Samora Machelbrug
Die Samora Machelbrug is ‘n brug oor die Zambezirivier. Dit is ‘n belangrike skakel tussen die noordelike en suidelike dele van Mosambiek.
Ligging wysig
Die brug is by 16° 9′ 19″ suid en 33° 35′ 37″ oos, by die stad Tete op die suidelike rivieroewer op die A103-pad noordwaarts na Moatize. ‘n 120km stroomop van die brug is die Cahora Bassa-dam, 5km stroomaf die Kassuende-brug, 230km stroomaf die Dona Anabrug en 280km stroomaf die Armando Emilio Guebuzabrug. Hierdie roete verbind die hawestad Beira en Zimbabwe met die noordelike dele van Mosambiek sowel as Malawi en Zambië.
Doel wysig
Die bou van die brug was onderdeel van die wyer plan rondom die bou van die Cahora Bassa-dam. ‘n Padnetwerk tussen Kaapstad en Kenia is in die vooruitsig gestel om streke met groot ekonomiese moontlikhede wat betref landbou, veeteelt en mynbou beter toegang tot markte en hawens te gee.
Brug wysig
Hierdie hangbrug is ontwerp deur die Portugese ingenieur Edgar Cardoso en tussen Maart 1968 en 1973 deur die firma Empreiteiros de Moçambique gebou. Toe kom na 50 jaar die vervoer met ‘n pont oor die rivier ten einde. Die brug hang aan vier paar torings en bestaan uit 3 oorspannings van 180m elk en 2 oorspannings van 90m elk. Dit is 762m lank en 11.2m breed, waarvan 7.2m vir die motorpad gebruik word en 4m vir twee voetpaaie van elk 2m breed. Vir geruime tyd was dit die enigste brug oor die Zambezi in Mosambiek. Tydens die bou van die Cahora Bassadam het swaar voertuie die brug baie gebruik en het die brug swaar gely. Daarby het die Mosambiekse burgeroorlog noodsaaklike instandhoudingswerk agterweë laat bly. Sedert die begin van die 21ste eeu is slegs een baan van die brug in gebruik. Net een vragmotor op ‘n keer is op die brug toegelaat en dan ook met ‘n maksimum spoed van 10k.p.u. In Januarie 2011 is ingrypende herstelwerk voltooi en sedert die ingebruikneming van die Kassuende-brug in 2014 is die brug vir swaar voertuie gesluit.
Naam wysig
Aanvanklik was die brug bekend as die Marcello Caetanobrug. Marcello José das Neves Alves Caetano (17 Augustus 1906 – 26 Oktober 1980) was van 1968 tot 1974 die premier van Portugal. Dit is later herdoop om Samora Machel te herdenk.
Sien ook wysig
Bibliografie wysig
- hpip.org
- structurae.net