Wikipedia

Shailene Woodley

Amerikaanse aktrise en vervaardiger

Shailene Woodley (gebore 15 November 1991) is 'n Amerikaanse aktrise en vervaardiger. Sy is bekend vir haar rolle in die rolprente The Descendants (2011), The Fault in Our Stars (2014), Divergent (2014), en Insurgent (2015). Sy is ook 'n omgewingsaktivis en bekend vir haar groen en natuurlike leefstyl.

Shailene Woodley
'n Beeld van die betrokke persoonlikheid.
Geboortenaam Shailene Diann Woodley
Geboorte 15 November 1991 (1991-11-15) (33 jaar oud)
San Bernardino, Kalifornië, VSA
Nasionaliteit Amerikaner
Ouers Lonnie Woodley en Lori Victor
Beroep(e) Aktrise en vervaardiger
Aktiewe jare 1999–nou
Rolprente The Descendants, Divergent-trilogie, Fault in Our Stars
Internet-rolprentdatabasis-profiel

Biografie

wysig

Shailene Woodley is op 15 November 1991 in San Bernardino, Kalifornië in die VSA gebore.[1] Haar pa, Lonnie, is van Britse afkoms en was 'n skoolhoof, maar word later 'n sielkundige. Haar ma, Lori, (die dogter van Stephan David Victor en Diana Lynn Fauria) is 'n skooladviseur en ook medestigter van haar en Woodley se nie-winsgewende organisasie, All it Takes.[2] Woodley het 'n jonger broer, Tanner Stephan, en hulle groei op in Simi-vallei, wat minder as 100 km van Los Angeles af geleë is.[3] Die feit dat haar ouers gereeld hulle huis oopgestel het vir slagoffers van huishoudelike geweld, was soms moeilik vir haar. Ten spyte daarvan dat haar ouers geskei is toe sy 'n tienermeisie was, vertel sy in 'n onderhoud dat sy net goeie herinneringe aan haar kindertyd het, want daar was altyd voedsel, ouerliefde en haar ouers het hul bes gedoen om vir haar en haar broer die beste moontlik te gee.[4]

Op vyftienjarige ouderdom word sy met skoliose gediagnoseer, 'n toestand waar die ruggraat 'n sywaartse kurwe het, nadat 'n vriendin langs die swembad opgemerk het dat haar ruggraat vreemd lyk. Sy word genoodsaak om 'n plastiese rugstut wat vanaf haar bors tot by haar heupe strek, vir twee jaar, en agtien ure per dag, te dra.[5]

Eerste rolle

wysig

Vanaf die ouderdom van vier doen sy modelleerwerk. Toe sy vyf jaar oud is, begin sy klasse in toneelspel neem by Anthony Meindl,[6] nadat 'n vrou haar ma genader het met die voorstel dat die jonge Woodley ingeskryf word vir klasse, omdat sy haar raakgesien het terwyl Woodley en haar ma gewag het dat 'n familielid se oudisie vir 'n handelsflits, afgehandel word. Haar ma het nog geaarsel, maar Woodley was baie opgewonde daaroor.[7]

Sy verskyn vir die eerste keer as agtjarige in 'n klein rolletjie in die televisierolprent, Replacing Dad (1999), waarna talle ander klein televisierolle in onder andere, The District en Crossing Jordan volg. Haar talent besorg haar in 2004 die hoofrol in 'n televisierolprent: A Place Called Home, en sy word genomineer vir die Jong Kunstenaarstoekenning as Beste Jong Hoofrolaktrise in 'n Televisierolprent, Mini-reeks of Spesiale Uitsending.

Haar gewildheid as 'n kinderaktrise neem toe wanneer sy die rol van die jong Kaitlin Cooper in die eerste seisoen (2003) van die tiener-dramareeks, The O.C., vertolk. Sy kry die hoofrol in die televisierolprent, Felicity: An American Girl Adventure (2005) as Felicity Merriman wat haar nog 'n Jong Kunstenaarstoekenning-nominasie, dié keer vir Beste Spel in 'n Televisierolprent, Mini-reeks of Spesiale Uitsending (Komedie of Drama) besorg.

