SS Lusitania

Die SS Lusitania was 'n Portugese passasierskip wat op 18 April 1911 by Kaappunt in Suid-Afrika op die rotse geloop het. Omdat die wrak op 'n diepte van byna 40 m lê, is dit 'n gewilde uitdaging vir ervare duikers.

Die SS Lusitania

Konstruksie

Die stoomskip van 5 557 ton met 'n staalromp en twee skroewe is in 1906 deur Sir Raylton Dixon & Co gebou vir Empreza Nacional de Navogacas van Lissabon. Dit was een van die grootste Portugese skepe van sy tyd.

Stranding

Op 15 April 1911 het die skip die hawe van Lourenco Marques (vandag Maputo) verlaat op pad na Lissabon. Aan boord was 800 passasiers en bemanning onder bevel van kapt. Faria. In 'n kalm see, maar weens digte mis en 'n sterk seestroom, tref die skip om middernag van 18 April die Bellowsrots op 'n afstand van maar net 4 km van die vuurtoring.

Slegs 8 opvarendes het die ramp nie oorleef nie. Enkele dae later het die Lusitania van die Bellowsrots afgegly en in die diepte verdwyn. Die wrak is 'n gewilde skubaduikplek, alhoewel teen 33 to 40 meter 'n bietje diep vir die meeste sportduikers.

Kaart van die wrakligging van die SS Lusitania

Die gevolg van hierdie skeepsramp was die bou van die aansienlik laer Kaappuntvuurtoring (Kaap Maclear).

Kyk ook

• Lusitania (skip), 1915
• Skeepsrampe aan die Suid-Afrikaanse kus

Bronne

• Burman, Jose: Strange shipwrecks of the southern seas. Kaapstad: Struik, 1968.
• Turner, Malcolm: Shipwrecks and salvage in South Africa – 1505 to the present. Kaapstad: Struik, 1988. ISBN 0-86977-387-9

Eksterne skakels

• Wikimedia Commons het meer media in die kategorie SS Lusitania.
• Toerisme-inligting oor Skuba-duik op die SS Lusitania-wrak op Wikivoyage