Teenpous Johannes XVI

Teenpous Johannes XVI gebore as Johannes Philagathos (in Latyn) of Giovanni Filagato (in Italiaans) was 'n teenpous van die Rooms Katolieke Kerk van 997 tot 998.

Teenpous Johannes XVI
Geboortenaam	Johannes Philagathos Giovanni Filagato
Geboorteplek	Rossano
Sterfdatum	ongeveer 1001
Sterfplek	Fulda
Teenpous van	Pous Gregorius V
Begin van pontifikaat	996
Einde van pontifikaat	998

Biografie

Johannes is gebore in Rossano, die Bisantynse deel van suidelike Italië. Hy was die kapelaan van keiserin Theophanu, die vrou van keiser Otto II. Hy is twee keer benoem as die keiserlike kanselier van Otto II in Italië van 980 tot 982. Van 991 tot 992 is hy ab van Nonantola. Gedurende sy reise in Italië word hy in 987 aangestel as die leermeester van die keiser se sewe jaar oue seun, die latere keiser Otto III. Deur toedoen van die keiserin word hy biskop van Placenza en word hy na Konstantinopel gestuur om 'n Bisantynse prinses huis toe te bring as vrou vir Otto III.

Na die dood van Otto II in 996 kom Otto III na Rome om Pous Johannes XV by te staan teen 'n opstand van Crescentius die jongere 'n ryk en magtige Romeinse edelman. Otto onderbreek egter sy reis in Pavia om daar as koning van Lombardye ingehuldig te word. Hy kom pas in Rome aan na die dood van pous Johannes. In Rome reël Otto die verkiesing van sy neef Bruno van Karintië as Pous Gregorius V. Pous Gregorius kroon toe Otto as keiser op 21 Mei 996.

Toe Otto III terugkeer na Duitsland word pous Gregorius met geweld deur Crescentius II verwyder en word Johannes XVI as pous aangestel met die hulp van die Bisantynse keiser Basilius II. Tydens 'n sinode van Westerse biskoppe in Pavia in 997 word besluit dat Gregorius die wettige pous is en Johannes word geëkskommunikeer.

In Februarie 998 word die Crescentius-opstand finaal onderdruk toe Otto weer na Rome trek. Johannes het gevlug, maar is deur die keiserlike troepe agterhaal. Sy neus, tong en ore is afgesny, sy hande gebreek en sy oë uitgesteek. Hy is publiek bespot in die teenwoordigheid van Otto en Gregorius. Uiteindelik is hy opgesluit in 'n klooster in Fulda, Duitsland waar hy in ongeveer 1001 sterf.

Verwysings

Hierdie artikel is in sy geheel of gedeeltelik vanuit die Nederlandse Wikipedia vertaal.