Sy verskyn in talle gasrolle in ander televisie-reekse, onder andere: Everybody Loves Raymond, My Name Is Earl, CSI: NY, Close To Home en Cold Case.[8]

Hierna trek sy aandag met haar hoofrol in die ABC Gesinsreeks: The Secret Life Of The American Teenager (2008-2013) as Amy Juergens. Ken Tucker van 'n maandelikse Amerikaanse vermaaklikheidstydskrif, Entertainment Weekly, prys haar vertolking van Amy, deur te sê dat: "dit 'n goedbedoelde, brawe maar lamlendige reeks 'n hupstoot gee".[9]

The Descendants

wysig

Dis egter met haar rolprent-debuut in die 2011-rolprent, The Descendants, teenoor onder andere George Clooney waar sy naam begin maak het. Sy speel die rol van Alex, die moeilike tienerdogter van Matt King (gespeel deur Clooney) en word vir meer as twintig toekennings, waaronder 'n Golden Globe vir Beste aktrise in 'n Ondersteunende Rol, genomineer, waarvan sy meer as sewe wen.[10]

Aldus New York Times-resensent, A. O. Scott, lewer sy een van die taaiste, knapste en mees geloofwaardigste jongmens-vertonings in onlangse geskiedenis,[11] terwyl Peter Debruge, van die Variety-tydskrif in New York, sê dat sy haar rol as Alex skerp sowel as met die nodige diepte wat die rol vereis, vertolk.[12] Bekende plaaslike resensent, Leon van Nierop, skryf dat sy die aandag boei onder leiding van regisseur Alexander Payne en in haar rol teenoor Clooney, ook dat sy 'n sukses is wat wag om te gebeur met haar "unieke, pragtige en rustige gesig en hipnotiese oë wat lyk asof sy alles van jou weet".[13]

George Clooney was heel verras deur die bedrewendheid waarmee Woodley die duiktoneel, wat wys waartoe sy as aktrise in staat is om haar karakter geloofwaardig en eg te maak, vertolk het. In 'n onderhoud vertel hy dat hoewel hy saam met sommige wonderlike akteurs en aktrises op die stel van The Descendants gewerk het, Woodley vir hom uitgestaan het as baie professioneel. Tydens die eerste toneel wat hulle saam geskiet het, waar sy karakter aan Woodley se karakter moes vertel dat haar siek ma nie beter gaan word nie, terwyl sy in die swembad was, het sy onder die water ingeduik en begin huil. Clooney vertel dat hy nog nooit so iets beleef het nie en dat hy aan Woodley gesê het dat ongeag hoe die rolprent ontvang gaan word, sy nooit oor haar loopbaan bekommerd hoef te wees nie.[14] Volgens Woodley het haar interpretasie van die teks, wat net aangedui het dat sy onder die water moes induik terwyl haar gesig vertrek, natuurlik gekom omdat dit is wat mens in die werklikheid sal doen as mens sulke nuus ontvang.[15]

The Spectacular Now

wysig

Vir haar hoofrol in haar volgende rolprent: The Spectacular Now (2013), die rolprent-weergawe van Tim Thorpe se gelyknamige roman, vertolk sy die rol van 'n onskuldige, boekwurm-tiener, Aimee Finecky, wat met die sjarmante en populêre, Sutter Keely (Miles Teller), begin uitgaan en wen sy 'n Cannes Trophée Chopard en word ook genomineer vir 'n Golden Globe Toekenning vir Beste byspeelster in 'n Rolprent.[16]

Haar geloofwaardige en eerlike vertolking van Aimee beïndruk resensente: Die Los Angeles Times se Betsy Sharkey prys haar en Teller, omdat hulle emosies soos onder andere pyn, vriendskap, onverskilligheid en eerste liefde so opreg en geloofwaardig weergee.[17] Aldus Leon van Nierop, kry Woodley en Teller die geleentheid om uit te blink in dié rolprent.[18]

Toe Woodley voorgestel het dat sy Aimee as 'n sterk, selfstandige jong vrou moet uitbeeld, anders voel sy dat sy nie die regte keuse vir die rol is nie, het die regisseur, James Ponsoldt ingestem. Woodley wou ook so min as moontlik van grimering en haarstilering gebruik maak.[19]

White Bird in a Blizzard

wysig

In die rolprent, 'White Bird in a Blizzard', wat alreeds in 2012 verfilm is, maar eers in Oktober 2014 vrygestel is, speel Woodley 'n tiener, Katrina "Kat" Connors, wie se wêreld in duie stort toe haar ma verdwyn. Hoewel die resensies vir die rolprent meestal negatief is, word sy steeds geloof vir haar vertolking. Volgens Brian Tallerico van die webtuiste, Rogerebert.com, verander sy, soos gewoonlik, die rolprent in 'n werklikheid met haar natuurlike in-die-oomblik persoonlikheid wat die kyker geïnteresseerd hou, hoewel die storielyn verveel.[20]

Divergent-trilogie

wysig

In die wetenskaps-fiksie trilogie: Divergent (2014), Insurgent (2015) en Allegiant (2016), wat gebaseer is op Veronica Roth se boeke met dieselfde titels, speel Woodley die rol van Beatrice "Tris" Prior, 'n jong meisie wie se persoonlikheid "uiteenlopend" toets en in meer as een van die groepe waarin die samelewing verdeel is in 'n toekomstige Chicago kan pas, en daarom sal haar lewe in gevaar wees as die antagoniste dit sou uitvind omdat sulke mense nie maklik onder verstandelike beheer geplaas kan word nie.

