St. Croix-eilandgroep

Die St. Croix-argipel lê in die westekant van Algoabaai, noordoos van Port Elizabeth, tussen die mondings van die Sondagsrivier en die Swartkopsrivier, en bestaan uit die rotsagtige eilandjies St. Croix, Brenton en Jahleel.

St. Croix soos vanaf die vasteland gesien.

St. Croix

St. Croix is 12 ha groot, 700 m lank van noordwes tot suidoos, op sy breedste 360 m, op sy hoogste 60 m bo seevlak en 4 km van die naaste land. Dit lê op 33° 47' 58″ suid en 25° 46' 11″ oos.

Brenton

Brenton lê op 33° 49' 3″ suid en 25° 45' 54″ oos. Dit is 250 m by 200 m groot, bereik 'n hoogte van 20 m bo seevlak en is 6 km van die kus.

Jahleel

Jahleel (soms Jakkals genoem) is net kleiner as Brenton, maar is slegs 10 m hoog. Dit lê 1 km van die strand en amper teen die hawehoof van die nuwe Ngqura-hawe by die mond van die Koegarivier.

Geskiedenis

Vroeg in Maart 1488 het Bartholomeus Dias en sy geselskap St. Croix besoek, 'n hout kruis opgerig en 'n kerkdiens gehou. Dias het die eilandjie Santa Cruz genoem. Die ander twee eilandjies is genoem na Jahleel Brenton (1770–1844), 'n Amerikaanse vlootoffisier en kunstenaar. Tans vorm die argipel deel van die Addo-olifant Nasionale Park.

Fauna

Van plantegroei is daar op die eilandjies byna geen sprake nie. Seevoëls, soos die brilpikkewyn, swarttobie, witborskormorant en die trekkormorant kom in groot getalle voor.

Lees ook

• Voëleiland, Algoabaai

Bibliografie

• www.sa-venues.com