Oliewenhuis

Oliewenhuis in Bloemfontein huisves die enigste kunsmuseum in die Vrystaat.

Ligging

Die huis is geleë by 29° 5′ 52.8″ suid, 26° 12′ 50.4″ oos, in Harry Smithrylaan op Grantsheuwel in die buurt Dan Pienaar.

Versameling

Die doel van die museum is die versamel, bewaar en vertoon van kunswerke. In November 1986 is die eerste uitstalling gehou met werke van Frans Claerhout. Onder die talle kunsvoorwerpe wat te besigtig is, is die volgende die opvallendste:

• Iris Ampenberger se Portrait of a man (waterverf)
• John Thomas Baines se Bloemfontein vanaf Seinheuwel – 1851 (olieverf)
• Dorte Berner se Mother’s grief (klipbeeld)
• Enslin du Plessis se Straattoneel (olieverf)
• Maggie Laubser se Duitse meisie (olieverf)
• Hugo Naudé se Rock outcrop, Namaqua Spring (olieverf)
• Lucas Sithole se Fazini (Houtborsbeeld)
• Jan Vermeiren se Banana Picnic (litografie)
• Edoardo Villa se Torso (brons)

Huis

Hierdie neo-Kaaps-Hollandse herehuis was die Vrystaatse woning vir die goewerneur-generaal en later die staatspresident. Dit is in 1941 voltooi na ‘n ontwerp deur die argitekte William Mollison en John S. Clelland. Eers in 1972 is die naam Oliewenhuis daaraan gegee na aanleiding van die olienhoutbome in die tuin. Omdat die huis selde as huisvesting deur die staatshoof benut is, het die staat dit beskikbaar gestel en is op 11 Oktober 1989 die museum daarin geopen. Die tuin van 12 ha word vir pieknieks gebruik. Daar is verskeie wandelpaadjies.

Bibliografie

• Coetzer, J.V.: Oliewenhuis-Kunsmuseum, Bloemfontien. In: Lantern. Die Kultuurtydskrif. Jaargang 41, nr. 2, 1992
• nasmus.co.za