In 'n onderhoud vertel die regisseur van Divergent, Neil Burger, dat hy Woodley in The Descendants gesien het en dadelik aan haar gedink het in die rol van Tris toe hy die draaiboek begin lees het en sy was dan ook die enigste aktrise wat 'n oudisie vir die rol van Tris afgelê het.[21] Sy was egter bang vir die roem en gebrek aan privaatheid wat noodwendig sou volg op so 'n groot projek, die grootste wat sy nog aangepak het. Jennifer Lawrence (wat deel was van soortgelyke projekte) het haar egter aangeraai om die rol te aanvaar as die karakter haar interesseer. In 'n onderhoud vertel Woodley dat dit die verhouding tussen die karakters, Tris en Four (Theo James), was wat haar in die eerste plek aangetrek het: "Een van die hoofaspekte wat my aangetrek het na Divergent was hulle verhouding. Dis nie een van daardie dramatiese tienerverhoudings waar dit liefde met die eerste oogopslag is nie. . . dit voel vir my baie eg en baie persoonlik en realisties soos baie verhoudings is."[22]

Sy het dit aan die begin moeilik gevind om die gevegstoneel in Divergent teenoor Miles Teller te speel, omdat hulle goeie vriende is, maar soos die verfilming gevorder het, het dit makliker geraak om aggressief op te tree. Sy het etlike dae lank wapenopleiding by 'n sekuriteitsgroep ontvang vir haar rol en ook vir 'n paar weke fisiese opleiding saam met die res van die rolverdeling.[23] Sy het ook meeste van haar eie waagtoertjies gedoen, en is só een keer per ongeluk deur 'n trein op die stel van Divergent voortgesleep nadat sy geval het.[24] Waar Tris egter van 'n meer as 20m-hoë gebou moes afspring in dieselfde rolprent het Woodley nie kans gesien nie en 'n dubbelganger, Alicia Vela-Bailey, is gebruik. Laasgenoemde vertel dat dit 'n plesier was om saam met Woodley te werk en dat sy dierbaar en wonderlik is.[25]

Die eerste twee rolprente is redelik goed ontvang, en was beide 'n finansiële sukses maar na die derde rolprent se swak vertoning is die maak van die vierde rolprent opgeskort en daar is oorweeg om dit in 'n televisiereeks te verander, maar Woodley was nie daarin geïnteresseerd nie, hoewel sy geneë is om 'n verdere rolprent te doen aangesien sy geteken het om die volle verhaal van Tris te vertolk. Nadat van die ander rolverdeling ook geweier het om deel te wees van 'n televisiereeks, is die idee laat vaar.[26]

Leon van Nierop loof Divergent as mensliker, meer gekarakteriseerd en makliker om te verstaan as The Hunger Games.[27] Die vervaardiger, Sallas de Jager, voel dat Allegiant met die "stralende" Woodley en "hartebreker" Theo James baie suksesvoller as die gelyknamige roman van Roth is.[28] Sam Allard van Orlando Weekly prys Woodley se vertolking in Divergent deur te sê dat sy 'n rolprent wat 'n volslae mislukking kon gewees het, red en ophef.[29] Susan Wloszczyna van die webwerf RogerEbert.com skryf dat sy dit byna alleen regkry om hierdie rolprente daarvan te weerhou om ook deel te wees van die opgewonde nagmerrie-rolprente. Baie resensente loof onder andere Woodley en James se vertolkings in Insurgent en Daniel M. Kimmel skryf vir New England Movies Weekly dat Woodley soos gewoonlik 'n bestendige vertolking lewer en steeds iemand bly om dop te hou.[30]

Sy is vir 'n paar toekennings benoem en het vir die eerste twee rolprente elk drie toekennings[31] [32] en vir Allegiant een gewen,[33] waarvan sy sommige met mede-akteur, Theo James, deel.

