Samsung Groep

(Aangestuur vanaf Samsung)

Samsung (Koreaans: Drie Sterre) is die grootste konglomeraat (Koreaans: Chaebeol) in Suid-Korea, wat met sy meer as 489 000 werknemers ten opsigte van omset (meer as 305 miljard VSA-dollar in 2014) tans die grootste onderneming in die inligtingstegnologiebedryf is. Volgens sy markwaarde (meer as 77 miljard VSA-dollar in laat 2005) het dit ook tot die vyf grootste ondernemings ter wêreld behoort, met dogtermaatskappye in 58 lande.

Samsung Groep
Samseung Geurup
삼성그룹


Tipe Konglomeraat
Gestig 1938
Hoofkantoor Samsung Town, SeoelRepubliek van Korea
SleutelpersoneLee Kun-hee (voorsitter en hoof uitvoerende beampte)
Lee Soo-bin (president, hoof uitvoerende beampte van Samsung Life Insurance)
Gebied bedienwêreldwyd
IndustrieKonglomeraat
ProdukteVerbruikerselektronika, skeepsbou, telekommunikasie, siviele ingenieurswese en boubedryf, chemiese produkte, kleinhandel, kleding
DiensteFinansiële en geneeskundige dienste
Inkomste305 miljard VSA-$ (2014)
Netto inkomste22,1 miljard VSA-$
Werknemers320 671 (2017)[1]
Dogter-
maatskappye
Samsung Electronics
Samsung Life Insurance
Samsung Fire & Marine Insurance
Samsung Heavy Industries
Samsung C&T
Samsung SDS
Samsung Techwin en ander
Webwerfsamsung.com

Samsung Electronics, die grootste vervaardiger van televisietoestelle en selfone ter wêreld, is die vlagskiponderneming van Samsung Groep. Volgens beramings van die Amerikaanse marknavorsingsonderneming Gartner het Samsung Electronics in 2017 sowat 321 miljoen selfone verkoop.[2]

Samsung betaal in Suid-Korea meer as 46 miljard ZAR belasting (sowat agt persent van die staatsinkomste) en lewer met al sy dogtermaatskappye sowat 'n vyfde van die land se uitvoere op. Die onderneming oefen sodoende beslissende invloed op Suid-Korea se ekonomiese ontwikkeling, politiek, mediabedryf en kulturele lewe uit. Samsung was een van die drywende kragte agter die sogenaamde "Wonder aan die Hanrivier", die uitvoergerigte ekonomiese beleid wat van Suid-Korea binne enkele dekades ná die Korea-oorlog (1950-1953) een van die mees gevorderde nywerheidslande ter wêreld gemaak het.

Samsung het van 'n beskeie begin as klein handelsonderneming in die voedselbedryf, wat in 1938 gestig is, tot een van die belangrikste globale maatskappye gegroei, met sakebelange wat van hoëtegnologie en halfgeleiers, petrochemiese nywerhede, die vervaardiging van geneesmiddels, mode, finansies en die hotelbedryf tot die bou van wolkekrabbers en nywerheidsaanlegte strek.[3] Die huidige voorsitter van Samsung is Lee Kun-hee. Samsung se inkomste in 2019 is $305 miljard, in 2020 is $107+ miljard, en in 2021 is dit $236 miljard.

Naamsimboliek wysig

Die naam Samsung is uit twee komponente saamgestel: die Koreaanse woord vir "drie" (uitgespreek as /sam/) as sinoniem vir "groot" en "magtig" en die woord vir "ster" (uitgespreek as /sung/) wat "ewige lig" versinnebeeld. In die Koreaanse Hanja-alfabet, waarin Sjinese skriftekens met Koreaanse uitspraak gebruik word, word dit gespel as 三星.

Geskiedenis wysig

Die onderneming is op 1 Maart 1938 deur Lee Byung-chull as 'n kruidenierswinkel en klein handelsonderneming in die stad Daegu gestig. Die onderneming het in Daegu en sy omgewing handel in goedere soos noedels, gedroogde vis, vrugte en ander plaaslike landbouprodukte gedryf. Van die produkte is na China uitgevoer.

