Ralambo
Ralambo was van 1575 tot 1612 die heerser van die Koninkryk Imerina op die sentrale plato van Madagaskar. Hy het van die heuwel Ambohidrabiby af regeer en sy pa, Andriamanelo, se ryk uitgebrei. Hy het eerste die naam Imerina aan die streek gegee.
| Ralambo | |
|---|---|
| Koning van Imerina | |
| Regeer | c. 1575-1612 |
| Dinastie | Hova |
| Voorganger | Andriamanelo |
| Opvolger | Andrianjaka |
| Gebore | Alasora |
| Oorlede | c. 1612; Ambohidrabiby |
| Eggenotes | Rafotsitohina Ratsitohinina Rafotsiramarohavina Rafotsindrindra |
| Kinders | 12 seuns |
| Vader | Andriamanelo |
| Moeder | Randapavola |
Bewind
wysigOorlewering skryf talle legendes aan dié koning toe, onder meer verskeie dramatiese militêre oorwinnings, en dit het bygedra tot sy heroïese en byna mitiese status. Die omstandighede om sy geboorte, op die gelukkige eerste dag van die jaar, is glo bonatuurlik en dit dra verder by tot sy mistieke kultus.
Oorlewering verbind hom met verskeie belangrike en blywende politieke en kulturele innoverings. Hy kry die lof dat hy die eet van beesvleis in die koninkryk gewild gemaak het en die nuwejaarsfees fandroana ingestel het om dit te vier – dit vind dus op sy geboortedag plaas. Volgens legende is besnydenis en poligamie ook tydens sy bewind ingestel, asook die verdeling van die adellikes (andriana) in vier sub-kastes en die tradisie van koninklike idole (sampy) in Imerina. Ralambo het glo algemeen van hierdie bonatuurlike voorwerpe gebruik gemaak om sy ryk uit te brei en die geloof in die goddelike aard van sy heerskappy te versterk.
Vanweë die blywende kulturele nalatenskap van hierdie koning word hy dikwels beskou as ’n sleutelfiguur in die ontwikkeling van die Merina se kulturele identiteit.
Dood en opvolging
wysigRalambo het vermoedelik omstreeks 1612 gesterf. Hy is in die tradisionele steengraf van sy oupa, koning Rabiby, begrawe wat steeds op die dorp Ambohidrabiby te sien is.[1] Volgens ’n bron uit die 19de eeu is daar ’n jaar lank oor hom gerou. Hy is glo in die nag begrawe en ’n koninklike mausoleum (trano masina) is oor sy graf gebou – ’n koninklike Merina-tradisie wat sou voortduur tot die val van die Koninkryk Madagaskar in die 19de eeu.[2] Die reëls van opvolging wat deur sy pa, Andriamanelo, neergelê is, het Ralambo genoop om nie sy oudste seun by sy tweede vrou as sy opvolger aan te wys nie, maar sy jonger seun Andrianjaka by sy eerste vrou, Rafotsindrindramanjaka.[3]
Verwysings
wysig- ↑ Madatana. "Colline d'Ambohidrabiby" (in Frans). Geargiveer vanaf die oorspronklike op 24 Mei 2020. Besoek op 4 Oktober 2010.
- ↑ Kent, R.K. (1968). "Madagascar and Africa II: The Sakalava, Maroserana, Dady and Tromba before 1700". The Journal of African History. 9 (4): 517–546. doi:10.1017/S0021853700009026.
{{cite journal}}: Ongeldige|ref=harv(hulp) - ↑ Buyers, Christopher. "The Merina (or Hova) Dynasty: Imerina 2" (in Portugees). Geargiveer vanaf die oorspronklike op 23 November 2019. Besoek op 8 Oktober 2010.
Eksterne skakels
wysig
Hierdie artikel is vertaal uit die Engelse Wikipedia
