Omaruru

Omaruru
Omaruru
	Dorpie
	Die Sendinghuis op Omaruru, opgerig in 1890.
	Seël
	Omaruru
	Koördinate: 21°26′00″S 15°56′00″O / 21.43333°S 15.93333°O
Land	Namibië
Streek	Erongo
Distrik	Omaruru
Stigting	1871
Bevolking
• Totaal	6 300
Tydsone	UTC+2 (SAST)

Omaruru is 'n dorpie in Namibië, 70 km noord van Karibib en 220 km noordwes van Windhoek, geleë op die oewers van die boomryke en waterryke Omarururivier, naby die skouspelagtige Omarurukoppie. Dit kom van Herero vir bitter dikmelk, na aanleiding van die koeie wat sekere struikplante wat daar groei, eet. Die geskatte bevolking in 2011 was 6 300.

Geskiedenis

Die Rynse sendingstasie op Omaruru, 1873.

Die dorp het ontwikkel uit 'n stasie wat eerw. Gottlieb Viehe van die Rynse Sendinggenootskap in 1870 hier gestig het nadat Herero onder hoofman Tjiseseta omstreeks die middel van die 19de eeu hier kom vestig het. Die eerste skool is kort ná die stasie se stigting opgerig en die eerste kerk het Viehe in 1874 ingewy. In 1876 het hier reeds 42 Europeërs gewoon, maar 'n skool wat Viehe in 1870 vir hul en die bruin inwoners se kinders gestig het, het ná ses maande gesluit. Die Duitsers het 'n militêre pos in 1894 opgerig en invallers het die plaaslike fort in 1904 tydens die Herero-oorlog beleër. Die garnisoen het gesukkel om die indertydse klein dorpie te verdedig en 123 Duitse burgerlikes en soldate het gesterf voor die beleg beëindig is. Nog onder die Duitse koloniale administrasie het die dorpie in Julie 1909 munisipale status verwerf. In latere jare is goud daar naby ontdek. 'n Groot romery, die eerste wat in Suidwes-Afrika geregistreer is, is in 1928 hier geopen.

NG gemeente

Vir hoofartikel, sien NG gemeente Omaruru

Die gemeente van die NG Kerk is op 1 Maart 1941 van die gemeente Otjiwarongo afgestig met Omaruru, Karibib, Usakos, Kalkfeld, Swakopmund en Walvisbaai as hoofsentrums. Uit die gemeente het deur die jare nagenoeg ses gemeentes ontstaan, maar die lidmaattal was nooit groot nie omdat dit altyd, wat die blanke bevolking betref, 'n oorwegend Duitse gemeenskap was. By afstigting het die grense egter ongeveer 400 km van noord na suid en van oos na wes gestrek.

Besienswaardighede

Die imposante Franke-toring is in 1907 opgerig en vernoem na kaptein Victor Franke om die oorlewing van die Duitse troepe tydens die Herero-beleg te gedenk. Daar is ook 'n groot swembad en woonwapark in 'n boomryke omgewing.

Bronnelys

Raper, P.E., Dictionary of South African Place Names, Lowry Publishers, Johannesburg, 1987.
Rosenthal, Eric (red.). Ensiklopedie van Suidelike Afrika. Londen en New York: Frederick Warne & Kie Bpk.
Mayhew, Vic (red.), Illustrated Guide to Southern Africa, Reader's Digest, Kaapstad, 1980
Olivier, ds. P.L. (samesteller), Ons gemeentelike feesalbum. Kaapstad en Pretoria: N.G. Kerk-uitgewers, 1952.

Sien ook

Gereformeerde kerk Erongo