Smartt-sindikaatdam
Die Smartt-sindikaatdam, een van die oudste damme in die land, is 20 km wes-suidwes van Britstown en suid van die pad na Vosburg. Dit het 'n volume van byna 95 miljoen m³. Met 'n stelsel kanale van 47 km word 22 boere en 'n gebied van 1 800 ha van water voorsien. Daar word hoofsaaklik met lusern, koring, mielies en beeste geboer.
| Smartt-sindikaatdam | |
|---|---|
| Ligging | 20 km van Britstown |
| Provinsie/Land | Noord-Kaap, Suid-Afrika |
| Koördinate | 30°37′45″S 23°18′16″O / 30.62917°S 23.30444°O |
| Dam in | Ongersrivier |
| Doel | Besproeiing |
| Openingsdatum | 1963 |
| Eienaar | Departement van Waterwese |
| Soort dam | Grondvulling |
| Hoogte van wal | 21 m |
| Lengte van wal | 1806 m |
| Bakmaat | 100 300 000 m3 |
| Reservoir | Smartt-damreservoir |
| Damoppervlak | 3 156.9 hektaar |
Water van die streek oos van Carnarvon en Vosburg sowel as vanaf Richmond, Victoria-Wes en Loxton vloei in die Groenrivier en die Ongersrivier (en sy sytakke die Brak-, Brakpoort-, Klein-Brak- en die Visgatriviere) na die dam. Hierdie seisoenale riviere dreineer saam 'n opvangsgebied van 12 000 km² en lewer 'n jaarlikse afloop van 50 miljoen m³.
Die Smartt-sindikaat is in 1885 deur 'n groep grondeienaars onder leiding van dr. Thomas Smartt gestig. Hierdie groep het tussen 1908 en 1912 by Houwater die grootste privaatdam in Suid-Afrika gebou; dit was op daardie tydstip met sy volume van 112 miljoen m³ boonop die grootste dam in die land. Na twee dekades was die volume egter deur toeslikking gehalveer, 'n probleem wat menige opgaardam ondervind het. In Oktober 1954 is die sindikaat gelikwideer en deur 'n groep boere oorgeneem wat 'n besproeiingsraad gevorm het. Tydens die vloed van Maart 1961 het die grondwal gebreek, maar dit is in 1964 deur die staat herstel.
Sien ook
wysigBibliografie
wysig- Bulpin, T.V.: Discovering Southern Africa. Kaapstad: Books of Africa, 1983. ISBN 0-949956-17-1
- Standard Encyclopaedia of Southern Africa, deel 10. Kaapstad: Nasou, 1974. ISBN 0-625-00326-8
- www.dwaf.gov.za