Dona Anabrug
 | |
| Amptelike naam | Ponte Dona Ana |
|---|---|
| Oorspan | Zambezirivier |
| Ligging | Vila de Sena en Mutarara in Mosambiek |
| Ontwerp | Edgar Cardoso |
| Langste spanwydte | 33 van 80 m elk 7 van 50 m elk |
| Totale lengte | 3 670 m |
| Koördinate | 17°26′21″S 35°03′41″E / 17.43917°S 35.06139°O |
Die Dona Anabrug is ‘n brug oor die Zambezirivier in Mosambiek. Dit is deel van die spoornetwerk in Oos-Afrika en gee aan Malawi toegang tot ‘n hawe by die see.
Ligging
wysigDie brug lê afgeleë. Dit verbind Vila de Sena (soms Senna) op die suidelike oewer van die Zambesi in die Sofala-provinsie met Mutarara op die noordoewer in die Tete-provinsie. Dit is by die koördinate 17° 26′ 21″ suid en 35° 3′ 41″ oos. Vanaf die Beirahawe loop die spoorlyn noordwaarts en by Mutarara swaai ‘n tak noordwes na die steenkoolvelde by Moatize. Noordwaarts gaan die ander tak verder na Nsanje aan die Shirerivier, Blantyre en die gebied om die Malawimeer.
Brug
wysigDie staalbrug is 3,67 km lank en bestaan uit 33 oorspannings van 80 m elk en 7 oorspannings van 50 m elk. Nadat skeepsverkeer op die Shirerivier en die Zambesi en die gebruik van ‘n pont allerhande probleme veroorsaak het, het die Portugese koloniale owerheid tussen 1930 en 1934 hierdie spoorbrug geskik vir treine op Kaapspoor, laat bou. Dit is ontwerp deur Edgar Cardoso, gebou deur die firma Cleveland Bridge & Engineering van Darlington in Engeland en opgerig deur G.A. Hodson. Op daardie stadium was dit een van die langste spoorbrûe in die wêreld en die langste spoorbrug in Afrika.
Latere verloop
wysigTydens die Mosambiekse burgeroorlog in die 1980’s is die brug deur RENAMO ernstig beskadig. Met Amerikaanse finansiële steun is die brug in 1995 herstel en omskep in ‘n enkelbaanpadbrug. In Oktober 2006 is dit egter vir alle verkeer gesluit en is ingrypende herstelwerk onderneem. Na die ingebruikname van die nuwe Armando Emilio Guebuza-brug stroomaf by Caia is die brug in Mei 2009 weer vir treinverkeer geopen en as padbrug gesluit. Na opgradering van die voetgangerlaan aan die brug in 2017 word dit daagliks deur ‘n 3000 stappers gebruik.
Ander brûe
wysigDie Zambesi word deur weinig brûe oorkruis. Die bekendstes is die Kazungulabrug, Victoria-watervalbrug, Chirundubrug, Otto Beit-brug, pad oor die wal van die Karibadam, Samora Machelbrug, Kassuende-brug en die Armando Emilio Guabuza-brug.