Robert Wagner
Robert John Wagner jr. (gebore op 10 Februarie 1930) is ’n Amerikaanse akteur en rolprentvervaardiger.
| Robert Wagner | |
| |
Wagner in 1967.
| |
| Geboortenaam | Robert John Wagner jr. |
|---|---|
| Geboorte | 10 Februarie 1930 |
| Nasionaliteit | Amerikaans |
| Beroep(e) | Akteur, vervaardiger |
| Aktiewe jare | 1950–tans |
| Internet-rolprentdatabasis-profiel | |
Loopbaan
wysigHy het sy rolprentdebuut in 1950 in The Happy Years gemaak. Hy het rolle gehad in onder meer Stars and Stripes Forever (1952), Titanic (1953), Beneath the 12-Mile Reef (1953), Prince Valiant (1954) en White Feather (1955). In 1956 was hy in A Kiss Before Dying, Between Heaven and Hell en The Mountain.
Teen die begin van die 1970's was Wagner se televisieloopbaan op sy hoogtepunt. Hy is die bekendste vir sy rolle in die reekse It Takes a Thief (1968–'70), Switch (1975–'78) en Hart to Hart (1979–'84), waarin sy vrou, Natalie Wood, ook ’n klein kameerol in die loodsepisode gehad het. Hy was ook dikwels te sien as Teddy Leopold in die sitkom Two and a Half Men en as Anthony DiNozzo sr. in NCIS.
In rolprente was Wagner veral bekend vir sy rol as Number Two in die Austin Powers-trilogie (1997, 1999, 2002), wat ’n oplewing in sy rolprentloopbaan teweeggebring het, asook A Kiss Before Dying (1956), The Pink Panther (1963), Harper (1966) en The Towering Inferno (1974). Hy was in 2007 in die komedie/rilfliek Netherbeast Incorporated; die rol is geskryf met hom in gedagte.
Wagner se outobiografie, Pieces of My Heart: A Life saam met Scott Eyman, is op 23 September 2008 uitgereik.
Persoonlike lewe
wysig
In sy memoires onthul Wagner hy het affairs gehad met Yvonne de Carlo, Joan Crawford, Elizabeth Taylor, Anita Ekberg, Shirley Anne Field en Joan Collins.[1] Hy het ’n romantiese verhouding van vier jaar met Barbara Stanwyck gehad nadat hulle saam in Titanic (1953) was – hy was 22 en sy 45. Hulle het die verhouding stilgehou sodat dit nie hul loopbane sou skade berokken nie.[2]
Op 28 Desember 1957 is Wagner met die 19-jarige Natalie Wood getroud. hulle is in April 1962 geskei en ná ’n huwelik met ander lewensmaats is hulle in Julie 1972 weer getroud.
Op 29 November 1981 het Wood verdrink tydens die maak van haar laaste rolprent, Brainstorm, terwyl sy saam met Wagner en haar medester in Brainstorm Christopher Walken op ’n naweekvaart na Santa Catalina-eiland, Kalifornië, was. Baie feite oor haar dood is onbekend omdat niemand erken het dat hulle haar net voor haar dood gesien het nie. Wood se lyk is op die oggend van 29 November 1981 ’n ent van die boot af gekry. Volgens Wagner was Wood nie in hul bed toe hy gaan slaap het nie.[3] Die lykskouingsverslag het gemeld Wood het kneusmerke aan haar lyf en arms gehad, sowel as ’n skaafwond aan haar linkerwang.[4]
Later, in sy outobiografie, het Wagner erken hulle het ’n rusie gehad voor sy verdwyn het.[4] Volgens die lykskouingsverslag was Wood se alkoholinhoud 0,14% en spore van twee soorte medikasie is in haar bloed gevind: ’n pil teen bewegingsiekte en ’n pynpil wat die uitwerking van alkohol verhoog.[5] Daar is bevind haar dood was ’n ongeluk;[6] sy het waarskynlik gegly en in die water geval.[4]
Die saak is in November 2011 heropen nadat die kaptein van die boot, Dennis Davern, in die openbaar gesê het hy het tydens die nadoodse ondersoek vir die polisie gejok en dat die paartjie die aand baklei het; hy het beweer Wagner was vir haar dood verantwoordelik.[4][7][8]
Ná ’n ondersoek van nege maande het die mediese hoofondersoeker van Los Angeles die doodsertifikaat aangepas van "verdrinking deur ’n ongeluk" tot "verdrinking en ander onbepaalde faktore".[9] Die aangepaste dokument sluit ’n verklaring in dat die omstandighede waaronder Wood in die water beland het, "nie duidelik vasgestel is nie". Wagner het enige aandeel in Wood se dood ontken.[10]
Verwysings
wysig- ↑ Robert Wagner with Scott Eyman, Pieces of My Heart: A Life (HarperCollins, 2009)
- ↑ Friedman, Roger (2 Augustus 2002). "Robert Wagner on Natalie Wood, 'Tadpoling' and Survival". Fox News (in Engels). Geargiveer vanaf die oorspronklike op 24 Mei 2013.
- ↑ Winton, Richard (9 Julie 2012). "Natalie Wood death probe yields more unanswered questions" (in Engels). Los Angeles Times. Geargiveer vanaf die oorspronklike op 20 Mei 2020.
- ↑ 4,0 4,1 4,2 4,3 "Natalie Wood's death certificate amended". BBC News (in Engels). 22 Augustus 2012. Geargiveer vanaf die oorspronklike op 22 Mei 2019. Besoek op 22 Augustus 2012.
- ↑ Finstad 2001, p. 433.
- ↑ Noguchi & DiMona 1983.
- ↑ "Captain: Wagner responsible for Natalie Wood death" (in Engels). TODAY.com. 18 November 2011. Geargiveer vanaf die oorspronklike op 29 November 2014. Besoek op 23 Mei 2014.
- ↑ "Natalie Wood Death: New Audio Recordings Indicate Robert Wagner's Involvement". The Huffington Post. 14 September 2012. Besoek op 17 September 2012.
- ↑ McCartney, Anthony (21 Augustus 2012). "Authorities amend Natalie Wood's death certificate". Associated Press (in Engels). Geargiveer vanaf die oorspronklike op 25 Mei 2019. Besoek op 22 Augustus 2012.
- ↑ "Shocking New Theory In Natalie Wood Death -- Who REALLY Killed Her". Radar Online (in Engels). Radar Online, LLC. Geargiveer vanaf die oorspronklike op 23 November 2017. Besoek op 3 Januarie 2016.
Verdere leesstof
wysig- Wagner, Robert (2008). Pieces of My Heart: A Life. New York: Harper Collins. ISBN 978-0-06-137331-2.
Eksterne skakels
wysig- Amptelike webtuiste
- Robert Wagner in die Internet-rolprentdatabasis
Wikimedia Commons het meer media in die kategorie Robert Wagner.
Hierdie artikel is vertaal uit die Engelse Wikipedia
