Rhône-Alpes

administratiewe gewes (région) van Frankryk
Rhône-Alpes

Départements Ain (01)
Ardèche (07)
Drôme (26)
Isère (38)
Loire (42)
Rhône (69)
Savoie (73)
Haute-Savoie (74)
Prefektuur Lyon
Bevolking 6 230 691 inw.
(2010)
Bevolkingsdigtheid 142,6 inw./vk km
Oppervlakte 43 698 vk km
Arrondissemente 25
Kantons 335
Munisipaliteite 2 879
President van
Gewestelike Raad
Jean-Jack Queyranne (PS)

Rhône-Alpes [ʀoːnˈalp] is 'n gewes (région) in die suidooste van Frankryk met 'n oppervlak van 43 698 vierkante kilometer en sowat 6,2 miljoen inwoners. Die prefektuur (hoofstad) van Rhône-Alpes is Lyon.

Rhône-Alpes grens in die noorde aan die région Boergondië (Frans: Bourgogne), in die weste aan Auvergne, en in die suide aan Languedoc-Roussillon en Provence-Alpes-Côte d'Azur. Daar is internasionale grense met Switserland in die noordooste en Italië in die ooste. Die gewes bestaan uit die départements Ain (01), Ardèche (07), Drôme (26), Isère (38), Loire (42), Rhône (69), Savoie (73) en Haute-Savoie (74).

Rhône-Alpes is vernoem na die Rhône en die Alpe, wat ook sy oostelike grens vorm. Dit is die tweede grootste région in Frankryk ten opsigte van sy oppervlak (net Midi-Pyrénées is groter) en sy bevolking (net Île-de-France het meer inwoners).

Die région is een van die belangrikste ekonomiese sentrums van Frankryk, wat ook met 'n vinnig groeiende toerismesektor spog. Naas sy stede soos Lyon, Annecy en Chambéry lok groot mere soos die Lac d'Annecy en Lac du Bouget en skioorde in die Alpegebied baie nasionale en internasionale toeriste. Die gewes beskik oor 'n aantal nasionale en gewestelike natuurbewaringsgebiede.

Geografie wysig

 
Die Pont d'Arc (letterlik "boogbrug") is die naturrlike poort na die Ardèche-rivier se ravyn

Rhône-Alpes word in die noorde deur die Franse régions Boergondië (Frans: Bourgogne) en Franche-Comté, in die weste deur Auvergne en in die suide deur Languedoc-Roussillon en Provence-Alpes-Côte d'Azur begrens.

Die ooste van die gebied behels die Wes-Alpe en grens aan Switserland en Italië. Die hoogste bergspits is die Mont Blanc aan die Frans-Italiaanse grens, terwyl die Meer van Genève (Frans: Lac Léman) op sowel Switserse asook Rhône-Alpes se grondgebied lê.

Die sentrale gedeelte van Rhône-Alpes behels die Rhône- en Saône-valleie. Hierdie twee riviere se samevloeiing lê naby die stad Lyon. Die Isère is Rhône-Alpes se derde belangrikste rivier.

In die weste van Rhône-Alpes begin die Sentraalmassief, 'n uitgestrekte bergreeks van Sentraal-Frankryk. Die Ardèche-rivier pronk met die diepste ravyn in Europa.

Geskiedenis wysig

Die eerste menslike nedersettings dateer reeds uit die prehistoriese tydperke, alhoewel die Keltiese Galliërs die eerste gedokumenteerde setlaars in die gebied was. Stede soos Lyon (Latyn: Lugdunum, afgelei van die Galliese god Lugh) is deur die Galliërs gestig, en die plaaslike stamme het handelsbetrekkinge met Noord- en Suid-Europa aangeknoop. Ná die Romeinse inval onder Gaius Julius Caesar is die gebied by die Romeinse Ryk ingelyf en het later deel van die provinsie Lugdunensis geword, terwyl Lugdunun tot een van die beduidendste Romeinse stede ontwikkel het.

Met die uitsondering van Savoie het die streek later tot die Merovingiese en Karolongiese koninkryke behoort en uiteindelik onder die heerskappy van die Capet-dinastie 'n koninklike gebied geword.

Demografie wysig

Rhône-Alpes is met ses miljoen inwoners na Île-de-France ten opsigte van sy bevolking die tweede grootste administratiewe gewes van Frankryk.

Lyon vorm met sy voorstede die derde grootste stedelike agglomerasie in die land met 'n bevolking van meer as 1,3 miljoen. Ander groot agglomerasies in Rhône-Alpes het rondom Grenoble (die twaalfde grootste in Frankryk met sowat 427 000 inwoners) en Saint-Étienne (die 18de grootste met 292 000 inwoners) ontstaan. Annemasse en ander stede in die noord-ooste maak deel uit van die Switsers-Franse agglomerasie rondom Genève met meer as 106 000 inwoners in die Franse gedeelte.

Die groter metropolitaanse gebiede (Frans: aires urbaines) rondom die drie grootste stede Lyon (1,6 miljoen inwoners), Grenoble (514 000 inwoners) en Saint-Étienne (321 000 inwoners) behels naastenby die helfte van Rhône-Alpes se bevolking. Daarenteen is die ooste met die Hoog-Alpe en die suidelike dele van Rhône-Alpes yl bevolk.

Die administratiewe geweste van Frankryk (Régions de France)  
Metropolitaanse geweste (Régions métropolitaines):
Akwitanië | Auvergne | Boergondië | Bretagne | Centre-Val de Loire | Champagne-Ardenne | Elsas | Franche-Comté | Île-de-France | Korsika | Languedoc-Roussillon | Limousin | Lotaringe | Midi-Pyrénées | Nord-Pas-de-Calais | Basse-Normandie | Haute-Normandie | Pays de la Loire | Pikardië | Poitou-Charentes | Provence-Alpes-Côte d'Azur | Rhône-Alpes
Metropolitaanse geweste 2016 (Régions métropolitaines):
Auvergne-Rhône-Alpes | Boergondië-Franche-Comté | Bretagne | Centre-Val de Loire | Grand Est | Hauts-de-France | Île-de-France | Korsika | Nieu-Akwitanië | Normandië | Oksitanië | Pays de la Loire | Provence-Alpes-Côte d'Azur
Oorsese geweste (Régions d’outre-mer):
Frans-Guyana | Guadeloupe | Martinique | Mayotte | Réunion