In 'n latere onderhoud onthul sy dat siek was terwyl sy besig was met die trilogie, dat sy gesukkel het met 'n moeilike en vreesaanjaende fisiese toestand en daarom baie geleenthede van die hand gewys het.[34]

The Fault in Our Stars

wysig

Sy ontvang wye erkenning en meer as vyf toekennings vir haar hoofrol as 'n tiener-kankerpasiënt, Hazel Grace Lancaster, in die romantiese drama, The Fault in Our Stars (2014), wat op John Green se 2012-roman gebaseer is. Sy speel teenoor Ansel Elgort wat in Divergent haar broer gespeel het. Vir haar rol van Hazel Grace het Woodley haar lang hare kort geknip en moes sy die spiere wat sy tydens Divergent gebou het, weer verloor. Die regisseur, Josh Boone, sê dat daar omtrent 150 aktrises vir die oudisie was, waarvan hy omtrent 50 gesien het. Aanvanklik het Boone nie gedink dat Woodley die regte persoon vir die rol was nie omdat sy lank, sterk, atleties en fiks is. Hy het saam met haar middagete in Chicago gaan nuttig, maar hoewel hy baie van haar gehou het, was hy steeds nie tevrede nie. Die volgende môre egter met haar oudisie het hy binne die eerste vyftien sekondes van haar oudisie geweet dat sy Hazel Grace gaan wees. Sy het haar manuskrip regop gehou en net haar oë het bo-oor gekyk. Sy was nie haarself nie, maar Hazel Grace toe sy binne gegaan het.[35]

Snowden

wysig

In die 2016-rolprent, Snowden, wat handel oor die ware verhaal van Edward Snowden, speel sy die rol van Lindsay Mills, teenoor Joseph Gordon-Levitt wat Edward Snowden speel. Dit ontvang gemengde resensies, en volgens Brian Tallerico van die webwerf, RogerEbert.com, was daar nie die regte vonk tussen Woodley en Gordon-Levitt nie, hoewel beide hulle beste gelewer het met die tonele.[36]

Endings, Beginnings

wysig

In Endings, Beginnings (2019) is Woodley se karakter, Daphne, vasgevang tussen twee verhoudings. Dié rolprent verskil grootliks van die meeste rolprente waarin Woodley verskyn het. Wat die rolprent nog meer uniek maak, is dat dit nie 'n tradisionele teks gehad het nie. In plaas daarvan het die skrywer en regiseur, Drake Doremus, kortliks die hoofpunte van die storielyn gegee en die spelers toegelaat om self die teks te improviseer, 'n ervaring wat Woodley aangegryp het. Hoewel die rolprent net gemiddelde resensies ontvang[37], dweep baie resensente haar spel in dié rolprent. [38].

