Pearl Harbor is 'n hawe op die eiland Oahu van die Amerikaanse deelstaat Hawaii en wes van die hoofstad Honolulu. Die naam "Pêrelhawe" is afgelei van die plaaslike pêreloesterbedryf wat hier tot laat in die 19de eeu gefloreer het.

'n Lugfoto van Pearl Harbor, met Ford Island in die middel. Die U.S.S. Arizona-monument ter herdenking aan die oorlogskip wat met 1 177 bemanningslede tydens die Japanse bomaanval in 1941 vergaan het, verskyn as 'n klein wit kolletjie aan die regterkant digby Ford Island
Die USS Arizona sink tydens die aanval

Pearl Harbor word grotendeels deur die Amerikaanse Vloot as 'n militêre diepseehawe gebruik en dien ook as die hoofbasis van die Verenigde State se Stille Oseaan Vloot. Die Keiserryk van Japan se lugaanval op Pearl Harbor op 7 Desember 1941 het die Verenigde State genoop om tot die Tweede Wêreldoorlog toe te tree.

Die Japannese aanval op 7 Desember 1941 wysig

Die Japannese Keiserlike Vloot se verrassingsaanval op die Amerikaanse Vloot in die Stille Oseaan was daarop gemik om die VSA nog voor Japan se beplande militêre optrede teen die Verenigde Koninkryk, die VSA as 'n Pasifiese seemag uit te skakel. Dit het egter daartoe gelei dat die VSA tot die Tweede Wêreldoorlog toegetree het. Twee reekse van lugaanvalle met altesaam 353 vliegtuie is vanuit ses Japannese vliegdekskepe geloods.

Die aanval het twee oorlogskepe, 'n mynlêer en twee duikbootjagters, asook 188 vliegtuie verwoes. 2 388 Amerikaanse Vlootlede het hul lewens verloor en 1 178 is gewond. 'n Aantal ander skepe is ernstig beskadig, terwyl belangrike brandstoftenks, skeepswerf- en herstelgeriewe en die hoofkwartier nie deur die aanvalle geraak is nie. Die Japanse verliese was beperk tot 29 vliegtuie en vyf duikbote, terwyl 65 weermaglede gesneuwel het of gewond is.

Twee van die groot oorlogskepe, wat tydens die bomaanval vergaan het, die USS Arizona en die USS Utah, is nooit gelig nie en ter herdenking aan die bemanningslede wat hulle lewens verloor het tot nasionale monumente verklaar. Oor die Arizona, wat tans op 'n diepte van slegs twaalf meter lê, is die spierwit USS Arizona Memorial as 'n "drywende" oorlogsgedenkteken opgerig.

Die Amerikaanse en Japannese vlote het hierna eers weer by die Slag van die Koraalsee slaags geraak gedurende Mei 1942.

Eksterne skakels wysig