Otto Beit-brug

Hierdie brug moet nie met die Beitbrug verwar word nie.

Die Otto Beit-brug is ‘n brug oor die Zambezirivier by die GPS-koördinate 16°2′16.53″S 28°51′8.30″O.

Hierdie brug lê suidoos van Kafue by Chirundu in Zambië, noordwes van Makuti by Chirundu in Zimbabwe, net stroomaf van die wal van die Karibadam.

Dit is ‘n enkelbaan hangbrug van staal en 328 m lank. Cleveland Bridge and Engineering Co. van Engeland het die brug na ‘n ontwerp van die ingenieur Ralph Freeman gebou. (Freeman was ook verantwoordelik vir die Sydneyhawebrug en die Birchenoughbrug). Sir Douglas en Francis Fox was die betrokke raadgewende ingenieurs en die firma Dorman Long was verantwoordelik vir die oprigting. Die Beit Trust het die onkoste vir die projek gedra.

Op 24 Mei 1939 het lady Lilian Beit, die weduwee van die sakeman en weldoener sir Otto Beit (1865-1930), in die aanwesigheid van die goewerneurs van Noord-Rhodesië en Suid-Rhodesië die brug in gebruik gestel.

Roes aan die brug vereis aanhoudende instandhouding. Weens die ouderdom van die brug is daar ‘n beperking geplaas op die maksimum gewig van die swaargelaaide moderne vragmotors. Veral na die verskuiwing van goederevervoer van die trein na die pad was die brug ‘n knelpunt in die verkeer. Daarom is die Chirundubrug aan die stroomopkant langs die Otto Beit-brug gebou en laasgenoemde brug gesluit. Na die jaar 2000 is dit weer oopgestel vir voetgangers en ligte noordwaartsrydende motors.

Sien ook

• Kruisings oor die Zambezirivier

Bibliografie

• mindat.org
• structurae.net
• tracks4africa.co.za