'''Caledon''' is ook beroemd om sy botaniese tuin. Dit is in [[1927]] gestig en beslaan meer as 10 hektaar vallei en berghang. Hier word jaarliks in September 'n veldblommeskou gehou.
==NG gemeente==
Die gemeente is in [[1811]] as agtste gemeente van die NG Kerk gestig.
Godsdienstige ingesetenes van die streek wat destyds "het Zartberg" of "het warme Bad" genoem is, kon weens die verre afstand en gevaarlike pad net een keer per jaar na [[Swellendam]] gaan – die gemeente waaronder '''Caledon''' toe nog geval het - en daarom rig W. WEssels, P.L. de Bruyn, J.R. Maree en H.J. Swart 'n versoek aan die regering en vra verlof om 'n kerk te bou waartoe hulle na vermoë soveel moontlik sal help bydra. Die regering het op [[21 Desember]] [[1810]] die plaas waar die warmbad is, van J. Rademan vir 10 000 rds. aangekoop en erwe verkoop. Op [[27 Mei]] [[1811]] is die eerste kerkraadslede deur die adjunk-landdros benoem en deur die regering goedgekeur.
Ds. C.M. de Vos, een van die eerste Afrikaners wat predikant geword het en in [[Europa]], [[Afrika]] en [[Asië]] gearbei het, is as predikant benoem. Toe hy in [[Mei]] [[1811]] sy dienswerk aanvaar, was daar nog geen kerkgebou of pastorie nie. Hy het sy intrek in 'n boerewoning geneem en die wynkelder in 'n voorlopige kerkgebou verander. Later is die pastorie (wat in [[1818]] afgebrand het) en die kerk gebou. Laasgenoemde is op [[1 Januarie]] [[1813]] ingewy. In daardie jaar het sir [[John Cradock]] die naam Caledon aan die dorp gegee. Die huidige kerkgebou is in [[1876]] ingewy tydens die dienstydperk van ds. P.J.G. de Vos.
Die Wes-gemeente is in [[1973]] afgestig. Saam het die twee gemeentes in [[1979]] sowat 1 850 belydende (volwasse) lidmate gehad, dog in [[2007]] het dit tot 1 600 afgeneem. Die NG Sendingmeente Caledon is in [[1908]] gestig.
