Nelia Engelbrecht

Nelia Engelbrecht is 'n Afrikaanse skrywer.

Lewe en werk

Nelia Engelbrecht is in Klerksdorp gebore en word ook daar groot. Sy studeer aan die Potchefstroomse Universiteit vir Christelike Hoër Onderwys (tans Noordwes-Universiteit) en verwerf in 1981 'n B.A. Kommunikasie-graad. Hierna werk sy vir verskeie publikasies as joernalis en publiseer talle berigte en artikels. Vir 'n aantal jare tree sy op as groepleier by die ATKV se Herfs-skryfskool op die Potchefstroomkampus van die Noordwes-Universiteit. Sy is getroud en haar man is 'n dosent aan dieselfde universiteit. Die egpaar het twee seuns. Sy is 'n korporatiewe skrywer en redigeerder by die universiteit se Korporatiewe Sake en Verhoudinge, waar sy verantwoordelik is vir die gedrukte kommunikasie van die universiteit.

Skryfwerk

In 1994 begin sy om fiksie te skryf. Sy fokus aanvanklik op die skryf van kortverhale en meer as sestig verhale word in vrouetydskrifte gepubliseer, terwyl sommige ook in versamelbundels opgeneem word, soos “Vuur” en “e-rupsie”. In 1994 en weer in 1997 is sy die wenner van Klerksdorp Record se Jongskrywers Kompetisie. In 1999 wen sy die tydskrif Sarie se nasionale kortverhaalwedstryd met die kortverhaal “Die binnekant van ’n pruim” en in 2001 wen sy Contentlot.com se skrywerskompetisie in die vonkfiksie-afdeling, terwyl sy derde geplaas word in die kortverhaal-afdeling. Hierna publiseer sy die liefdesromans “Die liefde van ’n leeftyd”, “Liefdesvlug” en “Die Ier se ultimatum”.

Dit is egter eers wanneer sy haar tot kinderverhale en jeugverhale wend wat sy groter sukses behaal. Sy ontvang in 2010 die Scheepersprys en die ATKV Kinderboektoekenning vir graad 8-10 vir “Pandora se boks”, nadat hierdie boek in 2009 een van die finaliste was in die Tafelberg-Sanlam-kompetisie vir jeugverhale. “Die seun met die blou hare” het vir Luna as hoofkarakter. Met sy blou hare, kennis van maantaal en 'n luislang as troeteldier is hy anders as alle ander kinders. Hy is gedurig besig om planne te bedink en as gevolg daarvan is die lewe saam met hom baie avontuurlik. In “Die vierletterwoord” moet Clarissa Mentz, 'n graad elf–leerling aan 'n dubbelmedium privaatskool, die impak van die veranderende gemeenskap en skoollewe trotseer. Sy is vir die eerste keer betrokke in 'n ernstige verhouding, wat ook nie sonder uitdagings is nie. Boonop het haar pa verdwyn en moet sy hierdie omstandighede verwerk. Hierdie aktuele boek behandel die kwessies waarmee tieners in die kontemporêre lewe te kampe het.

Publikasies

Jaar	Publikasies
2003	Die liefde van ’n leeftyd
	Liefdesvlug
2005	Die Ier se ultimatum
2007	Alicia en die Zitzappers
	Die seun met die blou hare
2008	Dieter en Madame Zenobia
2009	Pandora se boks
2013	Die vierletterwoord
2017	Die Poort reeks

Bronnelys

Internet

• LinkedIn: https://www.linkedin.com/in/nelia-engelbrecht-009b5315^{[dooie skakel]}
• Maroela Media: http://maroelamedia.co.za/afrikaans/boeke/die-vierletterwoord/
• NB-Uitgewers: http://www.nb.co.za/authors/3449 Geargiveer 7 November 2016 op Wayback Machine
• Storiewerf: http://www.storiewerf.co.za/cvs/cv_neliaengelbrecht.htm Geargiveer 13 September 2014 op Wayback Machine
• Litnet: https://www.litnet.co.za/die-poort-helers-deur-nelia-engelbrecht-n-resensie/