Pan-Hellenistiese spele

Pan-Hellenistiese spele of Pan-Helleense spele is die oorkoepelende naam vir vier aparte sportfeeste wat in Antieke Griekeland gehou is. Die vier spele was:

Spele	God vereer	Plek	Prys	Frekwensie
Olimpiese Spele	Zeus	Olympia	Olyfkrans	Elke 4 jaar
Pitiese Spele	Apollo	Delphi	Lourierkrans	Elke 4 jaar (2 jaar ná die Olimpiese Spele)
Nemeïese Spele	Zeus, Herakles	Nemea	Selderykrans	Elke 2 jaar (2de en 4de jaar van die Olimpiade)
Istmiese Spele	Poseidon	Istmus van Korinte, Sikyon	Dennekrans	Elke 2 jaar (die jaar voor en ná die Olimpiese Spele)

Beskrywing

Die Olimpiade was een van die maniere waarop die Grieke tyd gemeet het. Die Olimpiese Spele is as beginpunt geneem; dit was jaar een van die siklus. Die Nemeïese en Istmiese Spele is albei (in verskillende maande) in jaar twee gehou, gevolg deur die Pitiese Spele in jaar drie, en dan weer die Nemeïse en Istmiese Spele in jaar vier. Die siklus het hom dan herhaal met die Olimpiese Spele. Hulle is so gehou dat individuele atlete aan al die spele kon deelneem.

Deelnemers het van oor die hele Griekse wêreld gekom, insluitende die verskeie Griekse kolonies van Klein-Asië tot Spanje. Hulle moes egter redelik welaf gewees het om vir opleiding, vervoer, woonplek en ander uitgawes te betaal. Nie vroue of nie-Grieke is toegelaat om deel te neem nie, buiten ’n paar latere uitsonderings, soos die Romeinse keiser Nero.

Die hoofgebeure op al die spele was strydwarenne, stoei, boks, voetrenne en die vyfkamp (stoei, stadionrenne, verspring, spiesgooi en skyfwerp). Buiten in die strydwarenne was al die atlete naak.

Die Olimpiese Spele is die oudste van die vier en is vermoedelik in 776 v.C. gestig. Dit is egter waarskynliker dat dit iewers in die laat 7de eeu v.C. ontstaan het. Dit het voortbestaan totdat die Christelike Romeinse keiser Theodosius dit in 393 n.C. afgeskaf het omdat hy dit as heidens beskou het. Die Pitiese, Nemeïese en Istmiese Spele het waarskynlik in die eerste of tweede kwart van die 6de eeu v.C. ontstaan.

Wenners het geen finansiële of materiële pryse gekry nie, net ’n blarekrans: ’n olyfkrans op die Olimpiese Spele, ’n lourierkrans op die Pitiese Spele, ’n selderykrans op die Nemeïese Spele en ’n dennekrans op die Istmiese Spele. Hulle het egter wel geskenke en vererings gekry wanneer hulle na hul stede teruggekeer het.

Eksterne skakels

• Hierdie artikel is vertaal uit die Engelse Wikipedia