Wikipedia

Pierre-sur-Haute militêre radiostasie

(Aangestuur vanaf Pierre-sur-Haute militêre radio stasie)

Die Pierre-sur-Haute militêre radiostasie is 'n 30 ha installasie wat vir Franse militêre kommunikasie gebruik word. Dit is in die Franse munisipaliteite Sauvain en Job geleë, en die grenslyn tussen die Rhône-Alpes- en Auvergne-streke loop deur die installasie. 'n Burgerlike radioherleier is ook op hierdie installasie opgerig deur die maatskappy Télédiffusion de France.[1]

Die radiostasie in Februarie 2009.

Geskiedenis

wysig

In 1913 is 'n semafoorlyn (Frans: Chappe telegraph) op die plek gebou waar die radiostasie nou staan. In daardie jare was dit 'n klein klipgebou met die semafoor bo-op.[1]

In 1961, tydens die Koue Oorlog, het NAVO die Franse Weermag gevra om die stasie te bou, om deel te vorm van die 82-punt Europese uitsendingsnetwerk wat as die ACE High stelsel bekend gestaan het.[2] In hierdie netwerk het die Pierre-sur-Haute stasie, of FLYZ, as 'n herleier tussen die Lachens (FNIZ) stasie suid daarvan, en die Mont-Août (FADZ) stasie noord daarvan gedien.[3] Die NAVO radiostasie het van Amerikaans-vervaardigde tropospreidingstoerusting gebruik gemaak om stem- en telegraafseine oor 'n netwerk uit te saai wat vanaf Turkye tot die Noorpoolsirkel in Noorweë gestrek het.[2] Die Franse lugmag het in 1974 beheer van die stasie oorgeneem.[1] In die laat 1980's is die stelsel geleidelik vervang met 'n kombinasie van nasionale verdedigingstelsels en 'n paar substelsels, wat NAVO besit.[2] Die groot paraboolantennes, wat plaaslik as Mickey se ore bekend staan, is in 1991 deur die huidige twee-antenne-stelsel vervang.[1]

Rol

wysig

Die Pierre-sur-Haute stasie word deur die Franse lugmag bestuur, en is 'n onderafdeling van die Lyon – Mont Verdun lugmagbasis, 80 km vanaf die stasie. Dit is een van die vier stasies wat langs Frankryk se Noord-Suid-as strek, en staan in konstante kommunikasie met die ander: Lacaune, Henrichemont en die Rochefort lugmagbasis.[4] Die stasie word meestal vir uitsendings gebruik wat verband hou met die bevel van operasionele weermageenhede. Indien Franse kernwapens (Force de Frappe) gebruik sou word, sou die afvuurbevel moontlik deur hierdie herleier gestuur word.[1]

Die stasie vorm sedert sy totstandkoming op 1 Junie 1994 deel van die Franse Commandement Air des Systèmes de Surveillance d’Information et de Communications (Lugbevel van Bewaking, Informasie en Kommunikasie Stelsels); vanaf 1 Januarie 2006, word dit deur die Direction Interarmées des Réseaux d'Infrastructure et des Systèmes d'Information (Gekombineerde Direktoraat van Infrastruktuurnetwerke en Informasiesisteme) bestuur.[4]

Die stasie staan onder die bevel van 'n Majoor.[1][5] Ongeveer 20 personeel is op die stasie gesetel, insluitend eletrisiëns, werktuigkundiges en kokke.[1]

Infrastruktuur

wysig
 
Betontorings wat die militêre radiotoerusting te Pierre-sur-Haute huisves

Die stasie staan op 'n 30 hektaar werf tussen die munisipaliteite Sauvain en Job, op die grens tussen die départemente Loire en Puy-de-Dôme. Die omtrek word deur 'n hoë hout-en-metaal versperring omring. Militêre personeel word per pad of met rusperspoorvoertuie daarheen vervoer. Die toegangspad is nie oop vir die publiek nie.[1]

Geboue

wysig

Daar is drie torings op die perseel. Die hoogste een is 'n 55-meter hoë siviele telekommunikasietoring, wat aan Télédiffusion de France behoort.[6] Bo-op die telekommunikasietoring is 'n radarkoepel, en binne-in is daar 'n mode S lugverkeer-beheer radarbakensisteem wat aan die algemene direktoraat vir siviele lugvaart behoort. Die radar is sedert 18 Augustus 2009 in bedryf,[7][8] maar het 'n paar keer weens swaar sneeu onklaar geraak.[9]

