Hy is as Sergei Michailowitsj Izwekof (Сергей Михайлович Извеков) op die dorp Bogorodsk naby Moskou gebore. Hy het in 1925 ’n monnik in die Sretenski-klooster in Moskou geword en daarna verskeie jare in kloosters en katedrale in Moerom, Odessa en Pskof deurgebring. In 1954 het hy hoof van die Drie-eenheid-klooster van Sint Sergei buite Moskou geword.
In 1961 is hy aangestel as aartsbiskop van Leningrad en Ladoga en na die dood van patriarg Aleksi I in 1971 verkies tot patriarg van Moskou en die hele Rusland.
Pimen het ’n moeilike taak gehad: om die Ortodokse Kerk te lei onder die amptelik ateïstiese Kommunistiese Party. Hy het nou met die owerhede saamgewerk en aan verskeie vredeskonferensies van die regering deelgeneem. Hy het verskeie medaljes vir vrede ontvang en was van 1963 af lid van die Wêreldvredesraad. In 1988, aan die einde van sy termyn, het hy die duisendste herdenking van die kerstening van Roes' gereël.
