Paquimé

Paquimé of Casas Grandes (Spaans vir "groot huise") is 'n argeologiese terrein in die deelstaat Chihuahua sowat 350 km noord van die hoofstad Chihuahua in die noorde van Meksiko. Paquimé is een van die grootste en mees komplekse terreine in die streek. Nadat die vroeë vestiging van mense na 1130 begin en die ontwikkeling van multi-verdieping huise omstreeks 1350 plaasgevind het, is die gemeenskap ongeveer in 1450 weer verlaat. Paquimé word beskou as een van die belangrikste argeologiese terreine in die noordwestelike streek, en is in 'n wye, vrugbare vallei aan die Casas Grandes of San Miguel-rivier, 35 km suid van Janos geleë. Die nedersetting het op besproeiing vertrou om sy landbou te ondersteun. Die vallei en streek is vir duisende jare deur inheemse groepe bewoon.

Argeologiese Sone van Paquimé, Casas Grandes*
Unesco-wêrelderfenisterrein
Woonkompleks in Paquimé (Casas Grandes)
Paquimé Ligging van Paquimé in Meksiko
Koördinate: 30°21′59″N 107°56′51″W
Lande	Meksiko
Tipe	Kultuur
Kriteria	iii, iv
Verwysings	560
Streek†	Noord-Amerika
Inskripsiegeskiedenis
Inskripsie	1998  (22ste Sessie)
* Naam soos dit in die Wêrelderfenislys verskyn. † Streek soos deur Unesco geklassifiseer.

Paquimé se ligging binne ander antieke kulture van Oase-Amerika

Die balspelplek in Paquimé

Paquimé was 'n voor-Spaanse nedersetting, wat die noordweste van die Sierra Madre Occidental beïnvloed het, asook die oorgrote deel van die weste van Chihuahua en sommige gebiede in die ooste van Sonora. Dit het noue kulturele bande met die argeologiese kulture van Mogollon en, verder noordwaarts, met Anasazi, wat in Arizona, Utah, Colorado en Nieu-Meksiko bestaan het, gehad, en het deel uitgemaak van die Pueblo-kultuur.

Paquimé is veral bekend vir die groot bouwerke uit adobe en tapia. Dit vorm omvangryke komplekse van aanmekaargeskakelde ruimtes, wat in al sy aspekte in die latere kulture van Mogollon en van Anasazi gevind kan word. Navorsers het bereken, dat die nedersetting 'n bevolking van sowat 3 500 gehad het, maar hul taalkundige en etniese kartering bly onbekend. 'n Duidelike verband met Meso-Amerika word deur die Balspelplekke gedemonstreer, wat ook tot diep in Arizona voorkom.

Die Argeologiese Sone van Paquimé, Casas Grandes is in 1998 deur Unesco as wêrelderfenisgebied gelys.

Galery

• 
  Erdekruik met arapapegaai-simbole
• 
  Erdekruik met 'n suidwestelike ontwerp
• 
  Mensvormige figuur
• 
  Diervormige figuur

Verdere leesstof

• (en) Charles C. Di Peso: Casas Grandes, a fallen trading center of the Gran Chichimeca. 3 Bde., Dragoon, Amerind Foundation 1974. ISBN 0-87358-056-7.
• (en) Charles C. Di Peso: Prehistory: Southern periphery in: Handbook of North American Indians, Bd. 9: Southwest. Washington, Smithsonian Institution 1978. bl. 152–177.
• (es) Arturo Guevara Sánchez: Guía oficial: Paquime y Las Cuarenta Casas. México, INAH, 1991. ISBN 968-32-0348-5.

Eksterne skakels

• Wikimedia Commons het meer media in die kategorie Paquimé.
• (en) Geskiedenis en Fotos van Paquimé