Snofroe
Snofroe (ook Sneferoe of Snefroe) was ’n Egiptiese farao en die stigter van die 4de Dinastie tydens ’n tydperk bekend as die Ou Ryk. Hy is ook bekend onder sy Hellenistiese naam, Soris (deur Manetho). Ramings van die lengte van sy bewind verskil; The Oxford History of Ancient Egypt reken sy bewind was van omstreeks 2613 tot 2589 v.C.,[3] dus 24 jaar, maar volgens ander was dit 30 jaar[4] of 48 jaar.[5]
| Snofroe | |||||||||||||||||||||||||||||||||||||||||||||||||||||||
| Sneferoe, Snefroe, Seneferoe, Soris | |||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||
| ’n Kalksteenstandbeeld van Snofroe (Egiptiese Museum). | |||||||||||||||||||||||||||||||||||||||||||||||||||||||
| Farao van die 4de Dinastie | |||||||||||||||||||||||||||||||||||||||||||||||||||||||
| Periode | 24, 30 of 48 jaar,[1] omstreeks 2600 v.C. | ||||||||||||||||||||||||||||||||||||||||||||||||||||||
| Voorganger | Hoeni[2] | ||||||||||||||||||||||||||||||||||||||||||||||||||||||
| Opvolger | Choefoe | ||||||||||||||||||||||||||||||||||||||||||||||||||||||
| Moeder | Meresanch I | ||||||||||||||||||||||||||||||||||||||||||||||||||||||
| Monumente | Meidoem-piramide, Geboë Piramide, Rooi Piramide | ||||||||||||||||||||||||||||||||||||||||||||||||||||||
| Snofroe in Egiptiese hiërogliewe | |||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||
Hy het minstens drie piramides laat bou wat vandag nog staan en het groot veranderings ingevoer vir die ontwerp en bou van die piramides van Antieke Egipte.
Familie en opvolging wysig
Snofroe was die eerste koning van die 4de Dinastie van Antieke Egipte en het volgens Manetho 24 jaar lank regeer (2613-2589 v.C.).
Manetho was ’n Egiptiese priester wat in die 3de eeu v.C. geleef het. Hy het die farao's van Egipte in 31 dinastieë ingedeel.[6] Sy skema het tekortkominge, maar moderne geleerdes volg steeds hierdie groepering. Die Papyrus Prisse, ’n bron uit die Middelryk, steun die feit dat Hoeni die voorganger van Snofroe was.[7] Uit dié teks leer ons ook dat hy ’n "liefdadige" heerser was. Dit is onseker of Hoeni Snofroe se pa was, maar volgens ’n bron was sy ma dalk ’n vrou met die naam Meresanch.[8] Hetepheres I was Snofroe se hoofvrou en die ma van Choefoe, of Cheops,[9] die bouer van die Groot Piramide van Giza.
Bouprojekte wysig
Die bekendste piramides uit Snofroe se bewind is die drie by Dahsjoer: die Geboë, Rooi en Meidoem-piramide. Daar was ’n groot evolusie van piramidestrukture in sy tyd, wat sou lei tot die Groot Piramide van Choefoe wat beskou word as die hoogtepunt van Antieke Egiptiese glans en grootsheid. Dit is ook een van die Sewe Wonders van die Antieke Wêreld.
Die eerste van Snofroe se monumente was die Meidoem-piramide. Daar is egter nie volkome sekerheid of hy dit laat bou het nie, en sommige geleerdes meen dit was Hoeni se werk. Die piramide is nieteenstaande ’n besonderse voorbeeld van die vooruitgang in tegnologie en ideologie wat die koning se grafkelder betref.