Die twee ander betontorings behoort aan die weermag. Die 30-meter hoë strukture[10] word sedert 1991 vir radio-uitsending en-opvangs gebruik, en is ontwerp om 'n kernontploffing te weerstaan.[1]

Van die geboue is motorhuise, en ander is woonkwartiere met kombuise, eetkamers en slaapkamers. Hulle word deur tonnels wat 400 meter beslaan aanmekaar verbind, sodat 'n mens ongedeerd deur diep sneeu van die een na die ander kan stap.[1]

Ondergrondse fasiliteite

wysig

Die mees belangrike gedeelte van die installasie is ondergronds gelëe, en word gebruik vir uitsendings teen 2 megagrepe per sekonde. Boodskappe wat deur die torings opgevang word, word ontleed en daarna vir versending aangestuur.[1]

Hierdie deel van die fasiliteit word beskerm teen chemiese, biologiese, radiologiese en kern-aanvalle. Die betonstrukture bied ook beskerming teen elektromagnetiese impulse, omdat die gewapende beton op so 'n manier gebou is dat dit 'n Faraday-hok vorm. Onder andere is die kamers ook onder positiewe lugdruk, om gevare wat deur die lug gedra word, uit te skakel. Die fasiliteit het ook onafhanklike water- en elektrisiteits-toevoer.[1]

Franse Wikipedia-artikel

wysig

In April 2013 het die radiostasie wêreldwye aandag getrek nadat 'n afdeling van die Franse departement van binnelandse sake, die intelligensie-agentskap Direction centrale du renseignement intérieur (DCRI), probeer het om 'n artikel oor die fasiliteit van die Franse Wikipedia te laat verwyder. Die Wikimedia Stigting het die intelligensie-agentskap gevra vir besonderhede oor presies watter gedeeltes van die artikel 'n probleem geskep het, en hulle ook attent gemaak daarop dat die artikel grootliks informasie weergegee het wat in 'n vryelik-beskikbare 2004 televisie-uitsending van 'n plaaslike televisiestasie (Télévision Loire 7) uitgesaai is.[11][12] Die DCRI het geweier om meer besonderhede te gee, en het sy eis dat die artikel verwyder word, herhaal. Die Wikimedia Stigting het geweier om die artikel te verwyder; daarop het die DCRI druk uitgeoefen op Rémi Mathis, 'n administrateur van die Franse Wikipedia, en 'n Franse burger, om die artikel te verwyder.[11][13] Mnr. Mathis is ook 'n werknemer van die Nasionale Biblioteek van Frankryk (Bibliothèque nationale de France, 'n staatsinstelling) en die president van die organisasie Wikimédia France. Hy het toegegee aan die eise van die DCRI.[11] Luidens 'n verklaring van Wikimédia France op 6 April 2013:

Die DCRI het 'n Wikipedia-vrywilliger op 4 April [2013] na hul kantore ontbied. Hierdie vrywilliger, wat gemagtig is om bladsye te verwyder, is in die DCRI-kantore gedwing om die artikel te verwyder, met die verstandhouding dat as hy dit nie sou doen nie, hy in aanhouding geneem sou word en vervolg sou word. Alhoewel hy vir die DCRI verduidelik dat dit nie is hoe Wikipedia werk nie, het hy geen keuse gehad as om die artikel te werwyder nie. Hy het vir die ander sisteemoperateurs gewaarsku dat as hulle die artikel weer aktief sou maak, hulle volgens die reg verantwoordelik gehou sou kon word. Hierdie vrywilliger het geen kontak met die artikel gehad nie, omdat hy dit nooit voorheen geredigeer het nie, en nie eens van die bestaan daarvan geweet het voordat hy die DCRI kantoor betree het nie. Hy is gekies omdat hy maklik geïdentifiseer kon word, omdat hy dikwels aktief is in die promosieaktiwiteite van Wikipedia- en Wikimedia-projekte in Frankryk. - Wikimédia Frankryk[14]

Die artikel is later deur 'n Wikipedia-vrywilliger, wat in Switserland woonagtig is, weer opgelaai.[14][15][16] Weens die geskil het die artikel die mees geleesde bladsy op die Franse Wikipedia geword,[17] en is meer as 120 000 keer afgelaai tydens die naweek van 6/7 April 2013.[18] Dit is ook in verskeie ander tale vertaal.[19]

