Natalse vaalveldmuis
Die Natalse vaalveldmuis (Mastomys natalensis) is 'n knaagdier uit die geslag Mastomys wat in alle dele van Afrika suid van die Sahara voorkom, behalwe in die droë suidweste (waar die vaalveldmuis ook voorkom). Die Natalse vaalveldmuis kom oral algemeen voor, en moontlik is hy die mees wydverspreide soogdier op die Afrikavasteland. Binne hierdie verspreidingsgebied kan ses genetiese groepe onderskei word: een in Wes-Afrika, een in Sentraal-Afrika, een in Suid-Afrika en drie in Oos-Afrika.[2] Hierdie spesie bly meestal in savannes met 'n jaarlikse reënval van meer as 600 mm, maar is in alle habitats tuis, behalwe in bosse. Die dier kom ook in geboue voor en kan in 'n plaag ontaard. Hierdie diere is ook die draer van die pes, en kan die siekte aan mense oordra. Hulle is ook die belangrikste draer van die lassavirus, wat lassakoors veroorsaak.[3].
| Natalse vaalveldmuis | |
|---|---|
| |
Wetenskaplike klassifikasie 
| |
| Domein: | Eukaryota |
| Koninkryk: | Animalia |
| Filum: | Chordata |
| Klas: | Mammalia |
| Orde: | Rodentia |
| Familie: | Muridae |
| Genus: | Mastomys |
| Spesie: | M. natalensis
|
| Binomiale naam | |
| Mastomys natalensis (Smith, 1834)
| |
Die rug is grysbruin, met ligter flanke, die onderkant is donkergrys. Die pote is wit. Die stert, wat aan die bokant ietwat donkerder is as aan die onderkant, is met fyn haartjies bedek. Die wyfies het tot 12 pare tepels, vandaar die naam veeltepelmuis. Die totale lengte is 22 tot 27,5 cm, die stertlengte is 10 tot 14 cm en die massa is 47 tot 81 gram.
Die Natalse vaalveldmuis is 'n omnivoor, wat meestal sade, vrugte, gras en insekte vreet. Soms vreet die dier ook vleis. Hierdie spesie kan bitter vinnig voortplant. Die voortplanting geskied heeljaar deur, hoewel in die wintermaande 'n bietjie minder. Die draagtyd is 23 dae en die wyfies kan tot 22 kleintjies kry, maar meestal kry sy 6 tot 12. Die wyfies kan na elf weke hul eerste werpsel kry. Die diere is snags aktief en in die vrye natuur slaap hulle in neste wat hulle bou in rotssplete, onder boomwortels of omgevalle bome of in grotte.
Hulle word ook al hoe meer in gevangenskap as troeteldiere aangehou.
Verwysings
wysig- ↑ Cassola, F. (2016). "Mastomys coucha". IUCN Red List of Threatened Species. 2016: e.T12865A22425161. doi:10.2305/IUCN.UK.2016-2.RLTS.T12865A22425161.en. Besoek op 15 November 2021.
- ↑ Colangelo, Paolo; Verheyen, Erik; Leirs, Herwig; Tatard, Caroline; Denys, Christiane; Dobigny, Gauthier; Duplantier, Jean-Marc; Brouat, Carine; Granjon, Laurent; Lecompte, Emilie (2013). "A mitochondrial phylogeographic scenario for the most widespread African rodent, Mastomys natalensis". Biological Journal of the Linnean Society. 108: 901–916. doi:10.1111/bij.12013.
- ↑ "Lassa fever". www.who.int. Besoek op 13 Mei 2020.
Bronne
wysig- Apps, P. (ed.) 1997. Smithers' Mammals of Southern Africa: A Field Guide. Shrewsbury, England: Swan Hill Press, xvi+364 pp. ISBN 978-1-85310-910-2
- Musser, G.G. & Carleton, M.D. 2005. Superfamily Muroidea. Pp. 894-1531 in Wilson, D.E. & Reeder, D.M. (eds.). Mammal Species of the World: a taxonomic and geographic reference. 3rd ed. Baltimore: The Johns Hopkins University Press, 2 vols., 2142 pp. ISBN 978-0-8018-8221-0
| Hierdie artikel is in sy geheel of gedeeltelik vanuit die Nederlandse Wikipedia vertaal. |
