Plantkundegebou UP

Die Plantkundegebou op die Hatfieldkampus van die Universiteit van Pretoria is 'n siersteengebou met elemente van Hollandse Baksteenmodernisme. Dit was ontwerp deur die argitekte Gerard Moerdyk en H. Watson in samewerking met prof B. Elbrecht van die Department Plantkunde. Die hoeksteen is op 10 April 1940 gelê en konstruksie is later daardie jaar voltooi. Soos studentegetalle toegeneem het, was dit later nodig om ’n bykomende vleuel aan te bou. Die nuwe gedeelte was deur J. Mazureik ontwerp, en is in 1959 gebou. Die gebou huisves die Departement Plantkunde en die Manie van der Schijff Botaniese Tuin maak deel uit van die landskap rondom die gebou. Die tuin beslaan sowat drie en ’n half hektaar en bevat meer as 3 000 plantspesies, insluitend ’n volledige versameling van Afrikabroodbome. ’n Groot kweekhuis is in 1956 opgerig.