Die Franse koerant 20 minutes,[20] Ars Technica,[17] en 'n Slashdot bespreking,[21] het dit as 'n voorbeeld van die Streisand-effek voorgehou. Die Franse departement van binnelandse sake het aan Agence France-Presse meegedeel dat hulle nog geen kommentaar oor die voorval wou lewer nie.[22]

Luidens 'n juridiese bron wat in 'n AFP-nuusberig van 8 April aangehaal is, is die artikel verwyder "as deel van 'n voorlopige ondersoek" wat deur die "anti-terroriste afdeling van die Paryse vervolgingskantoor" gedoen is, omrede die Franse Wikipedia-artikel "geklassifiseerde materiaal bevat wat verband hou met die afvuurbevelstruktuur van kernwapens".[23] 'n Berig in Le Point het te kenne gegee dat die artikel "vertroulike inligting bevat wat verband mag hou met die Franse kernafskrikking", byvoorbeeld "weerstand van materiale".[24]

Ná die voorval het Télévision Loire 7 gesê dat hulle verwag dat die DCRI van hulle sou vereis dat die 2004-verslag, waarop die Wikipedia-artikel gebaseer is, ook verwyder moet word, alhoewel dit met die volle samewerking van die Franse weermag verfilm is.[12] Die Nasionale unie van Polisiekomissarisse het voorgestel dat die volgende stap sou wees dat die regsbank sou vra dat Franse internetdiensverskaffers toegang tot die artikel moet sper.[24]

Die Franse nie-regeringsorganisasie Reporters Sans Frontières (Verslaggewers Sonder Grense) het die DCRI se aksies as "'n swak presedent" beskryf. Die organisasie se woordvoerder het vir Le Point genoem dat, "indien die instansie voel dat geheime verdedigingsinformasie openbaar gemaak is, het die instansie die volste reg om deur die hof erken te word, en om sy saak te stel en te verduidelik. Dit is dan die regter, die beskermheer van fundamentele vryhede, se plek om die realiteit en breedte van militêre geheimhouding te peil." Die woordvoerder het opgemerk dat die inligting wat in die artikel vervat is, uit 'n dokumentêre program kom wat voorheen met die samewerking van die weermag verfilm en versprei is, en dat diegene wat die informasie behou en verder versprei, nie verantwoordelik gehou moet word nie.[25]

