Niu Niu

Niu Niu (die skuilnaam of verhoognaam van Zhang Shengliang; gebore in 1997) is 'n Chinese pianis.

Niu Niu is gebore in 'n musikale familie in Xiamen in die Fujian-provinsie in China. Nadat hy op driejarige ouderdom talent getoon het, het hy sy eerste klavierlesse by sy pa ontvang. Hy het enkele weke na sy sesde verjaardag sy buiging gemaak met 'n program wat onder andere 'n Mozart-klaviersonate en Chopin-étude ingesluit het. Hy het op agtjarige ouderdom die jongste ingeskrewe student in die Shanghaise Musiekkonservatorium se 85-jarige geskiedenis geword.

Hy het sedert tienjarige ouderdom onder professor Hung-Kuan Chen studeer, aanvanklik aan die Shanghaise Musiekkonservatorium en later aan die Nieu-Engelandse Konservatorium in Boston, waarheen Niu Niu en sy gesin verhuis het. In 2014 is Niu Niu, steeds onder leiding van prof. Chen, op 'n beurs tot die Juilliard-skool in New York aanvaar. In 2018 het hy sy honneursgraad verwerf.

In 2007 het Niu Niu 'n kontrak met EMI Classics (nou Warner Classics) onderteken en die jongste pianis geword wat 'n eksklusiewe kontrak met 'n groot internasionale platemaatskappy onderteken het. Sy debuutalbum, Niu Niu Plays Mozart (2008), is gevolg deur Niu Niu plays Chopin — The Complete Études (2010) en Niu Niu Liszt Transcriptions (2012). 'n Opname van Rachmaninoff se Tweede Klavierconcerto en Rapsodie op 'n Tema deur Paganini saam met die Warskouse Filharmoniese Orkes onder leiding van die musiekdirekteur Jacek Kaspszyk in 2014 het gelei tot 'n uitnodiging om saam met die Warskouse Filharmoniese Orkes op te tree. Hy het sy sesde album, Niu Niu Portrait in 2016 uitgereik. Nadat hy in Desember 2017 'n kontrak met Universal Music Hong Kong aangegaan het, is sy eerste album vir Decca Classics (opgeneem in Berlyn) in Junie 2018 uitgereik.

Niu Niu het die 2014/'15-seisoen geopen met die uitvoering van die Dvořák-klavierconcerto saam met Jiří Bělohlávek en die Tsjeggiese Filharmoniese Orkes tydens die Dvořák-Praagfees. In Maart 2014 het hy saam met Yutaka Sado en sy Super Kids Orchestra deur die grootste konsertsale in Japan getoer. Hy het later in die somer teruggekeer met 'n bekroonde toer, en by die mees luisterryke liggings soos Tokio se Suntory-saal en Die Simfoniesaal, Osaka, gespeel. In Augustus 2016 het hy 'n toer van 16 stede in China voltooi.

Ander loopbaanhoogtepunte sluit in 'n uitnodiging na die 2007 Pearl Awards in die Royal Festival Hall in Londen, met 'n uitvoering van Sjostakowitsj se Klavierconcerto No. 1, gelei deur sy mentor Leslie Howard in die teenwoordigheid van die Prins van Wallis. In 2007 is sy uitvoering tydens die CCTV Ministerie van Kultuur-lentefeesgala landwyd uitgesaai.

In Oktober 2010 is Niu Niu in Berlyn aangewys as die wenner van die PRIX Montblanc, wat jaarliks aan opkomende klassieke instrumentaliste toegeken word. Sedertdien het hy in baie van die wêreld se luisterrykste konsertsale opgetree, waaronder Londen se Wigmore Hall, die Sjanghaise Oriental Arts Centre en Beijing se nasionale sentrum vir uitvoerende kunste (NCPA) (die jongste pianis wat by die NCPA opgetree het). Benewens sy optredes in Japan en China, het hy ook saam met die Zürichse Kamerorkes in Switserland en Frankryk getoer en konserte in Berlyn, Hamburg, Dortmund en Essen gelewer.

In 2011 het hy Rachmaninoff se Rapsodie op 'n Tema deur Paganini en Sjostakowitsj se Klavierconcerto No. 1 by die Hyogo- Uitvoerendekunstesentrum saam met Yutaka Sado opgevoer. Die volgende jaar, as eerste wenner van die Artemisiastigting, het hy sy buiging in Boston se Jordansaal en Yale-universiteit se Spraguesaal gemaak.

In 2017 het Niu Niu by vier somermusiekfeeste in Duitsland en Frankryk opgetree.

Eksterne skakels

• Niu Niu se tuisblad
• Niu Niu se biografie
• Niu Niu se repertorium