Wienerwald

Die Wienerwald is die mees oostelike uitloper van die Noord-Alpe in die Oostenrykse deelstate Neder-Oostenryk en Wene en vorm sodoende die noordoostelike einde van die Alpereeks. Die middelgebergte, wat sowat 45 km lank en tussen 20 en 30 km wyd is, is grotendeels bebos en het tot 'n gewilde ontspanningsgebied vir die bewoners van die nabygeleë Oostenrykse hoofstad ontwikkel. Byna die hele gebergte, insluitende sy randgebiede wat tot in die stadsgebied van Wene strek, is deur Unesco as Biosfeerpark Wienerwald aangewys.