Verwysings

wysig
  1. ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 Paul-Émile Liogier (reporter) (2004). La base militaire de Chalmazel (documentary) (in Frans). Télé Loire 7. Geargiveer vanaf die oorspronklike op 11 September 2012. Besoek op 5 April 2013.
  2. ↑ 2,0 2,1 2,2 Jane's Military Communications (1987), cited by Emerson, Andy (14 Desember 2003). "ACE HIGH" (in Engels). Subterranea Britannica. Geargiveer vanaf die oorspronklike op 6 Maart 2019. Besoek op 5 April 2013.
  3. ↑ "Troposcatter Communication Networks". 30 Junie 2012. Besoek op 5 April 2013. en "Das ACE High System" (in Duits). 17 Februarie 2013. Geargiveer vanaf die oorspronklike op 3 Februarie 2017. Besoek op 5 April 2013.
  4. ↑ 4,0 4,1 "Histoire succincte des "SSIC" (systèmes de surveillance, d'information et de communications) de l'armée de l'air" (in Frans). Association Nationale Air des Télécommunications et du Contrôle, France. 30 Junie 2008. Geargiveer vanaf die oorspronklike op 31 Maart 2009. Besoek op 30 Augustus 2009.
  5. ↑ In die Franse rangstruktuur, is dit 'n afkorting vir adjudant-major: 'n OR-9 onderoffisier.
  6. ↑ "Support n° 449668 situé à Pierre-sur-Haute, sur la commune de Job". Cartoradio (in Frans). Agence Nationale des Fréquences, France. Geargiveer vanaf die oorspronklike op 14 September 2018. Besoek op 9 April 2013.
  7. ↑ Info DSNA (PDF) (in French). Vol. 26. Direction des Services de la Navigation Aérienne, France. Oktober 2009. Geargiveer vanaf die oorspronklike (PDF) op 5 Oktober 2013. Besoek op 7 April 2013.{{cite book}}: AS1-onderhoud: onerkende taal (link)
  8. ↑ Info DSNA (PDF) (in Frans). Vol. 29. Direction des Services de la Navigation Aérienne, France. April 2010. Geargiveer vanaf die oorspronklike (PDF) op 4 Oktober 2013. Besoek op 7 April 2013.
  9. ↑ Boukhobza, Khalil (2012). "Influence de l'état d'un radome sur les performances d'un radar secondaire mode S" (PDF) (in Frans). ENAC, France. Geargiveer vanaf die oorspronklike (PDF) op 24 September 2015. Besoek op 7 April 2013.
  10. ↑ Daugeron, Nicolas (Maart 2009). "Établissement du Génie de Lyon BA942 : Station de Pierre sur Haute rénovation des infrastructures de l'axe Nord/Sud" (PDF). Espace, groupe SPAC (in Frans). No. 19. p. 13. Geargiveer vanaf die oorspronklike (PDF) op 10 Oktober 2010. Besoek op 7 April 2013.
  11. ↑ 11,0 11,1 11,2 Willsher, Kim (7 April 2013). "French secret service accused of censorship over Wikipedia page" (in Engels). The Guardian. Geargiveer vanaf die oorspronklike op 31 Mei 2013. Besoek op 7 April 2013.
  12. ↑ 12,0 12,1 Poncet, Guerric (9 April 2013). "Wikipédia et DCRI : la chaîne locale "s'attend" à être censurée". Le Point (in Frans). Paris. Geargiveer vanaf die oorspronklike op 7 Januarie 2018. Besoek op 9 April 2013.
  13. ↑ Kleinz, Torsten (6 April 2013). "Französischer Geheimdienst verlangt Löschung eines Wikipedia-Artikels". Heise Online (in Duits). Heise. Geargiveer vanaf die oorspronklike op 21 Junie 2019. Besoek op 5 April 2013.
  14. ↑ 14,0 14,1 “French homeland intelligence threatens a volunteer sysop to delete a Wikipedia Article”, Wikimédia France, 6 April 2013, retrieved 6 April 2013
  15. ↑ "La DCRI accusée d'avoir illégalement forcé la suppression d'un article de Wikipédia". Le Monde (in Frans). 6 April 2013. Geargiveer vanaf die oorspronklike op 25 April 2020. Besoek op 6 April 2013.
  16. ↑ Koch, Simon (9 April 2013). "Une Suissesse empêche la censure de Wikipédia". Le Matin (in Frans). Lausanne. Geargiveer vanaf die oorspronklike op 9 Oktober 2019. Besoek op 9 April 2013.
  17. ↑ 17,0 17,1 Geuss, Megan (6 April 2013). "Wikipedia editor allegedly forced by French intelligence to delete "classified" entry". Arstechnica (in Engels). Geargiveer vanaf die oorspronklike op 21 Mei 2020. Besoek op 7 April 2013.
  18. ↑ "Wikipedia article traffic statistics for 'Station hertzienne militaire de Pierre-sur-Haute'". stats.grok.se (in Engels). Geargiveer vanaf die oorspronklike op 7 Mei 2016.
  19. ↑ Lys van vertalings op Wikidata
  20. ↑ "La DCRI accusée d'avoir fait pression pour obtenir la suppression d'un article Wikipedia". 20 minutes (in Frans). 6 April 2013. Geargiveer vanaf die oorspronklike op 20 Julie 2014.
  21. ↑ saibot834 (6 April 2013). "French intelligence agency forces removal of Wikipedia entry" (in Engels). Slashdot. Geargiveer vanaf die oorspronklike op 9 Oktober 2019. Besoek op 7 April 2013.
  22. ↑ "La DCRI accusée d'avoir fait supprimer un article sur Wikipedia" (in Frans). Agence France-Presse. 6 April 2013. Geargiveer vanaf die oorspronklike op 23 Oktober 2017.
  23. ↑ CP; Huet, Anne-Claire (8 April 2013). "Le retrait de l'article Wikipedia demandé dans le cadre d'une enquête préliminaire". La Chaîne Info (in Frans). Geargiveer vanaf die oorspronklike op 8 April 2013. Besoek op 9 April 2013.
  24. ↑ 24,0 24,1 Poncet, Guerric (10 April 2013). "Un syndicat de police évoque le filtrage de Wikipédia". Le Point (in Frans). Geargiveer vanaf die oorspronklike op 11 September 2017. Besoek op 10 April 2013.
  25. ↑ Poncet, Guerric (10 April 2013). "RSF dénonce les "manoeuvres de la DCRI" contre Wikipédia". Le Point (in Frans). Geargiveer vanaf die oorspronklike op 11 September 2017. Besoek op 10 April 2013.

Eksterne skakels

wysig
Ontsluit van "https://af.wikipedia.org/w/index.php?title=Pierre-sur-Haute_militêre_radiostasie&oldid=2690994"