Shoegaze
Shoegaze is 'n meestal Britse subgenre van indiemusiek, die naam waarvan na die tipiese houding van die musikante op die podium verwys: onbeweeglik met hul hoofde na hul skoene gerig. Die genre word deur die groot en sferiese klankmuur gekenmerk waaronder dromerige melodieë skuil. Die stemme is moeilik van die instrumente te onderskei omdat laasgenoemde luider as die stem gemeng is en die instrumente self is nouliks te herken; hulle vorm 'n klankmuur. Liedtekste, indien dit uitkenbaar of verstaanbaar is, beskryf soete, kleurryke drome oor liefde, dood en dwelmmiddels.
Shoegaze het sy oorsprong in die midde van die jare '80, toe The Jesus and Mary Chain op sy debuut Psychocandy met ongehoorde hoeveelhede terugvoer, distorsie (distortion) en enorm luide dreunende kitaarriwwe uitpak. Ook groepe soos Spacemen 3 en Loop het hul musiek met oorklankde (overdubbed) kitaarlae oorgiet. Hierdie groepe het onder andere My Bloody Valentine geïnspireer om met daardie soort geraas (noise) te gaan eksperimenteer. In 1988 het hulle op Isn't Anything 'n soort hibride van geraas (noise) en dromerige sang en melodieë à la Cocteau Twins uitgebring. Shoegaze is gebore.
Spoedig het vele gelykwaardige groepe in die voetspore van My Bloody Valentine getree, soos Ride, Slowdrive en Galaxie 500. Die shoegazing-genre het teen die einde van die jare '80 en begin van die jare '90 veel invloed op andere, verwante genres gehad, soos die psychedeliese pop en rock van The Stone Roses en Spiritualized, en Radiohead se "Creep".
In 1991 het My Bloody Valentine die bekende Loveless uitgereik — volgens sommige die beste shoegaze-album. Andere hoogtepunte was Nowhere van Ride en Souvlaki van Slowdrive uit 1993 wat met die hulp van Brian Eno meer op die dromerige aspek van shoegazing gerig was.
Teen die begin van die jare '90 het die genre egter 'n stille dood gesterf. Geen enkele groep kon daarin slaag om eg kommersieel sukses te boek nie, mede deurdat in die pers alle aandag na britpop en grunge verskuif het. Sommige het die genre verlaat, andere het 'n meer popperige afwerking ingevoer; tog het The Verve daarin geslaag om 'n suksesvolle loopbaan in die genre uit te bou.
Die erfenis van shoegaze is egter nie te onderskat nie. So het geraasrock (noise rock) en droompop (dream-pop) in die jare '90 tot die gewildste indie-subgenres uitgegroei, soos die geval was met Mercury Rev, The Flaming Lips, American Analog Set en Yo La Tengo. Ook is die opkoms van postrock 'n soortgelyke musikale herwaardering vir sferiese rock.