Adrift

wysig

Die 2018-rolprent, Adrift, is gebaseer op die lewensverhaal van Tami Oldham en haar verloofde, Richard Sharp. Woodley, wat die rol van Oldham vertolk en ook 'n vervaardiger van die rolprent is, en Sam Claflin, wat die rol van Sharp vertolk (wat eers deur Miles Teller gespeel sou word, maar wat hy van die hand moes wys weens sy skedule wat sou bots) [39] gaan in die jaar 1983 op 'n avontuurlike tog met 'n seilboot op die Stille Oseaan, maar vaar ontwetend in een van die mees noodlottigste orkane in opgetekende geskiedenis vas, waartydens Sharp oorboord gespoel word en waarna Oldham vir een-en-veertig dae op die seilboot moet oorleef. Woodley loop byna die rol mis toe die manuskrip sonder haar medewete per e-pos aan haar gestuur word die dag met haar arrestasie op 10 Oktober 2016 [40] weens haar deelname as aktivis in 'n vreedsame protes teen die Dakota toegangs-oliepyplyn. 'n Maand later vra haar agente aan haar of sy die broers, Aaron en Jordan Kandell ken en dat hulle verneem of sy al die teks gelees het wat hulle geskryf het, wanneer sy besef haar Hawaii-vriende se teks moes verlore geraak het. The Telegraph berig dat sy dié manuskripte kies wat haar prikkel en uitdaag. In die onderhoud vertel sy dat dié wat haar skoenlappers op die maag gee, haar aantrek, en 'Adrift' was een van húlle. [41]. Vir haar rol van Tami Oldham, wat die ruwe omstandighede van die Stille Oseaan moet verduur, het Woodley saam met 'n Fidjiaanse persoonlike afrigter geoefen om fisies, emosioneel en geestelik voor te berei, aangesien sy haar eie waagtoertjies gedoen het.[42] "Ek het baie geswem. Ek het ten minste 'n uur elke dag geswem om die skouersterkte te bou wat nodig was vir die karakter, want seilers moet regtig sterk wees. Om te seil lyk baie romanties en dit lyk so maklik omdat goeie seilers dit maklik laat lyk, maar dis eintlik baie moeilik en vereis baie krag in jou bolyf wat ek nie gehad het nie", vertel sy in bogenoemde onderhoud. Alhoewel sy nie normaalweg gewigsbewus is nie, moes sy ook 'n streng dieet volg om die meisie voor te stel wat vir meer as 'n maand op see moes oorleef. Tydens die laaste twee weke van verfilming kon sy net 350 kalorieë per dag inneem: 'n blik salm, twee eiergele en 'n bietjie gestoomde groente. Verder het sy vir 'n maand lank geen aandete gehad nie, 'n ervaring wat Woodley nie graag wil oorhê nie. Sy het saans voor slapenstyd 'n glas wyn gedrink om haar honger te stil.[43] In die toneel waar sy en Claflin, in sy rol van die gewonde verloofde, smaaklik grondbootjiebotter eet, was hulle genot eg. [44] Die filmspan het vir vyf weke vanaf Julie 2017 elke dag twee uur ver op die see naby Fidji uitgevaar vir verfilming [45] en die span moes met onder andere seesiekte, geen selfoonseine en verfilming wat grootliks deur die weer bepaal is, saamleef. Woodley beskou egter die ongemak op see as slegs 'n klein prys om te betaal vir die ervaring. Regiseur, Baltasar Kormákur, het selfs die twee spelers se naar gesigsuitdrukkings verfilm om as die twee se bekommernis oor die naderende orkaan te dien. [46]. Die rolprent is goed ontvang. Owen Gleiberman van Variety-tydskrif skryf dat die erns in haar karakteruitbeelding wat die kyker toelaat om die dinge aan te voel wat sy uitbeeld, 'n talent sowel as 'n instink is wat net 'n ware toneelspeler, soos Woodley, het. In Adrift weet sy hoe om 'n gewone vrou met 'n wilde hart te speel en hou haar spel die kyker gevange. Sy dompel haarself in die oseaan, liefde en toneelspel. "Selfs verlore op see laat sy ons voel asof ons gevind is." [47] Volgens Rotten Tomatoes se algemene kritiese mening seil Adrift rimpelloos tussen 'n liefdesverhaal en 'n oorlewingsdrama, grootliks te danke aan Woodley se boeiende sentrale spel. [48] Karen Krizanovich van The Telegraph skryf dat Woodley die ster is wat nou nodig is, want sy balanseer bekendheid met eensaamheid en sosiale aksie met gesonde verstand, wat haar perfek maak vir die hoofrol van die taai, vindingryke Tami Oldham in die hartverskeurende ware verhaal van Adrift. [49] By die 21ste Jaarlikse SCAD Savannah Rolprent Fees ontvang sy die Kollig-Toekenning [50]asook die Opkomende Ster-Toekenning by die Deauville Amerikaanse Rolprent Fees. [51]

The Mauritanian

wysig

In die 2021 regsdrama-rolprent, 'The Mauritanian', wat in Desember 2019 onder andere in Kaapstad [52] geskiet is, en gegrond is op die ware verhaal van Mohamedou Ould Slahi, 'n Mauritaanse man wat vir veertien jaar lank sonder 'n aanklag in 'n aanhoudingskamp in Amerika aangehou is, speel Woodley die rol van 'n regsgeleerde, Teri Duncan. Sy gaan saam met haar vennoot, Nancy Hollander (Jodie Foster) om dié te help om Mohamedou se saak te ondersoek. Die rolprent ontvang meestal goeie resensies.[53]

The Fallout

wysig

In Augustus 2020 voeg Woodley haar by die rolverdeling van die rolprent, ‘’The Fallout ‘’, waar sy ‘n klein rolletjie as die hoofkarakter (gespeel deur Jenna Ortega) se terapeut vertolk. Haar mede-aktrise van ‘’Secret Life of an American Teenager‘’, Megan Park, is die draaiboekskryfster sowel as die regisseur. Nadat Park die draaiboek aan haar gestuur het vir terugvoer, het Woodley so baie van dit gehou dat sy dadelik die rol van die terapeut wou gehad het.[54] Park vertel dat Woodley byna elke dag van verfilming met haar in aanraking was om uit te vind hoe dit vorder. Die dag voor die verfilming van haar en Ortega se eerste toneel het sy aan Park gevra of sy ‘n teksboodskap aan Ortega kan stuur en haarself voorstel. Park vertel verder dat Woodley blomme stel toe geneem het en baie ondersteunend was tydens die hele projek. Ortega beskryf haar as uiters talentvol en “’n skat, goedhartig en ‘n ongelooflike vennoot tydens tonele.”[55]

