Norman Mailer

Norman Mailer (31 Januarie 1923 – 10 November 2007) was 'n naoorlogse Amerikaanse skrywer. In sy romans, verhale, essays, artikels en films gee hy in 'n groot verskeidenheid van style 'n indringende beeld van sy oorwegend negatiewe siening van die VSA.

Norman Mailer
Norman Mailer in 1948
Gebore	Norman Kingsley Mailer (1923-01-31)31 Januarie 1923 Long Branch, New Jersey
Sterf	10 November 2007 (op 84) Manhattan, New York
Nasionaliteit	Verenigde State
Alma mater	Harvard-universiteit
Beroep	Romanskrywer, essayis, joernalis, rubriekskrywer, digter, dramaturg
Eggenoot	Beatrice Silverman (1944–1952) Adele Morales (1954–1962) Lady Jeanne Campbell (1962–1963) Beverly Bentley (1963–1980) Carol Stevens (1980–1980) Barbara Davis (1980–2007)
Kinders	9, insluitende Kate, Michael, Stephen en John
Handtekening

Norman Mailer is op 31 Januarie 1923 in Long Branch, New Jersey, gebore. Hy het in Brooklyn grootgeword, in die vliegtuigboukunde aan die Universiteit van Harvard gestudeer en het tydens die Tweede Wêreldoorlog aan die Japanse front diens gedoen. Ná die sukses van sy roman The Naked and the Dead, het hy hom heeltyds op skryfwerk toegelê. Hy was 'n stigterslid van die New Yorkse ondergrondse weekblad The Village Voice en het in New York 'n stormagtige, boheemse lewe gelei. Hy het met die Amerikaanse verkiesingspolitiek gespot deur hom as kandidaat te stel vir die burgemeesterskap van New York (hy het verloor) en kritiese artikels geskryf oor omstrede gebeurtenisse tydens die presidentskap van John F. Kennedy en Lyndon B. Johnson. In 1968 het hy sy eerste films, Wild 90 en Beyond the Law, gemaak, gevolg deur Maidstone in 1970.

The Naked and the Dead (1948), die oorlogsroman waarmee Mailer sy reputasie gevestig het, word beskou as een van die beste romans oor die Tweede Wêreldoorlog. Die boek speel af op 'n Amerikaanse basis in die Stille Oseaan en analiseer ook die Amerikaanse samelewing krities. Soos Barbary Shore (1951), is The Deer Park (1955), 'n sensasionele roman oor Hollywood met boeiende portrette van die filmregisseur Eitel en die koppelaar Marion Faye, taamlik sleg deur die kritici ontvang. In 1959 het Advertisements For Myself verskyn, 'n bundel van vroeëre werke, kortverhale, fragmente van moontlike romans en enkele belangrike essays, veral "The white negro". Hierin word Mailer se opvattinge oor die skrywer as buitestaander geformuleer. An American Dream (1965) is sy swakste roman. Why are we in Vietnam? (1967) beskryf 'n berejag in Alaska: met jag en moord word 'n platevoorspeler uit Texas deur 'n siek samelewing voorberei op sy diensplig in Viëtnam.

Mailer het hom in hierdie tyd steeds meer daarop toegelê om sterk betrokke, persoonlike artikels te skryf, afgewissel met essays. Sy belangrikste essays is gebundel in The Presidential Papers (1963) en in Cannibals and Christians (1966), wat ook wetenskapfiksie bevat. Verder is dit 'n felle aanval op Women's Lib, die beweging vir die emansipasie van die vrou in die VSA. Politieke beskouinge is veral teenwoordig in The Idol and the Octopus (1968), wat die Kennedy-Johnson-periode dek. Sy beste werk op die terrein van die dokumentêre literatuur is, naas Miami and the Siege of Chicago (1968), die briljante, humoristiese en ontroerende The Armies of the Night (1968). Hierin beskryf Mailer sy ervaringe tydens die protesmars na die Pentagon teen die Amerikaanse betrokkenheid by die oorlog in Viëtnam.

Op 'n laer peil is sy digwerk wat versamel is in Deaths for the Ladies and Other Disasters (1962). Die biografiese Marilyn, wat in 1973 verskyn het, handel oor die lewe van die Amerikaanse filmaktrise Marilyn Monroe.

In Mailer se werk word die polities-betrokke intellektueel en die "hipster" wat deur die "Beat-generasie" geïnspireer is, op 'n boeiende wyse verenig.

Mailer is op 10 November, 2007, aan akute nierversaking oorlede nadat hy ’n longoperasie by die Mount Sinai Hospital in Manhattan, New York, ondergaan het. Hy is in Provincetown begrawe.

Bronnelys

• Wêreldspektrum, Vol. 17, 217, ISBN 0 908409 58 3

Eksterne skakels

• Wikimedia Commons het meer media in die kategorie Norman Mailer.
• (en) "Norman Mailer". Encyclopædia Britannica. Besoek op 9 September 2019.
• (en) Norman Mailer by Find a Grave