Sutlej
Die Sutlej of Satluj (Chinees: 朗钦藏布, pinyin: Lăngqīn Zàngbù; Hindi: सतलुज; Oerdoe: درياۓ ستلُج; Pandjabi: ਸਤਲੁਜ; Sanskrit: शतद्रुम, shatadrum; Tibettaans: གླང་ཆེན་གཙང་པོ, Langqên Zangbo) is die grootste sytak van die Indus. Dié rivier, met 'n lengte van 1 400 km (900 myl), is die langste van die Indus se vyf sytakke in die streek Punjab (Pandjabi: پنجاب, letterlik: "land van vyf riviere").[2]
| Sutlej – Satluj | |
|---|---|
 | |
 Die stroomgebied van die Sutlej | |
| Oorsprong | Rakshastalmeer, naby die berg Kailash, Tibet, Volksrepubliek China Himalaja |
| Monding | met die Chenab in die Panjnad, Punjab, Pakistan Indus |
| Stroomgebied | Volksrepubliek China, Indië, Pakistan |
| Lengte | 1 400 km (900 myl) |
| Oorspronghoogte | 4 600 m (15 000 voet) |
| Mondinghoogte | 2 286 m (7 500 voet) |
| Gemiddelde afloop | 500 m³/s (17 657 vt³/s[1]) |
| Stroomgebiedopp. | 395 000 km² (152 510 myl²) |
 Kaart van die Sutlej-bekken in Asië
| |
Die Sutlej ontspring uit die Rakshastalmeer in die Chinese outonome gewes Tibet binne die Himalaja, net noord van die grens tot Nepal en net wes van die Brahmaputra se bron, naby die berg Kailash. Hier word dié rivier in Tibettaans གླང་ཆེན་གཙང་པོ Langqên Zangbo en in Chinees 朗钦藏布 Lăngqīn Zàngbù genoem. Aansluitend vloei dié rivier in 'n noordwestelike rigting en bereik die grens tot die Indiese deelstaat Himachal Pradesh. Hier vloei die Sutlej in 'n westelike rigting en bereik die deelstaat Punjab. Net suid van Amritsar en Lahore vorm dié rivier vir sowat 100 km die grens tussen Indië en Pakistan en vloei aansluitend in 'n suidwestelike rigting deur Bahawalpur. Sowat 60 km verder suidwes vloei die Sutlej en die Chenab saam, om die Panjnad te vorm. Die Panjnad (Oerdoe/Pandjabi: پنجند, panj = "vyf, nadi = "rivier"), met 'n lengte van 71 km, versamel al die water van die Punjab se vyf groot riviere en mond in die Indus uit.
Verwysings
wysig- ↑ (en) "Sutlej valley". The Free Dictionary.
- ↑ "Sutlej River" (in Engels). Encyclopædia Britannica. 2 Augustus 2019. Geargiveer vanaf die oorspronklike op 12 April 2020.
Eksterne skakels
wysig
Wikimedia Commons het meer media in die kategorie Sutlej.