Toekomstige rolle

wysig

Woodley sal na verwagting in die volgende rolprente verskyn wat nog nie uitgereik is nie:

In die beplande rolprent, After Exile wat sal handel oor ‘n man, Mike Delaney, se vrylating uit die gevangenis nadat hy ‘n onskuldige man gedood het ná ‘n gewelddadige roof, sal sy na verwagting die rol van Dana vertolk, wat saam met Delaney opgegroei het. Na sy vrylating probeer hul om die band wat tussen hulle was, te herstel.[56]

In Panopticon wat na verwagting ‘n spanningsvolle riller sal wees, kry sy in die rol van ‘n ambisieuse Wall Street-handelaar, Chase, ‘n uitstekende beleggingsgeleentheid. In die proses ontdek sy egter ‘n groot organisasie met potensiële verwoestende gevolge. Terwyl sy in ‘n tweestryd verkeer oor wat haar te doen staan, span sy kragte saam met ‘n wag om deel te word van die skelm onderwêreld en om só agter die kap van die byl te kom.[57]

In Girl Named Sue sal sy die hoofrol in dié drama-riller vertolk wat handel oor die ware verhaal van die Kaliforniese verdowingsmiddelspeurder, Sue Webber-Brown; haar stryd om die kinderslagoffers van die onwettige handel in verdowingsmiddels te help. Dit sal Webber-Brown se werk gedurende die 1990’s uitbeeld en in besonder hoe sy duisende kinderlewens gered het deur riglyne wat sy daargestel het.[58]

Sy sal in die verwagte rolprent, Robots, speel wat handel oor twee onwelvoeglike karakters wat menslikheid leer wanneer hul noodgedwonge saam moet werk om hul robot-dubbelgangers te agtervolg.[59]

Sy sal na verwagting saam met Miles Teller in die toekomstige rolprent, The Fence, verskyn wat sal handel oor twee pasgetroudes wat standpunt inneem teen hul uiters konserwatiewe buurman wat volhou om ‘n groot muur ten einde sy huis teen moontlike terroriste te beskerm.[60]

Filmografie

wysig
 
Shailene Woodley, by die filmpremiere van "Divergent" in Kalifornië in Maart 2014

Rolprente

wysig
  • 2011: The Descendants
  • 2013: The Spectacular Now
  • 2014: The Fault in Our Stars
  • 2014: Divergent
  • 2014: White Bird in a Blizzard
  • 2015: Insurgent
  • 2016: Allegiant
  • 2016: Snowden
  • 2018: Adrift
  • 2019: Endings, Beginnings
  • 2019: Arkie
  • 2021: The Mauritanian
  • 2021: The Fallout
  • 2023: To Catch a Killer
  • No Baggage

Televisiereekse

wysig
  • 2008: The Secret Life of the American Teenager
  • 2012: Unscripted
  • 2014: Totally Clevver
  • 2017: Big Little Lies

Televisierolprente

wysig
  • 2004: A Place Called Home
  • 2005: An American Girl Adventure

Video's

wysig
  • 2011: Best Coast: Our Deal
  • 2014: Divergent: Beyond the Initiation
  • 2014: Divergent: Faction Fashions
  • 2014: Divergent: Meet Four
  • 2014: The Behind the Scenes of 'Divergent'
  • 2014: Divergent: Choice
  • 2015: From Divergent to Insurgent
  • 2015: Insurgent: Anatomy of a Scene: The Train Fight
  • 2015: Insurgent Unlocked: The Ultimate Behind the Scenes Access
  • 2016: Allegiant: Book to Film
  • 2016: Finding the Future: Effects and Technology of 'Allegiant'
  • 2016: Allegiant: Characters in Conflict
  • 2016: The Next Chapter: Cast and Characters of 'Allegiant'
  • 2016: Snowden Live
  • 2017: Taboo Feat. Shailene Woodley: Stand Up/Stand N Rock
  • 2018: The Making of 'Adrift'

