Oslo-lughawe
Oslo-lughawe (Noors: Oslo Lufthavn; IATA: OSL, ICAO: ENGM, oorspronklik bekend as Lughawe Oslo-Gardermoen) is die grootste lughawe in Noorweë wat sowat 45 km noord van Oslo in Gardermoen, 'n buurt in die munisipaliteit Ullensaker, geleë is. Die lughawe is op 8 Oktober 1998 geopen – een dag nadat Oslo se vroeëre internasionale lughawe, Fornebu in Bærum, sy deure gesluit het. Die lughawe word deur Oslo Lufthavn AS bestuur, met uitsondering van die militêre deel wat deur die Noorse Lugmag (Luftforsvaret) beheer word.
| Oslo-lughawe Oslo Lufthavn | |||
|---|---|---|---|
| |||
| |||
| IATA: OSL – ICAO: ENGM | |||
| Opsomming | |||
| Tipe lughawe | Openbaar / Militêr | ||
| Operateur | Oslo Lufthavn AS | ||
| Bedien | Oslo, Noorweë | ||
| Ligging | Gardermoen, Ullensaker | ||
| Geopen | 8 Oktober 1998 | ||
| Spil vir |
| ||
| Hoogte bo seevlak | 207,6 m / 681 vt | ||
| Koördinate | 60°12′08″N 11°05′03″E / 60.20222°N 11.08417°O | ||
| Webtuiste | |||
| Aanloopbane | |||
| Rigting | Lengte | Oppervlak | |
| m | vt | ||
| 01L/19R | 3 600 | 11 811 | Teer |
| 01R/19L | 2 950 | 9 578 | Teer |
| Statistieke (2017) | |||
| Passasiers | 27 476 000[1] | ||
| Lugbewegings | 245 000[2] | ||
Oslo-lughawe - een van die modernstes in Europa wat daarnaas deur die Association of European Airlines ook reeds vier keer as die mees stiptelike Europese lughawe aangewys is[3] - is nie net die belangrikste spilpunt vir internasionale lugverkeer na en vanaf Noorweë nie, maar met naastenby 27,5 miljoen passasiers, wat in 2017 gehanteer is, ook die tweede grootste lughawe in Noord-Europa na Kopenhagen-lughawe. In vergelyking met ander Skandinawiese lughawens het Oslo-lughawe die meeste passasiers op binnelandse vlugte gehanteer (naastenby 10,5 miljoen in 2013), terwyl dit met 12,5 miljoen internasionale passasiers in dié jaar die vierde belangrikste Noord-Europese lughawe ná Kopenhagen, Stockholm-Arlanda en Helsinki-Vantaa was.
Die lughawe dien as spilpunt vir Norwegian Air Shuttle, SAS en Widerøe. Saam met ander lugrederye bied hierdie drie lugdienste vlugte op sowat 30 binnelandse en 110 internasionale roetes. Alhoewel Oslo-lughawe se roetenetwerk tans hoofsaaklik Europese bestemmings insluit, is daar ook regstreekse vlugte na enkele Asiatiese, Noord-Afrikaanse en Noord-Amerikaanse stede aan.
Die lughawe beskik oor twee aanloop- en landingsbane met 'n lengte van respektiewelik 3 600 m en 2 950 m. Om die lughawe se kapasiteit te vergroot, is in 2011 met die bou van 'n nuwe terminaal begin. Die eerste boufase, wat Oslo-lughawe se kapasiteit tot jaarliks 28 miljoen passasiers vergroot, is in 2017 voltooi. Ná 'n verdere boufase sal die lughawe vanaf 2020 sowat 35 miljoen passasiers per jaar kan hanteer.[4]
Verwysings
wysig- ↑ statista - The Statistics Portal: Number of passengers utilising each of Norway's most popular airports from January 2013 to 2017, by airport (in 1,000). Besoek op 22 Maart 2018
- ↑ fluege.de: Flughafen Oslo-Gardermoen. Besoek op 22 Maart 2018
- ↑ International Airport Review, 13 Desember 2010: Oslo Airport – Europe’s most efficient airport. Besoek op 22 Maart 2018
- ↑ Germany Trade and Invest (GTAI), 29 Augustus 2014: Abflug in Europas hohem Norden. Besoek op 31 Augustus 2014[dooie skakel]