Norwalk-ooreenkoms

Die Norwalk-ooreenkoms verwys na 'n memorandum van verstandhouding wat in September 2002 tussen die Financial Accounting Standards Board (FASB), die liggaam wat Amerikaanse rekeningkundige standaarde uitgee, en die International Accounting Standards Board (IASB) , die liggaam wat internasionale rekeningkundige standaarde uitgee, gesluit is. Die ooreenkoms word so genoem omdat dit in Norwalk bereik is.

Deur die ooreenkoms het die VSA sy verbintenis tot die harmoniëring van Amerikaanse AARP ("GAAP", d.i. Generally Accepted Accounting Principles") met Internasionale Finansiële Verslagdoeningstandaarde bevestig.

In 'n persverklaring na die sluiting van die ooreenkoms, het Robert H. Herz, voorsitter van die FASB, gesê: "Die FASB is verbind tot wêreldwye verslagdoeningstandaarde van hoë gehalte om gesonde wêreldwye kapitaalmarkte te ondersteun".

Die ooreenkoms maak voorsiening vir 'n aantal inisiatiewe, waaronder die uitskakeling van kleiner verskille tussen Amerikaanse en internasionale standaarde, asook om die toekomstige werkprogramme van die twee liggame te belyn en om gesamentlike projekte aan te pak.