Ná die Koreaanse Oorlog het die maatskappy sy bedrywighede uitgebrei na die tekstiel- en boubedryf asook voedselverwerking. Dit het die eerste industriële koringmeul en suikersuiweringsfabriek in Korea opgerig wat tot die land se grootste voedselvervaardiger gegroei het. Ook die wolmeul, wat deur die onderneming bedryf is, was destyds die grootste in die land.[4]

 
Die hoofkwartier van Samsung Groep in Samsung Town, 'n sakekompleks in Seoel

Met sy filiaal Samsung Electronics, wat in 1969 gestig is, het Samsung ook elektroniese verbruikersware begin vervaardig. Teen die tagtigerjare was Samsung Electronics 'n tyd lank die grootste vervaardiger van draagbare televisiestelle. In hierdie tydperk het die Suid-Koreaanse regering Samsung aangemoedig om halfgeleiers te ontwikkel.

Ander afdelings van Samsung sluit masjienbou, motors (Hyundai), assuransies, groothandel, eiendomme en vermaak in. Die Munhwa-uitsaaikorporasie, wat in die sewentigerjare die land se grootste private televisiestasie beheer het, is as gevolg van politieke druk aan die staat verkoop.

As gevolg van die ekonomiese krisis in Asië het Samsung in die negentigerjare talle bedrywighede gestaak en 'n aantal dogtermaatskappye verkoop om sy kapitaalbasis te verhoog. Tegelykertyd het Samsung begin om hom op sy kernbedrywighede toe te spits. Samsung Electronics is tans die belangrikste tak van die konglomeraat. Minder bekend op die internasionale markte is Samsung se assuransies, swaar nywerhede en skeepsbou, chemiese nywerhede en Samsung Renault Automobile, 'n koöperasie met die Franse motorvervaardiger Renault.

In 2017 is die Amerikaanse vervaardiger van oudio- en videotoerusting Harman International Industries deur Samsung oorgeneem.[5]

Borgskappe wysig

Samsung beskik oor sy eie sportspan in Suid-Korea, "Samsung Khan".

Samsung in Suid-Afrika wysig

Samsung Electronics het sy internasionale bedrywighede in 1991 ook na Suid-Afrika uitgebrei. Aanvanklik het die onderneming sy produkte onder die naam Etron aangebied, en in April 1995 is die naam gewysig na Samsung Electronics South Africa. Samsung se beleggings in die land beloop 32 miljoen VSA-dollar (231 miljoen ZAR). 'n Bykomende tien miljoen VSA-dollar (72 miljoen ZAR) is deur die Suid-Koreaanse hoofkwartier aan plaaslike reklame-aktiwiteite bestee. Die onderneming spits hom in Suid-Afrika veral op selfone, televisietoestelle, Blu-ray- en DVD-spelers, mikrogolfoonde en koelkaste toe.

Dogtermaatskappye van Samsung wysig

 
Tabletrekenaar Galaxy Tab S2 9.7
Samsung Electronics

Boubedryf wysig

  • Samsung Engineering & Construction

Chemie wysig

  • Samsung Total Petrochemicals
  • Samsung Petrochemicals
  • Samsung BP Chemicals
  • Samsung Fine Chemicals
  • Cheil Industries

Elektroniese nywerhede wysig

  • Samsung Electronics
  • Samsung Electro-Mechanics
  • Samsung SDI
  • Samsung Corning
  • Samsung SDS
  • Samsung Networks
  • Samsung Corning Precision Glass
  • Samsung Mobile

Masjienbou en swaarnywerhede wysig

  • Samsung Heavy Industries
  • Samsung Techwin

Finansiële dienste wysig

  • Samsung Life Insurance
  • Samsung Fire & Marine Insurance
  • Samsung Card
  • Samsung Securities
  • Samsung Investment Trust Management
  • Samsung Venture Investment
  • Samsung Corporation

Vermaaklikheidsbedryf wysig

  • Suwon Samsung Bluewings
  • Samsung Everland
  • Samsung Lions
  • Samsung Khan

Ander wysig

  • Samsung Economic Research Institute
  • Cheil Communications
  • S-1
  • Renault Samsung Motors

Verwysings wysig

Eksterne skakels wysig