Rashied Staggie
Rashied Staggie (Mei 1956[1] - 13 Desember 2019) was 'n Suid-Afrikaanse misdadiger en 'n stigterslid en leier van die Hard Livings-bende.[2]
In 2003 is Rashied Staggie tronk toe nadat hy skuldig bevind is aan die verkragting van 'n 17-jarige meisie wat as staatsgetuie teen hom getuig het.[3] Staggie is tot 15 jaar gevonnis vir ontvoering en verkragting.[3] In 2004 is hy skuldig bevind aan huisbraak deur die Faure-polisie en tot 13 jaar gevangenisstraf gevonnis. Die twee vonnisse is gelyktydig uitgedien.[3] In Mei 2013 het die Wes-Kaapse departement van korrektiewe dienste aangekondig dat Staggie einde September 2013 op parool vrygelaat sal word weens goeie gedrag.[4]
Vroeë lewe
wysigRashied is in 1956 in Mooirivier in Kaapstad gebore. Die Groepsgebiedewet het bruin mense forseer om uit sogenaamde blank gebiede na 'n minder wenslike deel van die stad te verskuif. Die Kaapse Vlakte het 'n plek geword waar meer as 'n miljoen ontheemde bruin en swart mense verskuif is. Rashied se familie is na Manenberg verskuif, in armoede en sonder toegang tot behoorlike infrastruktuur en dienste. As gevolg van die druk van hierdie armoede en die "harde lewe", het Rashied en sy broer Rashaad misdaad en bendebedrywighede vir oorlewing gebruik. Na 1994 het hy in Boston, Bellville, in die Wes-Kaap van Suid-Afrika gebly.
Kriminele loopbaan
wysigToe die tweeling tieners was, was hulle aktiewe dwelmsmokkelaars en kon hulle geld verdien. Namate hulle ouer geword het, het hulle meer aggressief en invloedryker geword in die onderwêreld van Kaapstad. Teen die negentigerjare was die tweeling berugte bendeleiers, en hul bende, die Hard Livings, het lede dwarsoor die Kaapse Skiereiland gewerf. Die Hard Livings-bende het deelgeneem aan 'n reeks misdade soos gewapende roof, geweerhandel en dwelmverspreiding. Die Hard Livings het botsings gehad met mededingende bendes, die Americans en die Mongrols. Onder die bewind van Rashied Staggie het die Hard Livings aan gewelddadige bendeoorloë deelgeneem wat gelei het tot 'n bloedbad in die strate van Kaapstad.
Dood
wysigStaggie is op 13 Desember 2019 buite sy huis in Londonweg in Soutrivier, Kaapstad, geskiet[2] – in dieselfde straat waarin sy tweelingbroer, Rashaad, in 1996 dood is nadat hy geskiet en aan die brand gesteek is deur lede van die vigilante-groep PAGAD.[5] Staggie is na die Groote Schuur-hospitaal geneem waar hy aan sy wonde beswyk het.[2]
Die vermeende leier van die Hard Livings-bende, Tauriq "Ballie Tips" Solomons, is die vorige dag in Westridge in Mitchells Plain, Kaapstad, doodgeskiet.[6]
Daar was gerugte dat Staggie se seun, Abdullah Taliep Boonzaier, ook doodgeskiet is, maar dit is deur die familie ontken. Op 13 Desember 2019, toe die Wes-Kaapse polisie gekontak word vir kommentaar, het die SAPD gesê die Wes-Kaapse kantoor het geen rekord van die skietvoorval waarin Staggie dood is nie.[7]
Verwysings
wysig- ↑ Baadjies, Megan (26 April 2016). "'Whisky was for Staggie's 60th birthday bash'". IOL. Geargiveer vanaf die oorspronklike op 13 Desember 2019. Besoek op 13 Desember 2019.
- ↑ 2,0 2,1 2,2 "Rashied Staggie in dieselfde straat as broer vermoor". Maroela Media. 13 Desember 2019. Geargiveer vanaf die oorspronklike op 17 Februarie 2020. Besoek op 13 Desember 2019.
- ↑ 3,0 3,1 3,2 Payne, Suné (13 Desember 2019). "Newsflash: Cape Town gang leader shot dead – Rashied Staggie's violent end". Daily Maverick (in Engels). Geargiveer vanaf die oorspronklike op 2 Januarie 2020. Besoek op 13 Desember 2019.
- ↑ "Staggie granted day parole" (in Engels). South African Press Association. 21 Mei 2013. Geargiveer vanaf die oorspronklike op 24 September 2015. Besoek op 22 Mei 2013.
- ↑ Ellis, Estelle (14 November 2000). "Drug dealer shot and set on fire by vigilantes" (in Engels). Independent Newspapers (South Africa). Geargiveer vanaf die oorspronklike op 24 September 2015. Besoek op 16 Desember 2011.
- ↑ Oorlog dreig ná vermeende bendebaas se skietdood. Netwerk24 (12 Desember 2019). URL besoek op 13 Desember 2019. Intekening nodig.
- ↑ "Has Rashied Staggie's son also been targeted in Hard Livings hits?". IOL News (in Engels). 13 Desember 2019. Geargiveer vanaf die oorspronklike op 14 Desember 2019. Besoek op 13 Desember 2019.
