesaai. Vanaf 21 Mai 2008 word programme via DAB dwarsdeur die dag uitgesaai. NRK.no: Jazz til alle døgnets tider (7 Mai 2008).
  5. ↑ "argiefkopie". Geargiveer vanaf die oorspronklike op 27 Oktober 2013. Besoek op 28 Mei 2008.
  6. ↑ Forbruker.no: NRK nest best i verden på WAP
  7. ↑ www.dagbladet.no: Vil åpne NRK-arkivet

Eksterne skakels

wysig
Ontsluit van "https://af.wikipedia.org/w/index.php?title=NRK&oldid=2555521"