Petri Jacobs

Petri Jacobs (*4 Julie 1956-) is ’n Afrikaanse jeugverhaalskrywer en digter, sy debuteer in 1986 as Petri Prinsloo met Nag van die nonnetjie-uil. Haar daaropvolgende jeuromans verskyn onder die naam Petri Jacobs. Sy dig en skryf steeds as Petri Jacobs op webwerwe soos Woes en LitNet.

Lewe en Werk

Petri Jacobs is op 4 Julie 1956 gebore. Sy matrikuleer aan die Hoërskool Erasmus op Bronkhorstspruit. Vanaf Oktober 1994 is sy die besturende direkteur van die Bougainvilla Lodge en Fig Tree Lodge in Thohoyandou in Venda, naby Louis Trichardt.

Skryfwerk

As alles anders was ’n jeugroman waarin die hoofkarakter, Henk Kruger, die soort ou is waaroor meisies droom. Hy is akademies goed, kaptein van die eerste rugbyspan en het wonderlike ouers en vriende. ’n Vreemdeling wat baie na hom lyk krap egter alles deurmekaar en hy moet leer dat deur verandering en pyn ook waardevolle lewenslesse geleer kan word. Hierdie boek is in 1992 ’n naaswenner van die ATKV Kinderboek-toekenning vir die ouderdomsgroep 13-15 jaar.

In Wanneer die musiek ophou is die hoofkarakter Jannes ’n rebel wat reeds gedruip het, alkohol misbruik en ’n seksuele verhouding met ’n ouer meisie het. Sy ouers verbied hom om verder vir sy rockgroep Kaleidoscope kitaar te speel, wat die tuisverhoudings verder versuur. Wanneer sy beste vriend verdwyn moet hy besluite neem oor lojaliteit en eerlikheid. Hierdie boek word vir skole voorgeskryf.

Verskeie van haar gedigte word gepubliseer op die webwerwe van Woes en LitNet, terwyl sy ook kortverhale in tydskrifte publiseer.

Publikasies

Jaar	Titel van publikasie
1986	Nag van die nonnetjie-uil (Petri Prinsloo)
1991	As alles anders was (Petri Jacobs)
1992	Wanneer die musiek ophou (Petri Jacobs)

Eksterne skakels

• http://www.litnet.co.za/author/petri-jacobs/
• http://www.woes.co.za/bydraers/besonderhede/petrijacobs Geargiveer 24 Mei 2020 op Wayback Machine

Verwysings

Boeke

• Wybenga, Gretel en Snyman, Maritha (reds.) Van Patrys-hulle tot Hanna Hoekom. LAPA Uitgewers Eerste uitgawe Tweede druk 2005

Internet

• Die Burger: http://m24arg02.naspers.com/argief/berigte/dieburger/1992/10/22/4/2.html^{[dooie skakel]}