Verwysings

wysig
  1. ↑ "Shailene Woodley". www.thefamouspeople.com (in Engels).
  2. ↑ "Who is Lori Woodley? Everything on Shailene Woodley's Mom Age and Instagram Details". www.wiki.ng (in Engels). Geargiveer vanaf die oorspronklike op 23 November 2021. Besoek op 23 November 2021.
  3. ↑ Anderson, Nicole (10 September 2017). "Tanner Woodley - 5 Things You Need to Know About Shailene Woodley's Brother". www.someecards.com (in Engels).
  4. ↑ Erskine, Blaire (23 Julie 2019). "The Stunning Transformation of Shailene Woodley". www.thelist.com (in Engels).
  5. ↑ "Shailene Woodley's Scoliosis Story". www.hudsonvalleyscoliosis.com (in Engels).
  6. ↑ "Shailene Woodley". www.thefamouspeople.com (in Engels).
  7. ↑ Blaire, Erskine (23 Julie 2019). "The Stunning Transformation of Shailene Woodley". www.thelist.com (in Engels).
  8. ↑ "Shailene Woodley". www.thefamouspeople.com (in Engels).
  9. ↑ "The Secret Life of the American Teenager (critic reviews)". www.metacritic.com (in Engels).
  10. ↑ "Shailene Woodley Awards". imdb.com (in Engels).
  11. ↑ Scott, A. O. (15 November 2011). "For One Man, Hawaii is a Land of Problems". www.nytimes.com (in Engels).
  12. ↑ Debruge, Peter (2 September 2011). "The Descendants". variety.com (in Engels).
  13. ↑ Van Nierop, Leon (21 Maart 2014). "Movie Review: The Spectacular Now". www.citizen.co.za (in Engels).
  14. ↑ Parker, Dylan (9 Desember 2020). "The Truth About Shailene Woodley's Relationship with George Clooney". www.thethings.com (in Engels).
  15. ↑ Wexler, Sarah (16 November 2011). "Shailene Woodley on 'The Descendants', Crying Underwater, and George Clooney's Fart Machine". www.vulture.com (in Engels).
  16. ↑ "Complete Filmography of Shailene Woodley as of 2021". listchallenges.com (in Engels).
  17. ↑ Sharkey, Betsy (1 Augustus 2013). "Review: 'The Spectacular Now' is an intoxicating brew of teen angst". www.latimes.com (in Engels).
  18. ↑ Van Nierop, Leon. "Movie review: The Spectacular Now". citizen.co.za (in Engels).
  19. ↑ Blaire, Erskine (23 Julie 2019). "The Stunning Transformation of Shailene Woodley". www.thelist.com (in Engels).
  20. ↑ Tallerico, Brian (24 Oktober 2014). "White Bird in a Blizzard". www.rogerebert.com (in Engels).
  21. ↑ "Divergent Spain -Director Neil Burger Interwiew". youtube.com.
  22. ↑ Tinubu, Abeni (25 Junie 2021). "Shailene Woodley was Drawn to 'Divergent' because of 1 Relationship". www.cheatsheet.com (in Engels).
  23. ↑ "Divergent Imdb". imdb.com (in Engels).
  24. ↑ Miller, Julie (19 Julie 2013). "'Divergent's' Shailene Woodley and Theo James on Ferris-wheel Stunt and 'Hunger Games' Comparisons". www.vanityfair.com (in Engels).
  25. ↑ Picardi, Phillip (21 Maart 2014). "Shailene Woodley's Stunt Double on Jumping off Buildings, Being Set on Fire, and Why You Should Take a Dance Class". www.teenvogue.com (in Engels).
  26. ↑ Johnson, Zach. "Shailene Woodley on 'Divergent' Finale 'Ascendant': We're in "Limbo"". www.eonline.com (in Engels).
  27. ↑ Van Nierop, Leon. "Movie review: Divergent". www.citizen.co.za (in Engels).
  28. ↑ "Van Boek tot Silwerdoek". www.rooirose.co.za. 10 Augustus 2015.
  29. ↑ Allard, Sam (25 Maart 2014). "Film version of 'Divergent' is a Worthy Effort". web.archive.com (in Engels). Geargiveer vanaf die oorspronklike op 14 Mei 2014. Besoek op 5 Desember 2021.{{cite web}}: CS1 maint: bot: original URL status unknown (link)
  30. ↑ Kimmel, Daniel M. (19 Maart 2015). "Review - Insurgent" (in Engels).
  31. ↑ "Divergent (2014) Awards". imdb.com (in Engels).
  32. ↑ "The Divergent Series: Insurgent (2016)". imdb.com (in Engels).
  33. ↑ "Allegiant (2016) Awards". imdb.com (in Engels).
  34. ↑ Lattanzio, Ryan (11 April 2020). "Shailene Woodley says she 'let go' of her Career after 'Divergent' due to 'Very Scary' Situation". www.yahoo.com (in Engels).