Dit is ’n bewys van die oorgang van trappiramides na die "ware", gladde piramidestrukture. Dit is aanvanklik ontwerp as ’n piramide met sewe trappe soortgelyk aan dié van Djoser by Saqqara. Later is ’n kalksteenafwerking bygevoeg wat die piramide sy gladde voorkoms gegee het.[10] Dit het dieselfde binnestruktuur as vorige piramides, met die uitsondering dat die grafkelder in die hoofstruktuur, dus naby die grond, is pleks van onder die grond.[11]
Die Geboë of Stomp Piramide is ’n teken van nog groter argitektoniese innovering. Soos die naam aandui, verander die inklinasiehoek van 55° tot sowat 43° in die boonste vlakke van die piramide. Dit is moontlik dat dit nie aanvanklik so beplan is nie, maar dat dit tydens konstruksie aangepas is by onstabiele lae.[12] Die binnekant lyk ook anders as dié van vorige piramides. Daar is twee ingange, een aan die noorde- en een aan die westekant. Die ondergrondse kamers is volgens J.P Lepre ook baie groter en dit was in dié tyd die grootste piramide.[13]
Hoewel ’n mens aanvanklik teleurgesteld is in die Rooi Piramide omdat dit geen van die argitektoniese kompleksiteite van die ander twee bevat nie, is Lepre daarvan oortuig dat daar geheime kamers is wat nog ontdek moet word. Aangesien die farao se liggaam nog nie gevind is nie, is dit moontlik dat dit iewers in dié geheimsinnige struktuur lê.
Die eerste koning van die 4de Dinastie het ’n uitdagende presedent geskep vir sy opvolgers, en net Choefoe se Groot Piramide kan daarby kers vashou. Later het piramides al hoe kleiner geword en dis met swakker kalksteen gebou. Dit kan wees omdat die Egiptenare se aanbidding verskuif het van die koning na die songod, Ra.[14]
Buitelandse betrekkinge wysig
Om sulke groot bouprojekte te kon aanpak, sou Snofroe ’n groot werkmag en voorraad materiaal moes opbou. Volgens Guillemette Andreu is dit waar die koning se buitelandse betrekkinge ’n groot rol gespeel het. Hy het groot dele van Libië en Nubië verower om twee redes: om baie mense te kry wat kon bou en om die roumateriaal te kry wat hy nodig gehad het.[14] Volgens ’n inskripsie in die Palermo-stene het Snofroe mense in ander lande gevange geneem en by sy werksmag gevoeg. Hy het in dié twee lande ook beslag op beeste gelê om die werkers te voed.
Hy het ook groot hoeveelhede sederhout ingevoer, moontlik van Libanon, en daar is tekens van ekspedisies om turkoois te myn op die Sinai-skiereiland.[15]
Verwysings wysig
- ↑ Thomas Schneider: Lexikon der Pharaonen. Albatros, Düsseldorf 2002, ISBN 3-491-96053-3, page 278–279
- ↑ A. Dodson & D. Hilton, The Complete Royal Families of Ancient Egypt, Thames and Hudson Ltd: Londen, 2004.
- ↑ Jaromir Malek in The Oxford History of Ancient Egypt, p.87
- ↑ Krauss, R. (1996). "The length of Sneferu's reign and how long it took to build the 'Red Pyramid'". Journal of Egyptian Archaeology. 82: 43–50. JSTOR 3822113.
- ↑ Rainer Stadelmann: Beiträge zur Geschichte des Alten Reiches: Die Länge der Regierung des Snofru. In: Mitteilungen des Deutschen Archäologischen Institutes Kairo (MDAIK), Vol. 43. von Zabern, Mainz 1987, ISSN 0342-1279, p. 229–240.
- ↑ An Introduction to the Archaeology of Ancient Egypt, pg. 36
- ↑ The Instructions of Kagemni, Papyrus Prisse
- ↑ The Complete Royal Families of Ancient Egypt, pg. 51
- ↑ The Complete Royal Families of Ancient Egypt, pg. 57
- ↑ An Introduction to the Archaeology of Ancient Egypt, pg.134
- ↑ The Egyptian Pyramids... pg. 51
- ↑ An Introduction to the Archaeology of Ancient Egypt, pg.135
- ↑ The Egyptian Pyramids... pg. 53
- ↑ 14,0 14,1 An Introduction to the Archaeology of Ancient Egypt, pg. 144
- ↑ The Complete Royal Families, Pg. 50
Eksterne skakels wysig
- The Instruction of Kagemni. Geargiveer 13 Oktober 2008 op Wayback Machine Ancient Egyptian Books of Wisdom. 16 November 2008
- Budge, Wallis. The Literature of the Ancient Egyptians. The Project Gutenberg. 16 November 2008
Wikimedia Commons het meer media in die kategorie Snofroe.
Hierdie artikel is vertaal uit die Engelse Wikipedia
