Pretoria Botaniese Tuin

Die Pretoria Nasionale Botaniese Tuin is bekend om sy inheemse sowel as uitheemse plante.

Broodboomtuin in die Pretoriase Botaniese Tuin.

Plaket van die stigter, dr. R.A. Dyer.

Hierdie “groen long” lê in die area Brummeria aan die oostekant van Pretoria. Die tuin is 76 ha groot, en is in 1984 vir die publiek oopgestel, alhoewel die tuin reeds sedert 1946 ontwikkel word op 'n terrein wat by die Universiteit van Pretoria oorgeneem is. Die tuin huisves ook die hoofkantoor van die Suid-Afrikaanse Nasionale Biodiversiteitsinstituut (SANBI) en die Nasionale Herbarium.

Groot versamelings vygies, broodbome en medisinale plante is hier te besigtig. Onder die unieke en bedreigde plante staan die vetplantversameling uit wat van Madagaskar afkomstig is. Die park is die tuiste van verskeie spesies reptiele en klein soogdiere, sowel as 200 voëlsoorte. Verskeie geplaveide wandelpaadjies is dwarsdeur die park aangelê.

'n 35 m hoë kwartsiet-dagsoom verdeel die tuin van wes na oos in twee dele: 'n koeler suidelike kant en 'n duidelik warmer noordelike deel. Dit skep twee unieke wêrelde vir botanici en belangstellende besoekers.

Bibliografie

• www.gauteng.net
• www.sanbi.org

Eksterne skakels

• Wikimedia Commons het meer media in die kategorie Pretoria Botaniese Tuin.