  35. ↑ Cruz, Gilbert (5 Junie 2014). "The Fault in Our Stars Director Josh Boone on Being Earnest 'The Stand' and the many tears of Shailene Woodley". www.vulture.com (in Engels).
  36. ↑ Tallerico, Brian (16 September 2016). "Snowden (reviews)". www.rogerebert.com (in Engels).
  37. ↑ Bradshaw, Peter (6 Augustus 2020). "Endings, Beginnings review —seriously middling". amp.theguardian.com (in Engels).
  38. ↑ Tinubu, Abeni (8 Junie 2021). "Shailene Woodley 'Needed Therapy' after Finishing 1 of Her Movies". cheatsheet.com (in Engels).
  39. ↑ Kroll, Justin (23 Mei 2017). "Sam Claflin to Star Opposite Shailene Woodley in Survival Drama' Adrift ' (EXCLUSIVE)". variety.com (in Engels).
  40. ↑ Sisley, Dominique (11 Oktober 2016). "The Divergent actress live-streamed the entire incident on her Facebook-page". www.dazeddigital.com (in Engels).
  41. ↑ Krizanovich, Karen (8 Junie 2018). "Why we need a star like Shailene Woodley right now". www.telegraph.co.uk (in Engels).
  42. ↑ Goodfellow, Melanie (29 Mei 2018). "Survival movie Adrift filmed on location in Fiji". www-kftv-com.cdn.ampproject.org (in Engels).
  43. ↑ Lemoncelli, Jenna (28 Junie 2018). "Shailene Woodley Reveals Drastic 350 Calorie Diet To Drop Lbs To Play Starving Sailor". hollywoodlife.com (in Engels).
  44. ↑ Alexander, Bryan (1 Junie 2018). "Shailene Woodley goes 'Adrift' and talks seasickness, peanut butter and naked meditation". amp.usatoday. com (in Engels).
  45. ↑ Joest, Mick. "Shailene Woodley Said There Was Lots Of Puking While Filming ADRIFT". geektyrant.com (in Engels).
  46. ↑ Alexander, Bryan (1 Junie 2018). "Shailene Woodley goes 'Adrift' and talks seasickness, peanut butter and naked meditation". amp.usatoday. com (in Engels).
  47. ↑ Gleiberman, Owen (31 Mei 2018). "Film Review: 'Adrift'". variety.com (in Engels).
  48. ↑ "Adrift (2018)". www.rottentomatoes.com (in Engels).
  49. ↑ Krizanovich, Karen (8 Junie 2018). "Why we need a star like Shailene Woodley right now". www.telegraph.co.uk (in Engels).
  50. ↑ "SCAD Announces Honorees for 21st Annual SCAD Savannah Film Festival". filmfest.scad.edu (in Engels). 28 September 2018.
  51. ↑ Richford, Rhonda (23 Augustus 2018). "France's Deauville Film Festival to Honor Morgan Freeman, Sarah Jessica Parker". www.hollywoodreporter.com (in Engels).
  52. ↑ Dercksen, Daniel (16 Maart 2021). "The Mauritanian - The remarkable true story of an extraordinary man whose humanity triumphed, leaving those around him profoundly changed". writingstudio.co.za (in Engels).
  53. ↑ "The Mauritanian (resensie)". www.rottentomatoes.com (in Engels).
  54. ↑ Tinubu, Abeni (31 Januarie 2022). "Shailene Woodley Basically Cast Herself in The Fallout". www.cheatsheet.com (in Engels).
  55. ↑ Drysdale, Jennifer (23 Maart 2021). "Megan Park on Reuniting With Secret Life Co-Star Shailene Woodley on New Movie 'The Fallout' (Exclusive)". www.wusa9.com (in Engels).
  56. ↑ Fleming Jr., Mike (27 Augustus 2019). "Shailene Woodley Joins Robert De Niro & Shia LaBeouf in 'After Exile'". www.deadline.com (in Engels).
  57. ↑ Fleming Jr., Mike (25 Februarie 2021). "AGC Studios Firms 'Panopticon'; Shailene Woodley, Anthony Mackie, Jacob Latimore Star in Andres Baiz-directed thriller". www.deadline.com (in Engels).
  58. ↑ Fleming Jr., Mike (14 November 2019). "Shailene Woodley To Star In Fernando Coimbra-Directed 'Girl Named Sue'". www.deadline.com (in Engels).
  59. ↑ Grater, Tom (21 Junie 2021). "Shailene Woodley to Star with Jack Whitehall in Comedy 'Robots' — Cannes Market". www.deadline.com (in Engels).
  60. ↑ Ashton, Will (12 Julie 2021). "Upcoming Shailene Woodley Movies: What's ahead for the Big Little Lies star". www.cinemablend.com (in Engels).

Eksterne skakels

wysig
Ontsluit van "https://af.wikipedia.org/w/index.php?title=Shailene_Woodley&oldid=2620175"